Можга

Можга
Можгалэн гербез
Шаер	Россия
Элькун	Удмуртия
Йырыз	Сергей Пантюхин
Кылдытон	1835
Улӥсьёс (2001)  – ваньмыз	50 072

Можга кар - Можга ёрослэн центрез, интыяськемын Удмурт шаерлэн лымшор палаз Вало шур дурын.

Нырысьсэ Можга сярысь гожтэмын Ландратской переписьын 1710-тӥ, 1716-тӥ аръёсы. Интыяськемын Удмуртилэн лымшор-шундыпуксён палаз, Ижен вискыз - 93 иськем. Можга пыр ортче Горький чугун сюрес, озьы ик Москвае нуись федеральной сюрес. Можга город пыр ортче Сюга шур - со Вало шурлэн вайяськемез.

1754-тӥ арын, татын черк усьтӥськем бере, Можга гурт черкогуртлы пӧрмиз.

Можгалэн историез кутске 1835 аре: соку Алабгоысь купец Фёдор Чернов Сюга шур дурын кылдытӥз Сюгиысь пияла поттон заводэз. Со завод бордын кылдӥз Сюгинской нимо посёлок. 1924 аре посёлоклы выль ним сётэмын вал – Красной, собере 1929 аре Красной посёлок каре пӧрмытэмын вал но выль нимзэ басьтӥз – Можга. Та ним Можга карлы матын сылӥсь Можга черкогуртлэн нимызлэсь басьтэмын вал.

Нырысетӥ пияла продукцизэс - тусьтыоссэс, ӟенеликъёссэс - поттӥзы 1842-тӥ арын. Но соослэн ӟечлыксы улӥын вал. Соин ик Чернов заводэз вузаз мукет узырилы - Лебедевлы.

1892-тӥ арын заводэз валтыны ӧдъяз мукет адями - А. П. Сырнев. Но таиз но кема ужаны уг вутты - сое воштэ С. А. Шишков.

Ӵапак та вакытэ - 1902-тӥ арын - заводэ вуылэ дано писатель А. Н. Толстой. С. А. Шишков - та гожъяськисьлэн ӵыжы-выжыез - тодматэ Толстоез заводлэн ужан ӧреныз. Ӟеч продукциенызы можгаос вуз карылӥзы Алабгоын, Сызраньын, Самараын, Чистопольын.

1914-тӥ арын Можгаын лэсьтыны кутскизы Казань-Екатеринбург чугун сюрес. Со юрттӥз черкогуртлэсь экономиказэ ӝутыны, азьланьтыны.

3-тӥ апреле 1924-тӥ арын та посёлоклы Красный ним сётӥзы. 1929-тӥ арын сое Можгалы воштӥзы. Нош 1963-тӥ арын со лыдъяськыны кутскиз Удмуртилэн городэныз.

Можга городын промышленность удысын трос гинэ огазеяськонъёс тыршо. Кылсярысь, «Дубитель», «Редуктор», «Можгинский конденсатор», «Авторемзавод «Можгинский», «Свет», «Можгинский лесокомбинат» но трос мукет.

1954-тӥ арын Можгаын нырысьсэ пуктэмын вал 2 этажъем улон корка. 1969-тӥ арын городлэн кылдӥзы ёросъёсыз - лымшор но уйпал. Соку ик пуктӥзы гостиница, магазинъёс.

Дышетон учреждениос

Городын ог дасо школаос вань, 3 дышетон учреждениос - Можга педколледж (1922), Ветеринария колледж (1929), Медучилище (1933), 2 ПТУ, музей, 5 культурая юрт, «Спутник» киноюрт но мукет.

Улӥсьёс

Улӥсез - 48,3 сюрс адями: ӟучъёс - 56,4%, удмуртъёс - 25,9%, бигеръёс - 14,1%, музон калыкъёс - 3,6 %.

Линкъёс

Можгалэн гербез (Ӟ)