Аниме

Википедиысь материал

Аниме (яп. アニメ) — со анимация, кудӥз нырысьсэ потӥз Япониын 1917 арын.

Нырысь со пичи фильмъёс гинэ вал. Кыстӥськизы одӥг минутысен витёзь. Нырысетӥ япон анимационой фильм лыдъяське «Набросокъёсын выль альбом» («Декобоко Син Гатё», 1917 ар) Декотена Симокаваен. Со мелэн суредаз сьӧд доска вылэ, собере суредъёсызъя туспуктэмъёс лэсьтӥз. 1920-тӥ аръёсы Япониын анимационной фильмлэн огшоры кузьдалаез вуылэ вал ни 15 минутозь. Со дыре котькуд анимациез суредаськись ас дораз пичи студиын лэсьтылӥз. Но кинематографической но кинопрокатной фирмаос асьсэлы та анимационной фильмъёсты возьматыны право басьтон понна коньдон но висъяллязы. Но вуэм уксёлэн лыдыз трос ик ӧй вал бере, аниматоръёс мультфильмзылэсь качествозэ лыдын воштылӥзы. Соос одӥг фильмез ик трос ар ӵоже поттыны ӧз быгатылэ.

Япон анимация трослы мукет американ мультфильмлэсь. Сое герӟаны луэ графикалэн но сюжетлэн мукет культурной традициосын. Анимеын уг шӧдӥськы мюзикллэн традициез американ киноосын кадь. Татын ваньмыз трослы серъёзнойгес, нош сюжетез драматичнойгес.

Аниме лэсьтӥсьёс технической экспериментэз ӵем уг кутыло, со понна трос дыр сюжетлы, персонажлэсь образзэ чебер но тунсыко лэсьтонлы висъяло. Соин сэрен анимеын дизайнеръёс бадӟымгес инты басьто аниматоръёсын ӵошатыса.

Символо-графической кыл анимеын но мангаын зол азинтӥськемын, шундыпуксён палась комиксъёсын но мультфильмъёсын ӵошатыса. Кӧня ке гинэ пусэн япон суредасьёс возьматыны быгато персонажлэсь мылкыдзэ яке характерзэ. Персонажлэн бадӟымесь синъёсыз луэ анимелэн валтӥсь тодметэз, кудӥз сое пöртэм каре мукетъёсызлэсь.

Пиосмуртлэн но ныллэн чеберлыкез сярысь валанъёс Япониын потӥзы VIII дауре. Татын сӥлы каро вылэм кышномурт чеберез. Сюбег ымныро, кузь йырсиё, векчи но лапег мугоро, бадӟым синмо нылашъёсты чеберен лыдъяллязы. «Пиштӥсь» синмо но кузь синлысэн персонажъёс нырысь потӥзы сёдзё-мангаын, малы ке шуоно япон традициын таӵе синъёсын адямиез чебер шуо вал.

Синъёс — со япон эстетикаын персонаж ымнырызлэн шор объектэз. Со возьматэ геройлэсь выль тодон-валан басьтыны дась луэмзэ. Соин ик бадӟым синъёс возьмато персонажлэсь пичи луэмзэ.