Коньы
Коньы (латин кылын Sciurus vulgaris), лулосъёслэн йырйись лёгетысьтызы коньы динь выжыысь йол нонись пöйшур. Озьы ик вань на горд коньыос (Tamiasciurus) но пальмовой коньыос (Funambulus).
Коньыослэн мугорзы кузялэс, быжзы кузь но пуштрес, соос луо куренялэс буёло яке пурысялэс. Коньыосты луоз пумитаны котькытысь, Австралияысь сяна.
Тужгес но коньыос висъясько толалтэ асьсэлы мульы дасяменызы. Куд-ог дыръя соос мульыоссэс музъем пушкы вато яке писпу гырке поно. Тужгес секыт вакыт коньыос понна – со вазь тулыс, куке музъем пушкысь ватэм тысьёссы будыны кутско но сиёнлы уг ярало ни, нош выльёсыз будымтэ на. Коньы лыдъяське тужгес но визьмо пӧйшур, малы ке шуоно соос котьку но котькытысь асьсэлы сиён шедьтыны быгато, кылсярысь, гуртъёсын но. Соос быгато мерттэм будосъёсты ишкыса сиыны яке тылобурдоослэн тусьысьтызы лушканы быгато.
Куддыръя коньыос изъянтыны но котьмае быгато, малы ке шуоно соослэн пиньёссы лэчытэсь но котьку шерисько. Соин ик гурт калык умой-умой пытсаны кулэ асьсэлэсь корка сигъёссэс, малы ке шуоно соос отчы кар лэсьтыны быгатозы яке мае ке йырйыны. Корка сиге луоз поныны кыӵе ке пудо-животлэсь гонзэ, малы ке шуоно коньыос соку валало, отын кыӵе ке кышкыт пӧйшур вань шуыса.