Drei Kameraden

«Куинь эшъёс» (нем. Drei Kameraden) — Эрих Мария Ремарклэн романэз, со бордын ужаны автор кутскиз 1932-тӥ арын. Йылпумъямез бере 1936-тӥ арын «Kammerater» нимын печатлаз сое Даниысь Gyldendal книгапоттонниын. Ӟуч кылэ роман берыктэмын 1958-тӥ арын. 

Пуштросэз   

Действие ортче Германиын 1928-тӥ ар котырын.

Куинь эшъёслэн — Роберт Локамплэн (Робби), Отто Кестерлэн но Готтфрид Ленцлэн - вань асьсэлэн пичияк автомастерскойзы. Валтӥсь герой - Робби автомеханик - тодматскиз Патриция Хольманэн (Пат). Робби но Пат — пӧртэм улон сюресъёсын адямиос - яратӥзы ог-огзэс. Романын возьматэмын соослэн кусыпъёссы секыт аръёсы. 

Проблематикаез

Роман азинтэ "ыштэм поколенилэсь" темазэ. Ожез пырпотэм адямиос уг быгато пегӟыны вуж тодэ ваёнъёссылэсь, соос курадӟыто валтӥсь героез но. Сютэм аръёс сӧризы тазалыксэ яратоно нылкышноезлэсь. Но ӵапак ож аръёс герӟазы куинь эшъёсыз: Роберт Локампез, Отто Кестерез но Готтфрид Ленцез. Котькытын соосты кулон возьмаз ке но, соос яратӥзы улонэз.

Геройёс 

Валтӥсь геройёс

• Роберт Локамп (Робби) — романысь валтӥсь герой, солы ог 30 арес. Патриция Хольманлэн (Пат) яратонэз. Готтфрид Ленцлэн но Отто Кестерлэн эшсы. Пыриськиз Нырысетӥ дунневыл оже.

• Отто Кестер — огез валтӥсь геройёс пӧлысь. Озьы ик ог 30 аресъем. Ож дыръя - лётчик, нош романын со автомастерскойлэн кивалтӥсез луэ, ӵапак отын ужазы валтӥсь геройёс. Отто яратэ машинаен ворттылыны, «Карл» машинаен  вожвылъяськонъёсы пыриське но кӧня ке пол вормылэ. Озьы ик выре боксэн.

• Готтфрид Ленц — романысь одӥгез валтӥсь герой, Оттолэн но Робертлэн огъёззы. Армие ветлӥз, дуннеез трос котыръяз. Кестерен но Локампен ӵош ужа автомастерскойын. Капчи мылкыдо, вераськись, адямиосын тупась. Калык пӧлын висъяськиз куро выллем йырсиеныз. Эшъёсыз сое берпуметӥ, "бумага" романтик шуылӥзы.  

• Патриция Хольман (Пат) — валтӥсь геройлэн яратоно кышномуртэз. Соослэн яратонзылэн историез романысь валтӥсь люкетсэ басьтэ.

  Мукет геройёс 

• Альфонс — Ленцлэн умой эшез, юон интылэн кузёез. Яратэ жугиськыны но хорлэсь кырӟамзэ кылзыны. 
• Валентин Гаузер — Робертлэн ож эшез. Секытэн ортчиз ожез. фронтысь берытскемез бере шумпотӥз котькуд минутэзлы но туж трос юиз.
• Жаффе — Патрицилэн эмъясез.
• Матильда — автомастерскойын утялтӥськись, яратэ юылыны.
  
• Роза  — проститутка. Солэн нылыз вань, но Роза сое нылпи юртэ сётоно луиз, озьы ке но уг дугды со сярысь сюлмаськемысь но чакламысь. 
• Хассе кузпалъёс — коньдонзы ӧвӧллы луыса ялан керетӥсь семья. Одӥг нуналэ соос люкисько, собере картэз ачиз ассэ быдтэ. 
• Фердинанд Грау — суредась, умой коньдон басьтэ, кулэмъёслэсь портретъёссэс туспуктэмъёсъя гожъяса. 
• фрау Залевски — пансионатлэн, кудаз Роберт Локамп улӥз, кузёез. 
• Юпп — автомастерскойысь мальчик-подмастерье. 
• Эрна Берниг - секретарь. Улэ фрау Залевскилэн пансионатаз.
• Георг Блок - куанер студент.

Экранизациез 

• 1938 — «Three Comrades» («Куинь эшъёс») фильм, режиссёрез Френк Борзейга (США).
• 1998 — «Вормисьёслэсь сяськаос» фильм. Режиссёрез Александр Сурин. Действие выжтэмын Россие, 1990-тӥ аръёсы.
  
• 1999 — спектакль, Галина Волчеклэн пуктэмез. «Современник» театр.
• 2012 — «Куинь эшъёс» мини-сериал — Тигран Кеосаян режиссёрлэн фильмез. Пыкиське роман вылэ, но пуштросэз зол воштэмын.