Викиавтор:Wadorgurt/Альберт Разинлэн ассэ сутэмез

Википедиысь материал
Перейти к навигации Перейти к поиску

Альберт Разинлэн ассэ сутэмез — 2019-тӥ арын куарусён толэзьлэн 10-тӥ нуналаз Иж кар шорын ортчем пумитъяськон акция — типшар (тушмонлэн син азяз ассэ ачиз быдтон). Огшоры пикет кадь кутскыса, со шимес учырен йылпумъяськиз: пикет ортчытӥсь адями ассэ ачиз ӝуатӥз но ӝоген больницаын кулӥз. Со адями вал Альберт Разин — тодмо удмурт тодосчи но мерлыко ужась, удмуртлык сярысь сюлмаськись мурт. Солэн пикетэз сӥземын вал удмурт кылэз но этносэз утёнлы.

Акция луиз, вылды, тужгес но шӧдскымонэз удмурт пумитъяськон ужрад берло сю аръёсы. Та учыр зуркатӥз удмурт шаерез гинэ ӧвӧл, быдэс Россиез но. Солэсь кылдэм резонанс кунгож сьӧры но потӥз (нырысь ик, финн-угор кунъёсы).

Ужрадлэн мынэмез[Тупатыны | вики-текстэз тупатыны]

Кӧня ке нунал кулэмезлэсь азьло Альберт Разин ас эшъёсызлы телефон пыр жингыртэм но солэн Кун Кенеш вӧзын пикет радъянэзлы юрттыны соосыз ӧтем. Пикетсэ ортчытон понна со пуксённуналэз, 10-тӥ куарусёнэз быръем, таизлы нуналлы ик Кун Кенешлэсь сессизэ усьтон чакламын вал угось.

Пуксённуналэ, шуныт, шундыё сентябрь ӵукна 79 аресъем тодосчи но эшъёсыз, кудъёсыз пӧлын Андрей (Ондӥ) Перевозчиков но Пётр Тимошкин вал, Ижысь Карлуд площадьын люкаськизы. Разин Кун Кенешлэн юрт азяз кык плакатэн потӥз. Одӥгаз ӟуч сямен гожтэмын вал «Вань-а мынам Отечествое?», мукетаз лыдӟисько вал авар поэтлэн Расул Гамзатовлэн кылбурысьтыз чуръёс: «Ӵуказе анай кылы быриз ке, мон туннэ ик кулыны дась!». Кызьы собере эшъёсыз веразы, тодосчилэн машинаяз эшшо одӥг плакат, пӧй, шедьтэмын вылэм — «Бречалов, кошкы!»[1].

Нырысь-валысь ужрад лап-лап мынэ вал. Депутатъёс, сессие мыныкузы, пикетын сылӥсь адямиен ӟечбураськылӥзы — тросэз сое тодӥллям. Разинлэн эшъёсыз, пикетэ пыриськытэк, отын ик, тодосчилэсь озёлонгес сылӥллям. Огзылы, Андрей Перевозчиковлы, Разин ужрад пумын интервью сётӥз.

Пикет йылпумъяку, Разин таманлы кошкиз. Собере солэсь «Рено Логанзэ», кудӥныз тодосчи ужрадэ вуиз, шедьтозы коркаезлэн пырон интыез вӧзын — Разин Кун Кенешлэсь кыдёкын ик ӧз улы. Машиназэ кельтыса, активист парламент доры берытскиз. Табере со дӥсяськемын вал синтепон пуховикен но изьыен, солэн ымнырыз шарфен бинялтэмын вал — Перевозчиков сое ӧз тодма вылэм.

Тодосчи зажигалкаез аслыз матэ вуттӥз но ури-бери гомӟиз. Ужез валаса, Перевозчиков со вылысь дӥсьсэ уськытыны оскалтӥз, нош Разин ас бордысьтыз сое донгиз. Тылэн копак басьтэм со, погрантэм кариськыса, чал-чал сылӥз но ӝуаз — солэн ымдурысьтыз нокыӵе куара но ӧз кылӥськы[2].

Тылэз кысэм бере сутскем Разинэз вайизы 1-тӥ Республиканской больницае. Отын со ог 14:30 часын кулӥз.

Разинлэн шара гожтэтэз[Тупатыны | вики-текстэз тупатыны]

Ас пикетсэ ортчытонлэсь 3 арня азьвыл тодосчи тямыс бам быдӟа гожтэтэз гожтэм. Со адресамын вал Кун Кенешлэн депутатъёсызлы. «Удмурт этнос быре» кылъёсын йыръям шара гожтэтын Разин курласа куштӥз Удмуртиын ортчытӥськись йӧскалык политикаез но Россилэсь анай кылъёс дышетон ласянь политиказэ. Озьы ик со гожтэ удмуртлэн аслаз шаераз кузё луымтэез сярысь: удмурт шаерлэн вылӥ кивалтӥсьёсыз пӧлын (республикалэн но парламентэзлэн тӧрооссы, премьер-министр но солэн воштӥсьёсыз) соку одӥгез но удмурт ӧй вал. Бадӟым саклык гожтэтын висъямын вал удмурт калыклэн ӝог ӟучомонэзлы но культуразэ утёнэн герӟаськем ужпумъёслы. Тодосчилэн вазиськонэз йылпумъяське властьёслы куронъёс пуктонэн. Со пӧлысь куд-огез:

