Широбоков, Степан Павлович

Википедиысь материал
(Ыстэмын «Степан Павлович Широбоков» бамысь)
Перейти к навигации Перейти к поиску
Степан Павлович Широбоков
Портрет
Ужъёсыз:

писатель[d] но кылбурчи[d]

Вордӥськон нуналэз:

5‑тӥ (18-тӥ) толсуре 1912

Вордӥськон интыез:

Шаркан ёрос, Россия

Кулон нуналэз:

1983[1]

Кулон интыез:

Иж, Удмурт Автономной Совет Социалист Республика, РСФСР, СССР

Степан Павлович Широбоков — Удмуртиысь калык гожъясь — вордиськиз 18-тӥ толсуре 1912-тӥ арын Шаркан ёросысь Вортча Починка (Малый Казес) гуртын куанер крестьян семьяын.

Биография[Тупатыны | вики-текстэз тупатыны]

Трос аръёс ӵоже улэ Дэбесын. 1928-тӥ арын Можга педтехникуме дышетскыны пыре. Бератазгес, 1930-тӥ арын, Дэбес педтехникуме дышетскыны выже. Сое йылпумъяса, 1937-тӥ арозь школаын ужа. 1937-тӥ арысен Ижкарысь учительской институтысь естественно-географической факультетаз дышетске. Дэбес ёросысь Тольёнской 7 классъем школаын географиен но биологиен дышетӥсь луыса ужа.

1939-тӥ арын Финской войнае ожмаськыны кошке, 1942-тӥ арысен — Быдӟым Атыкай ожмаськонэ. Отын со шофёр луэ. Быдӟым Атыкай оже кошкемезлэсь азьло, кӧня ке дыр ӵоже председатель луыса ужа. Фронтысь бертэм бераз, инспектор, Дэбесысь РОНО-ын заведующий, «Советской Удмуртия» газетын, Удмуртия издательствоын редактор луыса ужа. 1978-тӥ арысен Ижкаре улыны выже.

Ожысь бертэм бераз ик, Степан Павлович кышнояське. Но семья улонэз солэн ӧз радъяськы. Нырысетӥ кузпалыныз люкиське. Кыкетӥ кышноеныз шудо улэ: трос гожъяське, улыса-вылыса калык кылбурчи — котькинлы тодмо адями — луэ. 1951 арысен со — Гожъяськисьёслэн Огазеяськонзылэн ёзчиез.

Творчество[Тупатыны | вики-текстэз тупатыны]

Степан Широбоковлэн нырысетӥ кылбуръёсыз 1930-тӥ арын «Гудыри» газетын печатласько. Нош 1945-тӥ арын солэн нырысетӥ кылбур бичетэз потэ, кудӥз нимаське «Ожмаськон лудын», ар улыса — «Кык вынъёс» поэмаез. Степан Широбоковлэн кылбуретаз, вань мукет лирикъёслэн сямен ик, ог-выллем темаос пумисько: ас шаердэ, пичи родинадэ данъян, яратон, шудо улон, шумпотон но инкуазез котыр ласянь чеберен, яркыт буёлэн суредан. Солэсь гожъяськонзэ куинь люкетлы висъяны луоз: граждан лирика, ожмаськон лирика но яратон лирика.

Гражданской лирикаяз бадӟым инты басьтэ шудо улонэз возьматон, шудо улонлы оскон. Мукет сямен вераса, синмаль дунне кузёяське («Кемалась малпанъёс» сборник). Ваньмыз со таӵе образъёс пыр возьматӥське: йылтэм-пумтэм ю-нянен гыась бусы, бадӟым вож нюлэс, паськытэсь вольытэсь сюресъёс, тулыс, ӵукна, ошмес. Ӵем дыръя бусы но ӵукна образ пумиське, тужгес но со тулыс ӵукна. Инкуазез суредакуз Степан Широбоков — поэт-созерцатель. Поэт инкуазьлэсь чеберзэ адӟе, солэн пачылме чеберен мылкыдыз. Тужгес но яркыт луэ та ласянь «Россия» кылбур:

Тонэ лымы-а шобыртэ,
Лудын тудву-а куашетэ,
Ю-нянь-а веттаське, шудэ,
Сӥзьыл нюлэс-а льӧлектэ -
Россия, котьку тон чебер!
Россия — вордӥськем шаер!

Ож лирикаысьтыз кылбуръёсыз верало, солэн лирической героез зэмос патриот шуыса. Та кылбуръёсысьтыз вань кылъёсаз пыӵамын тушмонлы пунэмзэ берыктонэн. Валтӥсь лирической героез — солдат, кудӥз ялан тодаз вае вордӥськем шаерзэ, яратоно нылзэ. Вордӥськем шаерез но яратоно адямиез солы юртто, ожмаськыны кужым сёто кадь. Ож бырем бере Степан Широбоков войналы сӥзем кылбуръёс ӧз ни гожъя.

Яратонлы сӥзем тема Степан Широбоковлэн творчествояз нимысьтыз инты басьтэ. Вань кылбуръёсаз сямен нылкышнолы яратонэз юн герӟаськемын инкуазен, со люконтэм ас шаередлы яратонлэсь. Степан Широбоковлэн гожъяськоназ яратон — со шумпотон но, куректон но, ватэм яратон, яратоно нылыныд данъяськон. Лирической герой ас гажанзэ яратэ ужамез понна. Ӵемысь кык яратӥсь муртъёс ужын пумисько.

Яратонлы сӥзем кылбуръёсаз вань сыӵеосыз, кудъёсыз гожтэмын нылмуртлэн синмыныз. Степан Широбоков таӵе шом удмурт литературае нырысьсэ пыртӥз. «Ӧй быгаты вунэтыны» кылбураз со туж умой адӟиське.

Кырбуръёсыз капчи мылкыдоесь, кырӟанлы матынэсь луэмзы понна, ачиз но кылбуръёссэ вольыт, учы кадь лыдӟемез понна, Степан Широбоковез «удмурт учы» нимазы.

С. П. Широбоков ас удысаз бадӟым пытьы кельтӥз прозаын но, кылбуретын но, драматургиын но, нош тужгес но — калыклэн йырсазяз. Юнме ӧвӧл, Степан Широбоковлы нырысьсэ Удмуртиысь калык кылбурась дано ним сётэмын. (Надежда Никитина)

Валэктонъёс[Тупатыны | вики-текстэз тупатыны]

  1. Faceted Application of Subject Terminology