Иворъёс:2007-11-03

Википедиысь материал
03.11.2007

Стас Корепановез буре ваён ужрад

Ижын нош ик тодэ вайыто 2007 аре 31 мартэ вием Стас Корепановез. Кар транспортлэн дугдылон интыосаз лякемын вал Стаслэн бырем интыяз лыктыны но отын солы сӥзем буре ваён ужрад ортчытыны ӧтись листовкаос. Шуг вераны, уно-а адями люкаськоз таӵе ужрадэ: нырысетӥез, со листовкаез адӟем-лыдӟемъёсыз пӧлысь тросэзлы зорись сӥзьыл кезьыт куазен эстэм коркаын пукыны умойгес потоз ни, дыр; кыкетӥез, обществоын та шудтэм учыр пумысен пӧртэмесь малпанъёс но дунъетъёс вань на.

Куд-огез соглаш луэ масс-медиалэн туж дыртыса но туж паськыт вӧлмытэм версиеныз: егит Стасэз, пе, изьвер сямен жугыса вииллям кышкытэсь «фашистъёс» но «скинхедъёс»; кудӥз-огез нош официальной версиен соглашгес кариське — Стасэз виемъёсты, пе, нокыӵе «скинхедъёс» пӧлысь ӧвӧл, нош огшоры йыртэмасьёс-хулиганъёс пӧлысь утчаны кулэ, пе; тросэз адямиос нош «ӟуч скинхедъёс-фашистъёс» сярысь иворъёсты ӟучъёсты адӟемпотостэм карись кужымъёслэн провокациенызы лыдъяло; тужгес чакласькисьёсыз нош уг дырто та уж пумысен берпуметӥзэ кылэз вераны: оло, Удмуртиын зэмзэ но кыӵе ке профашист кужымъёс вань, но соослэн-а та ужзы вал, соиз ини рос-прос тодмо ӧвӧл; мукет ласянь ке учконо, «правоосты утисьёслэн» прессазылэсь позицизэ но котьма ласянь объективной шуыса ниманы шуг. Оло, уно аръёс ортчыса гинэ асьмеос тодом та виро ужез дасям адямиослэсь нимъёссэс но шудэм рольёссэс.