Трир

Трир (нем. Trier, лат. Augusta Treverorum) — «Уйпал Рим», Германияысь вашкалаез кар. Кылдытэмын асьме эралэсь азьло 15-ти даурын Октавиан Август рим императорен треверъёслэн племязылэн восяськон интызы возын, со бордысь ик карлэн нимыз — «Августа Треверская». Кар интыяське Рейнланд-Пфальц федерал музъемлэн шундыпуксён палаз.

Городын трос чебер, синмаськымон интыосыз. Нырысь ик, со Порта Нигра (Porta Nigra) - «Сьод капкаос». Азьвыл солэн кольыосыз югытэсь вылиллям, но дыр ортчемъя, толэн но жобаськись куазен сэрен сьодэктиллям. Капкалэн пасьталаез - 36 метр, жуждалаез - 30 метр, нош мурдалаез - 21,5 метр. Шундыпуксён Рим империялэсь кылем капкос полысь Порта Нигра тужгес бадзымез но умой возиськемез. Ас вакытаз со пушкын таможня интыяськем.

Туж чебер но узыр адске Трир собор но со возысь нылкышноослэн монастырьзы - Либфрауэнкирхе. Соборез утён вылысь портэм ужъёс нуисько. Пушказ пыраны уг лэзё. Собор 320-ти арын Дунчылкыт Агриций Трирскиен пуктэмын вылэм, та ужез солы быдэстыны косэм Константин император.

Константин Великиен 310-ти арын пуктэм базилика туннэ но, куке восяськон инты быдэсак выльдэмын, кыске бордаз огшорыеныз. Укноосаз азьвыл суредъёсыз ик кылемын на. XII даурысен отын епископлэн дворецез интыяськем. Пулэсь лэсьтэм волдэтэз лыдэ басьтытэк, базиликаын нокыче чеберъянъёсыз овол.

Рим выж вылти туннэ но сюрес ортче, нош пуктэмын ни со Порта Нигралэн даураз. Рим калыкъёс пуктиллям - со бордысен ик нимыз.

Городысь история синпелетъёс ЮНЕСКО-ен утисько.

Трир тодмо луэ на, Карл Маркслэн вордиськем интыез шуыса.