Ӟечбур! (газет)
«Ӟечбур!» — лэн нырысетӥ номерез потӥз 8-тӥ (10-тӥ) январе 1930-тӥ арын. Соку солэн нимыз мукет вал - «Дась лу!». Пиналъёслы сӥзем газетэз кылдытон бордын ужазы трос тодмо удмурт адямиос: Кузебай Герд, Кедра Митрей, Пётр Блинов, Филипп Кедров но мукет.
«Ӟечбурлэн!» нырысетӥез валтӥсь редакторез вал 22 аресъем журналист Трофим Архипов. Дышетскемезъя - дышетӥсь. Соин но, оло, нылпиослэсь лул-пуш дуннезэс, тунсыкъяськонъёссэс туж ӟеч валалляз. Газетэз но бордаз кыскись иворъёсын, суредъёсын узырмытӥз. Иворчиос номерысь номере гожъязы тодон-валан дуннее кыстӥськон, ог-огедлы юрттӥськон, тазалык но чылкытлык сярысь. «Дась лулэн!» нырысетӥ юнкоръёсыз - Пётр Блинов, Филипп Александров, Прокопий Чайников, Афанасий Лужанин, Тимофей Шмаков, Василий Широбоков, Григорий Симаков, Евгений Самсонов, Владимир Голубев, Василий Смирнов, Василий Никитин, Василий Михайлов но мукетъёсыз. Азьланяз та воргоронъёс ваньзы сямен тодмо удмурт гожъяськисьёс луизы.
Мар ватонэз — со вакытэ печатласькем «Дась лу!» нокызьы но ӵошатскыны уз быгаты туала «Ӟечбурен!». Аръёс ортчемъя газет ӧз быгаты утьыны яркыт пуштроссэ, покчи лыдӟисьёссэ. Нош кылем даурлэн 30-тӥ-60-тӥ аръёсаз удмурт нылпиослы чаклам пионер газет потӥз тӧдьы-сьӧд буёло, бумагаезлэн ӟечлыкез но ушъяськымон ӧй вал. Но макем трос вал лыдӟисьёсыз! «Дась луын!» журналистъёс ӧз тырмылэ, газет, куддыр 2-3 арня вис карыса, поталляз. Озьы ке но дас ар ортчыса — 1940-тӥ арын — солы сётӥзы УАССР-ысь Верховной Советлэсь Почётной грамотазэ.
1941-тӥ-1967-тӥ аръёсы газет ӧз печатласькы. 1-тӥ январе 1968-тӥ арын Удмурт обкомлэн решениезъя «Дась луэз!» выльысь поттыны кутскизы 22 сюрс экземплярен! Отын печталаськизы тужгес усто кылбуръёс, веросъёс, выжыкылъёс, очеркъёс. УАССР-ысь Верховной Советлэн пуктэмезъя газетлэн учредителез луиз шаерысьтымы Дышетонъя но накуая министерство.
Январь толэзьысен 1992-тӥ арысен лыдӟись доры «Ӟечбур!» нимын вуиз. Редакторез — Владимир Возняков — Россиысь Писательёслэн союззылэн ёзчиез. 2000-тӥ арын Возняковез воштӥз Надежда Лопатина. Выль кивалтӥсь «Ӟечбуре!» выль шӧм пыӵатыны быгатӥз, лыдӟисьёсыныз кусыпъёссэ эшшо но юнматӥз.