Пуштросэз вылэ выжоно

Удмурт автономной областьлэн революционной комитетэз

Википедиысь материал
ВАО-лэн революционной комитетэз» бамысь кудланьтэмын)
Удмурт ревкомлэн юртэз Глаз карын

Удмурт автономной областьлэн революционной комитетэз (Удмурт облревком) — Удмурт автономиен огвакытлы кивалтӥсь кун орган. Кылдытэмын 1921-тӥ арын 5-тӥ толшоре ВЦИК-лэн декретэзъя. Ужаны кутскиз 9-тӥ тулыспалысен. Интыяськиз со Глаз карысь Столбов вузчилэн коркаяз.

Революционной комитетлэн тӧроез луиз Иосиф Наговицын. Со сяна нырысь удмурт правительствое озьы ик пыризы Трокай Борисов, Степан Барышников но Н. Ф. Шутов.

Ревком кивалтӥз политикаын, калык хозяйствоын, социально-культурной но национальной удысын лэсьтӥськонэн, шаерысь ужъюртъёслэн радъяськеменызы но ужаменызы. Ревкомлэн одӥгез валтӥсез ужпумез луиз удмурт шаерысь советъёслэсь нырысетӥ съездзэс дасян. Та съезд 1921-тӥ арын пӧсьтолэзе люкаськиз но 20-тӥ пӧсьтолэзе Удмурт автономной областьлы исполнительной комитетэз (облисполкомез) бырйиз. Таин валче облревком быдтэмын вал.

И. А. Наговицын — Удмурт ревкомлэн тӧроез

Удмурт облревкомлэн таӵе структураез вал:

  • калыкез дышетонъя отдел (облоно);
  • социальной обеспечения отдел (облсобес);
  • юстицияя отдел;
  • герӟетъя отдел;
  • музъем ужпум отдел;
  • тазалыкез утёнъя отдел (облздравотдел);
  • ужъя но производствоя отдел;
  • кивалтон отдел;
  • сиён-юон ужпум комитет (облпродком);
  • облфинотдел;
  • статистикая бюро;
  • экономикая кенеш;
  • административной комиссия.
  • Удмурт Элькун: Энциклопедия / гл. ред. В. В. Туганаев. — 2-е изд., испр. и доп. — Ижевск : Удмуртия, 2008. — С. 570, 717. — 2200 экз.