ГТРК «Удмуртия» (радио)

Википедиысь материал
(Ыстэмын «Удмурт радио» бамысь)
Перейти к навигации Перейти к поиску

ГТРК «Удмуртия» радиоУдмуртиысь тужгес кема ужась радиостанция. 1932-тӥ арын 5-тӥ ноябре ужаны кутскиз выль радиостанция. Диктор Василий Бутаев быдэс шаерлы кылымон ивортӥз удмурт кылын: "Кылзэлэ, кылзэлэ! Вераське Ижкар! Туннэ нуналысен ужаны кутске Удмурт радио!" Соку ик эфирын чузъяськиз удмурт кылын передача. Со луиз Удмурт радиолэн вордскем нуналыз. Нырысь студилы инты висъяськиз ӝутӥськись Связья юртын. Радио ужаны кутскем бере гуртъёсы вуыны кутскизы радиоточкаос. Быдӟым ож кутскон азьын шаерамы вал ини 28 сюрс радиоточка. Война аръёсы радиопередачаос «кошкылӥзы» телефон езъёс пыр. Нуналаз куинь пол гуртъёсын ужаны ӧдъяллязы радоточкаос - соос пыр сётъязы Совинформбюролэсь сводкаоссэ. Ож йылпумъяськем бере радио уката паськыт вӧлмыны кутскиз.

1958-тӥ арын нырысьсэ чузъяськиз "Между Волгой и Уралом" радиожурнал. Со вералляз артэ интыяськем 6 улосъёсысь иворъёсты.

1960-тӥ арын Ижын кутскизы лэсьтыны Радиолэсь юртсэ. Сое 5 ар куспын ӝутӥзы. Татын нимысьтыз проектъя лэсьтэмын студиос, вань куараез ӟеч гожтыны условиос - крезьгур гожтонъя залэ огвакытэ бадӟым коллектив тэрыны быгатылӥз. Со аръёсы люкаса кельтэмын удмурт кырӟанъёсын узыр архив. Жаляса верано луэ, берло 5 ар ӵоже та юрт буш сылэ. Али Удмурт радио но телевидение интыяськемын город пумысь телестудиын.

Озьы ке но ас вакытаз Удмурт радиоез кылзӥз быдэс республика. 1968-тӥ арын Балезино посёлокын пуктизы радио вӧлмытонъя передатчик. Соку Удмуртиысь 85 процентэз улӥсьёс УКВ частотаын кылзыны быгатӥзы Удмурт радиоез. Туннэ радио удысын тырше 50-лэсь ятыр мурт. Нуналлы быдэ 4, 5 час ӵоже эфир кыстӥське. Передачаос мыно удмурт но ӟуч кылын. Озьы ке но анай кылын передачаослы висъям дыр арысь аре ичигес луэ. Тодэ вайыны гинэ кыле на иворъёсын «Визыл» программаез, нылпиослы чаклам «Чагыр, чагыр, дыдыке» передачаез. Нош макем узыр пуштросоесь вал радиоочеркъёс. Туннэ соосты кылыны луэ архивысь гинэ. Радиолэн удмурт ёзаз ужазы но кылзӥсьёслэн сюлэмъёсазы кылизы Пимен Касаткин, Милитина Гаврилова, Галина Баженова, Иван Аркашев, Виктор Ивашкин.

1995-тӥ арын ГТРК радио борды кылдӥз крезьгурез вӧлмытӥсь нырысетӥ удмурт «Ингур» радио. Татын трос чузъяськизы кырӟанъёс, егитъёслы сӥзем передачаос, нимысьтыз дыр висъямын вал радиоконцертъёслы. Туннэ таиз ӟеч уж сярысь но тодэ вайыны гинэ кыле на.