  • удмурт кылэз вань школаосын но нылпи садъёсын одно ик дышетоно;
  • Удмуртиысь октӥськылӥсь вытъёслэсь куиньмоссэ гинэ люкетсэс Муское келяно;
  • Ижкарын урамъёслэсь нимъёссэс ӟуч но удмурт кылъёсын гожъяно;
  • удмурт кылын 24 часъем радио- но телевещаниез радъяно;
  • Трокай Борисовез пырак азелы вунэтонтэм кароно;
  • архитектуралы йӧскалык колорит сётоно;
  • Ижысь Шор площадьын но мукет интыосын удмурт кылын гожтэм лозунгъёсты ошоно;
  • чиновникъёслэсь удмурт сямен вераськыны быгатонлыксэс экзаменъёсын эскерылоно;
  • калыклэн ваньбурез луись удмурт нефтез национализировать кароно но Удмуртиысь правительство кивалтэм улсы сётоно.
  • удмурт гуртэз улӟытон понна чутрак ужрадъёс кутоно[3].

Люкиськон церемони[Тупатыны | вики-текстэз тупатыны]

Альберт Разинэн люкиськонъя ужрад ортчиз 12-тӥ куарусёнэ Удмурт кун йӧскалык театрын. Церемоние ветлӥз сюрс пала адями, таин ӵош мукет республикаосысь куд-ог муртъёс, кылсярысь чуваш но пор активистъёс, Ижкаре вуыны ӧз быгатэ[4]. Ужрадэ лыктэм куноос пӧлын адӟемын вал культурая министр Владимир Соловьёв, национальной политикая министр Лариса Буранова, Иж кар думалэн тӧроез Олег Гарин. Элькун тӧро Александр Бречалов ӧз лыкты. Ужрад уногес удмурт кылын мынӥз.

Церемони йылпумъяськем бере тодосчилэн мугорыз солэн сӥзем-косэмезъя кремаци понна Екатеринбург городэ вуттэмын вал. Собере Разинлэсь пеньзэ вордскем гуртаз, Кузьымгуртэ, нуизы но гурт вӧзысь гурезь вылын сое тӧлӟытӥзы.

Реакция[Тупатыны | вики-текстэз тупатыны]

Удмуртилэн тӧроез Александр Бречалов, та шимес учырлы комментарий сётыку, куректэмзэ вераз Разинлэн матысь адямиосызлы но «спекулировать карымтэез» куриз[5]:

Ивортодэт вӧлмытӥсьёсты но огшоры калыкез йӧслык ужпумъёс пумысен спекулировать каронлэсь возиськыны курисько, малы ке шуоно удмурт кыл, лулчеберет, история, дунлыкъёс пумысен Удмуртилэн кивалтэтэныз ортчытӥськись политика котьма ласянь юрттэт сётыны гинэ ӧръямын

Россиысь президент бордын ужась Граждан мерлыкез азинтонъя но адямилэн правоосызъя кенешлэн ёзчиез но Йӧслык кусыпъёсъя кенешлэн ёзчиез Александр Брод Разинэн ортчытэм акциез «провокация» шуиз[6]:

Берло дыре сыӵе чутрак акциос ӧй вал, соослы мугъёс но ӧвӧл. Со кинэн ке юри малпаса лэсьтэм провокация луыны быгатэ

Удмуртиысь национальной политикая министр Лариса Буранова вераз, луэм учырлэсь ньӧмъёссэ уг вала шуыса:

Мон понна со валантэм. Туж вӧсь. Ми ваньмы, кин сое умой тодэ вал, али валаны тыршиськомы, мар солы сыӵе мылкыд сётӥз, мар ӝутӥз сое сыӵе вамыш лэсьтыны

«Удмуртлык» огинлэн проектъёсыныз кивалтӥсь Алексей Шкляев улэпкын ӝуам удмурт активист пумысь тазьы вераз[7]:

Альберт Алексеевич Разин — одӥгез тужгес принципиальноез удмурт активист, кудӥз удмурт калыклэн правоосыз понна сылӥз. <…>

Со трос пол вазиськылӥз шонерак но «Удмурт Кенешлэн» тӧроезлы Татьяна Ишматовалы. Нош котькытын отпискаос гинэ шедьтылӥз. Солы гожъязы, ваньмыз ужанын, ваньмыз планъя мынэ шуыса. Гожтэтъёсызлэн берпуметӥ темаоссы пӧлысь одӥгез — со удмурт кылэз школаосын дышетон. Берло дыре со, «Удмурт Кенеш» борды йылтэм карыса, кӧня ке удмурт организациос кылдытӥз, кылсярысь, солэн вал проектэз «Удмурт тӧроослэн кенешсы». Нош соос пушкын туж радлы уж ӧз нуиськы, соос тодмоесь ӧй вал.

