Брест крепость

Брест крепостьлэн вань на мукет валатонъёсыз.

Бре́ст кре́пость (белор. Брэсцкая крэпасць, крепость Брест-Литовск) — Белоруссиысь Брест карысь крепость, интыяське Мухавец шур Шундыпуксён Буге усён вадесын.

Кылдэмез

Брест крепость пуктыны кутскемын 1836-тӥ арын Карл Иванович Опперман топографлэн но инженерлэн проектэзъя. Йылпумъямын 1842-тӥ арын. Крепостьлэн вал цитаделез (валтӥсь укрепление) но сое утись куинь укреплениосыз. Огъя площадез вал 4 км², копакыз кыстӥськиз 6,4 иськеме. Цитадельлэн борддоръёсызлэн пасьталаез вал 2 метр, цитадель пушкын интыяськизы 12 сюрс муртлы дасям 500 казематъёс.

1864-тӥ—1888-тӥ аръёсы Эдуард Иванович Тотлебенлэн проектэзъя крепость выльдэмын вал, нош 1876-тӥ арын Давид Иванович Гриммлэн проектэзъя отчы Свято-Николаевский черк пуктӥзы.

Крепость XX даурлэн кутсконаз

Нырысетӥ дунневыл ож кутскем бере крепость утиськыны дасяськиз, но уйин 1915-тӥ арын нырысетӥ (13-тӥ) августэ, чигнамлы луыса, со ӟуч войскоосын кельтэмын но кӧня ке пуштытъямын вал. 1918-тӥ арын 3-тӥ мартэ Цитадельын Брест огкыл гожтэмын вал. 1918-тӥ ар пумозь крепость немецъёс киын вал, нош собере полякъёслы выжиз. 1920-тӥ арын сое киултӥз Горд Армия, но бӧрысь Рига огкылъя со выжиз II Речь Посполитаялы.

Войнаос вискын крепостьын интыяськиз казарма, склад но политической пытсэт (1930-тӥ аръёсы отчы интыязы кивалтэтлы пумит мынӥсьёсыз).

1939-тӥ арын Брест крепостез утён

Нырысетӥ дунневыл ож кутскем бере мукет нуналаз, 1939-тӥ арын 2-тӥ сентябре, немецъёс нырысетӥзэ пуштытъязы Брест крепостез: самолётъёс куштӥзы 10 бомба, йӧттӥзы Тӧдьы дворецез. Со вакытэ казармаосын интыяськизы пехотая полкъёслэн 35-тӥ но 82-тӥ батальонъёссы, озьы ик армие басьтэм солдатъёс, кудъёссэс мукет частьёсы келяны дасяло вал но мукетъёсыз.

Карлэн но крепостьлэн гарнизонэнызы кивалтӥз Францишека Клееберг генераллэн «Полесье» группаез; 11-тӥ сентябре гарнизонэн кивалтӥсе пуктӥзы Константин Плисовский генералэз. Крепостез утисьёслэн ӧй вал ожтӥрлыксы танкъёслы пумит, но ӵапак танкъёсын соослы ожмаськоно луиз. 13-тӥ сентябрьлы военнойёслэн семьяоссы крепостьысь палэнэ келямын, отысь выжъёс но потонъёс минировать каремын, валтӥсь капка танкъёсын ворсамын, музъемын пехота понна окопъёс гудэмын вал.

1939-тӥ арын 14-тӥ сентябре немец войскоос турттӥзы басьтыны городэз но крепостез, но соослэн ӧз пормы. Со нуналэ ик немец артиллерия но авиация крепостез пуштытъяны кутскизы. Вуоно ӵукнаяз, секыт ожмаськонъёс бере, немецъёс киултӥзы городлэсь бадӟым люкетсэ. Брестэз утисьёс чигназы крепосте. 16-тӥ сентябре ӵукна тушмонъёс крепость вылэ мерскизы, но басьтыны сое ӧз быгатэ. Уйин 17-тӥ сентябре сӧсырмем Плисовский крепостез кельтон но, Бугез потыса, лымшоре кошкон сярысь приказ сётӥз. Войскоос выжизы йӧтылымтэ выжетӥ Терасполь укрепление, отысен - Терасполе.

22-тӥ сентябре немецъёс Брестэз Горд Армилэн 29-тӥ танковой бригадаезлы сётӥзы. Озьы Брест но Брест крепость выжизы СССР-лы.

Туспуктэмъёс

Крепосте пырон
Крепостьысь подвалын