Шунды масса

Шунды масса яке Шундылэн массаез — масса мертан внесистемной единица, кудзэ астрономиын уже куто кизилиослэсь но мукет астрономической объектъёслэсь (кылсярысь, галактикаослэсь) массаоссэс адямилы валамон возьматон понна. Со пусйиське M_☉ пусэн:

M_☉ = (1,98847 ± 0,00007)⋅10³⁰ кг.

Озьы, Шунды ог 332 946 поллы Музъемлэсь секытгем луэ, но Юпитерлэсь — 1047 поллы. Тросэзлэн кизилиослэн массаоссы 0,08-ысен 50 M_☉ дорозь.

Шундылэсь массазэ лыдъяны луонлык Кеплерлэн куинетӥ законысьтыз потэ:

$M_{\odot }={\frac {4\pi ^{2}\cdot a^{3}}{G\cdot T^{2}}},$

кытын

T — планеталэн Шунды котыртӥ берганэзлэн сидерической периодэз (Музъем понна T = 1 сидерической ар),

a — планеталэн орбитаезлэн бадӟым полуосезлэн кузьдалаез (Музъем понна a = 1 астрономической единица),

G — гравитационной постоянной.