Викиавтор:Юлиандор

Васи́лий Ива́нович Ала́тырев (1908—1984) — тодмо удмурт кылчи, удмурт но финн-угор кылъёсъя тодосчи, филология наукаосъя кандидат (1937), доцент (1938), УАССР-ысь наука удысысь дано ужась, Финн-угор калыкъёслэн мерлыкезлэн ёзчиез (1968). Вордӥськиз 1-тӥ гудырикошконэ 1908-тӥ арын Татарстанысь Бавлы ёросысь Покровской Урустамак черкогуртын, кресьян семьяын. 1934-тӥ арын йылпумъяз Ленинградысь педагогикая кун институтэз. 1936-тӥ - 1937-тӥ аръёсы ужаз СССР-ысь Кылъёсъя институтлэн Ленинградысь ёзаз. 1937-тӥ - 1944-тӥ аръёсы Карело-финнской университетысь ӟуч кылъя кафедраен кивалтӥз. 1955-тӥ - 1980-тӥ аръёсы УдНИИ-ысь удмурт кылъя сектореныз валтӥз. Диссертация ужез (1937) сӥземын вал определительной сложной удмурт кылъёслы. Василий Иванович глаголъёслэн системаязы усьтӥз притворностья, фиктивностья категориосты. Тодосчиосты паймытӥз выль яркыт усьтонэныз: кылъёс кылдо, кыллэн кылвыжыяз гласной букваос вошъясько ке. Василий Алатырев - наукалы сӥзем 160 ужлэн авторез луэ. Со ужъёс ваньмыз сямен сӥземын грамматикалы, кылъёслэн кылдэмзылы, удмуртъёслэн но карелъёслэн этногеззылы. Уката тунсыко луэ удмурт письменностьлэн историезлы сӥзем ужъёсыз.