Со вал гуманист но, солэсь но ортчыт, ми соин та виын вераськыку, со ассэ интернационалист шуылӥз но со сюлмаськиз калыкъёслэн трос йӧслыкен эшъяськонзы понна. Со вераз, пикетэ потоз шуыса, нош нокин но ӧз малпа, со сыӵе амалъя ортчоз шуыса. Мон лыдъясько тае чигтӥськон жестэн удмурт калыклэсь проблемаоссэ санэ басьтытэк кельтонэн сэрен но та проблемаосты быдэсак ӧвӧлтэматон луэмен.

Блоггер Лукерья Шихова, удмуртъёслы вазиськыса, гожтӥз[8]:

Тросэз уг валало, кызьы аслэсьтыд улондэ кыӵе ке удмурт кыл понна сётод меда. Бен, асьме осконамы тужгес но уродэз — со ачид аслэсьтыд улондэ быдтон. Но… Альберт Алексеевичлэн осконаз тужгес но уродэз та улонын — со удмурт кыллэн быремез…

Нош кин ке малпа ке, кызьы таре мукет адямиос удмуртъёс шоры учкозы, кыӵе возьыт, ма́лпаське кӧня ке, малы тӥ озьы малпаськоды? Кыӵе борддоръёс яке ярдуръёс тӥ асьтэ йырады пуктылӥды, малпанды вӧл-вӧл но жиль-жиль бызьыса кошкыны уг ке быгаты? Малпаське.

Мон кӧня ке тодӥсько вал Альберт Алексеевичез. Тодӥсько кӧня со удмурт кыл понна лэсьтыны вуиз! Шонер, дыр, соос, кин сое Кузебай Гердэн одӥг радэ пуктӥз. Эн малпалэ, кызьы быриз, малпалэ, мар со лэсьтӥз. Гажалэ асьтэдыз, удмурт кылэз но удмурт кылмес утисьёсты.

Кунгож сьӧрысь реакция[Тупатыны | вики-текстэз тупатыны]

Эстон парламентлэн тӧроез Хенн Пыллуаас таӵе комментариез сётӥз:[9]

Туж жаль, Россиысь ӵыжы-выжы калыкъёсмы анай кыллы право понна тазьы сылытэмын шуыса. 2020-тӥ арын эстон Тартуын ортчоз Дуннеысь финн-угор калыкъёслэн конгрессы, кытын, веранэз ӧвӧл, кыл ужпумъёс ӟеч-ӟеч эскеремын луозы. Финн-угор калыкъёслэн кыл ласянь ужпумъёссы, одно ик, кулэесь ӧтчамын. Та конкретной учыр кенешонъёс дыръя одӥгез тема луоз. Ми эшшо огпол вераськом куректэммес ӵыжы-выжыослы но матысь адямиослы.

12-тӥ куарусёнэ эрикез утись калыккуспо огазеяськон «Human Rights Watch» Разинлэн быременыз валче англи но ӟуч кылъёсын нимаз заявлениез поттӥз — «Self-Immolation Highlights Controversy over Cultural Rights in Russia» («Ассэ ачиз сутон Россиын культурной правоос ласянь тупамтэосты нимысьтыз висъя»).

Валэктонъёс[Тупатыны | вики-текстэз тупатыны]

  1. Нигматуллин, Айрат (2019-09-13) «Для нас это национальная трагедия, а представителей власти на панихиде было мало»(ӟуч) Бизнес Online.
  2. Последний аргумент в длинном споре(ӟуч) Meduza (2019-09-19).
  3. Альберт Разинлэн депутатъёслы вазиськонэз(ӟуч)
  4. Кондратьева, Элла (2019-09-12) Чувашские и марийские активисты не смогли попасть на прощание с Альбертом Разиным(ӟуч) Idel.Реалии.
  5. Тихонова, Анжелика (2019-09-11) Александр Бречалов: тодосчиен Альберт Разинэн луэм шимес учыр - бадӟым куректон ИА «Удмуртия».
  6. Удмуртиысь Кун Кенеш дорын луэм шимучырез Адямилэн эрикрадъёсызъя кенешлэн ёзчиез чакла ИА «Удмуртия» (2019-09-10).
  7. Алексей Шкляев: «Альберт Разин отстаивал права удмуртского народа»(ӟуч) ИА «Udm-info» (2019-09-10).
  8. vk.com/wall-644235_46036 Vk.com (2019-09-12).
  9. Алпаут, Рамазан (2019-09-11) Спикер парламента Эстонии: "Очень жаль, что наши родственные народы в России должны таким образом отстаивать право на родной язык"(ӟуч) Idel.Реалии.

Чӧлсконъёс[Тупатыны | вики-текстэз тупатыны]