Москва понна ожмаськон

Москва понна ожмаськон (ӟуч Битва за Москву, нем. Schlacht um Moskau; 1941-тӥ арын 30-тӥ куарусён — 1942-тӥ арын 20-тӥ оштолэзь) — совето но немец войскоослэн Москва палъёсын ожмаськемзы. Люкиське 2 вакытлы: оборонительной (1941-тӥ арын 30-тӥ куарусёнысен 4-тӥ толсурозь) но наступательной, кудӥз 2 люкетлэсь кылдэ: совето армилэн контрнаступлениез (1941-тӥ арын 5-тӥ толсур — 1942-тӥ арын 7-тӥ толшор) но огъя наступлениез (1942-тӥ арын 7-10 толскрысен 20-тӥ тулыспалозь).

Адольф Гитлер Москваез — СССР-лэсь тужгес бадӟым карзэ но шоркарзэ — киултонэз «Барбаросса» операцилэсь валтӥсь ужпумзэ сямен эскериз. Москва понна ожмаськон герман но шундыпуксён историын «Операция „Тайфун“» шуыса тодмо.

А. Гитлер чакламъя, вермахт Москваез киултыны кулэ вал Быдӟым Атыкай ож кутскем бере 3-4 толэзь куспын. Ӵапак озьы гожтэмын вал «Барбаросса» операцилэн планаз. Но быдэстыны сое ӧз кылды. 1941-тӥ арын коньывуонэ кунамы секыт югдур кылдӥз: тушмон шоркарлы матэ но матэ вуиз, соин йырин уно предприятиосты Москваысь эвакуировать кароно луиз. Озьы ке но со аре 7-тӥ шуркынмонэ Горд площадьын лэзизы салют, отысен ик выль басьтэм солдатъёсты шонерак фронтэ келязы. 1941-тӥ арын, бадӟым ыштонъёс адӟемез бере, Совето армия кужымзэ огазеяны быгатӥз но тушмонлы пумит зол ожмаськыны кутскиз. Смоленск котырын ожмаськон дугдытӥз вермахтэз ог 2 толэзьлы, нош Ленинград но Киев дорын ожъёсы пыриськизы Москваез киултыны дасям фашист армиос: одӥг операцизэс йылпумъятэк, мукетыз борды басьтӥськыны соос ӧз быгатэ. Соин Москва понна ожъёс 30-тӥ куарусёнэ кутскизы гинэ ай. Ортчизы соос 1941-тӥ-1942-тӥ аръёсы (отын Совето армия Быдӟым ож вакытэ нырысетӥзэ бадӟым вормонъёс вайиз). Толсуре тушмонъёс дугдытэмын но кӧня ке иськемлы берлань уллямын вал.

Германиысь пропагандая министр Й. Геббельс ож азьын оскиз, большевикъёс ӝог сётскозы шуыса. Но 1941-тӥ арын 2-тӥ июле ини со аслаз дневниказ гожтэм: «Шундыӝужан фронтын ожъёс азинтӥсько. Тушмонлэн трос быремъёсыз, ӧжыт сӧсыръёсыз но пленэ шедемъёсыз. Огъя вераса, туж секыт ожъёс мыно. „Поръян“ (прогулка) сярысь вераськонэз ик ӧвӧл. Асьме солдатъёс мырдэм возисько».

Ожлэн йылпумъянъёсыз

Совето армилы но, вермахтлы но Москва понна ож бадӟымесь ыштонъёс вайиз. Нялтас вераса, Быдӟым Атыкай ож вакытэ ыштонъёсъя но отчы пыриськемъёслэн лыдзыя со тужгес бадӟымен лыдъяське. Тушмонъёс соку асьме солдатъёслэсь тросгес ке но вал, ӧз ворме. Нош асьме армия мозмытыны быгатӥз Тула, Рязань, Москва улосъёсыз но Калинин (али Тверь), Смоленск, Орёл улосъёсысь троссэ ёросъёсыз но гуртъёсыз.

1944-тӥ арын 1-тӥ мае кылдытэмын вылэм «Москваез утён понна» медаль. 1995-тӥ арлэн даннойёсызъя, соин пусъемын 1 миллионлэсь ятыр мурт.

Ожлэн пытьыез

Москваын — быдэс кунмылэн шоркараз — вань быремъёсыз буре вайыса, вань утисьёсыз данъяса но соослы тау карыса, уно синпелетъёс, мемориалъёс, обелискъёс, стелаос, аллеяос пуктэмын вал. Озьы ик — Быдӟым ожлы сӥзем нимысьтыз музей, кытын котькуд бадӟым ожлы нимысьтыз зал висъямын, диорамаос лэсьямын, нош музей шорын ӝужыт синпелет сылэ но со котырысь копакыз борддор Быдӟым ож вакытысь Совето Союзысь геройёслэн нимъёсынызы тырмытэмын.

Нош 1966-тӥ арын, Быдӟым Вормонлы 25 ар тырмон азьын, Александровской садын кремльлэн борддорез бордын Тодмотэм Солдатлэн шайгуэз кылдӥз. Отчы ватӥзы Зеленоградын бырем ожмаськисьлэсь огъя шайгуысь поттэм лысьӧмъёссэ. Со шайгу Быдӟым Атыкай ож дыръя Родиназэс утьыса бырем вань нимтэм солдатъёслы сӥземын, вӧзаз «Нимыд тынад тодмотэм, подвигед тынад кулонтэм» гожтэмын но Ялан ӝуась тыл интыяське. Бордазы ик понэмын знамя, нош со вылэ — солдат каска но лаврлэн ваез. Вӧзазы ик город-геройёслэн аллеязы интыяське.

Со сяна, Быдӟым Атыкай ожлы сӥземын нимысьтыз бадӟым мемориальной комплекс, со интыяське Вормон паркысь Йыбырттон гурезьын. Со азьысь «Война аръёс» аллеяын 1418 фонтан ужа — ӵапак сомында нунал Быдӟым ож кыстӥськиз. Быдӟым Атыкай ожлы сӥзем валтӥсь музей азьын сылэ 140 метрлэсь ӝужыт Вормон монумент. Нош музей сьӧрын интыяське ож техникалы сӥзем бадӟым выставка. Отысь адӟыны луэ пӧртэм танкъёсыз но соослы пумит пуктылӥськись «ӵушъялъёсыз», машинаосыз, самолёт-вертолётъёсыз, пушкаосыз но мукетсэ.