Жуйков, Семён Прокопьевич

Википедиысь материал
(Ыстэмын «Семён Жуйков» бамысь)
Перейти к навигации Перейти к поиску
Семён Прокопьевич Жуйков
Ужъёсыз:

кылчи

Вордӥськон нуналэз:

1891(1891)

Вордӥськон интыез:

Пусошур гурт, Глаз утем, Ватка губерния

Кулон нуналэз:

1967(1967)

Семён Прокопьевич Жуйков — удмурт кылтодосчи, доцент, удмурт но ӟуч кылъёслы дышетскон книгаослэн, удмурт-ӟуч но удмурт орфографияя нырысетӥ кыллюкамъёслэн, шонер гожъяськон индылэтъёслэн авторзы, Удмурт педагогияя институтысь удмурт кыл но литература кафедралэн нырысетӥ кивалтӥсез.

С. П. Жуйков вордӥськиз 1891-тӥ арын тулыспал толэзьлэн 2-тӥ нуналаз азьло Вятка губерниысь Глазов уездысь Ягошур волостьысь Пусошур гуртын куанер удмурт крестьян семьяын. Тодмо учёной но дышетӥсь луэмезлэсь азьло со трос шуг-секытъёсыз адӟем: узыръёслы ужано но луылӥз, Волгаын бурлак но вылэм, извозын Сибыр сюрес кузя но уно пол ортчылэм, вуылэм Украинае но Польшае. Отын но огаз монастырьын медо луыса ужам. Гожтэтлы кызьы но озьы дышетскемез бере, 1912-1917-тӥ аръёсы, Кизнер ёросысь Асинер гуртысь земской школаын дышетӥсь луыса ужам. Бугырес ожмаськон аръёсы армиын вылэм. 1919-1921-тӥ аръёсы дышетскем Вяткаысь Ленин нимо педагоги институтын. Отын дышетскыкуз, огдыре ужам Вяткаысь калыкез дышетон люкетлэн инструкторез луыса. Педагоги институтэз йылпумъямез бере сое Глазовысь педагоги техникуме ужаны ыстӥллям (1921—1925 аръёс), нош 1925-1929-тӥ аръёсы сое Ижысь педагоги техникуме выжтӥллям. 1929-тӥ арын со дышетскыны пыре СССР-ысь Наукаосъя академилэн Ленинградысь Кыл но малпан институтэзлэн аспирантураяз. Солэн наука ласянь кивалтӥсез вылэм со вакытэ туж тодмо но сӥё-дано кылтодосчи, академик Н. Я. Марр.

Аслаз дышетскисьёсыз пӧлысь С. Жуйковез со нимысьтыз висъяса вера вылэм, одӥгез визьмоез аспирант луэ шуыса. Соин но, оло, С. Жуйков Н. Маррлэн кылъёсты дышетон аспӧртэмлыко методологиезлэсь ӧз куштӥськы — удмурт кыл удысын вань ужъёссэ кылдытъяз дышетӥсезлэн ӵектэм «Кыл сярысь выль дышетон» шуон методэзъя.

Семён Жуйков трос кылъёсты тодэ вылэм: поляк, немец, англи, удмурт, коми, финн, бигер, башкир, казах, узбек но ӟуч.

Аспирантураез йылпумъямез бере сое ужаны ыстӥллям соку гинэ кылдытэм Удмурт педагогия институтэ, удмурт кыл но литература кафедралы кивалтӥсь карыса. Огдыре ик со ужам на 1931-тӥ арын кылдытэм Удмурт наука-эскерон институтын (УдНИИ-ын) но. Удмуртиын 6 ар ужатозяз, со 47 тодос ужъёс, школаослы, педагогияя институтлы но техникумъёслы пӧртэм программаос но методика валэктӥсь книгаос (пособиос), учебникъёс гожтэм, удмурт-ӟуч но удмурт орфографияя кыллюкамъёс, шонер гожъяськон правилоос дасям но соосты печатласа поттэм, студентъёслэн юрттэменызы печатлам удмурт диалектологияя, этнографияс но Удмуртилэн экономикаезлы сӥзем картаос, трос пол потам тодосо экспедициосы.

Куамынэтӥ аръёсы, массовой репрессиос дыръя, С. Жуйковлэн туж азинлыко мынӥсь ужез уриськем: йыр вадьсаз сьӧд пилемъёслэсь вотсаськыны кутскемзэс шӧдыса, Семён Жуйков Удмуртиысь лушкемак гинэ воксёлы кошконо луэм. Нырысь-валысь со ужам Шор Азиысь вылӥ дышетсконниосын: Алма-Атаысь Казах кун университетын, Семипалатинскысь кун педагогияя институтын, бӧрысьгес — Ульяновск улосысь Мелеккес педагогия институтын но Воронеж улосысь Россошанск дышетӥсьёслэн институтазы. Республикаысьтымы кошкемез бере удмурт кыллы сӟзем ужъёсыз ӧз ни поталэ, тросгес дырзэ висъяз, вылды, ӟуч кылэз но солэсь пӧртэм диалектъёссэ дышетонлы. Л. С. Христолюбовалэн гожъямезъя, со пыр-поч эскерем Ульяновск улосысь Николо-Черемшанск ёросысь ӟучъёслэсь говоръёссэс но Донысь диалектъёсты.