Коробейников, Алексей Владимирович

Алексей Владимирович Коробейников
	Алексей Владимирович Коробейников
Ужан удысэз:	историк[d] но археолог[d]
Вордӥськем нуналыз:	26-тӥ тулыспалэ 1961 (63 ар)
Вордӥськем интыез:	Иж, Удмурт Автономной Советской Социалистической Республика, РСФСР, СССР
Кун:	СССР; Россия

Алексе́й Влади́мирович Коробе́йников (1961) — Удмуртиысь историк, спортсмен (ву ултӥ уясь, PADI Divemaster & PADI Underwater Archaeologist огазеяськонлэн ёзчиез). РАЕ-ысь профессор, Россиысь ветеранъёслэн «Боевое братство» огазеяськонзылэн удмурт ёзэтэныз кивалтӥсезлэн воштӥсез^[1].

Улон но ужан сюресэз

Алексей Владимирович вордӥськиз 26 тулыспалэ 1961 арын Ижкарын.

1983-тӥ арын йылпумъяз Удмурт кун университетысь историяя ёзэтсэ. 1988-тӥ арын тодон-валан люказ СССР-ысь КГБ-лэн Вылӥ курсъёсаз (Киевкарын). Отставкаысь капитан. Ас понназ ужась эскерись-исследователь, историк, мылкыдзэ сётыса ужа «Иднакар: методы историко-культурной реконструкции» журналзэ дасян бордын^[2]. Тодосъя ужъёсаз со бадӟым саклык висъя Урало-Поволжьеын ортчем историысь учыръёсты выльысь эскеронлы, вашкала каръёсысь шедьтосъёсъя вашкала калыклэсь историзэ гожтонлы.

А. В. Коробейников 400-лэсь ятыр тодосъя ужъёслэн авторзы луэ. Соос пӧлысь 19-эз печатламын ВАК пусэн потӥсь журналъёсын. 70 пала монографи но 125-лэсь ятыр книга гожтӥз. Берлоез «Солдат судьбу не выбирает» (2023) потэм книгаез уката но паськыт вӧлмиз^[3]. Со сяна, Алексей Владимировичлэн 16 изобретенилы свидетельствоосыз вань — соос улонэ пыӵатэмын археологияя удысын.

А. В. Коробейников — Россиысь Инкуазьтодон Академилэн истори тодос удысъя профессорез. Валтӥсь эскеронъёсыз сӥземын археологиысь шедьтосъёсты выль сямен эскеронлы но валэктонлы. Та удысъя А. В. Коробейников дасяз ни пӧртэм компьютер программаос. Кылсярысь, муысь шедьтэм пукыӵ ньӧлъёслэсь кызьы лобӟемзэс эскеронъя программа (Osseus), пукыӵ ньӧлъёсты баллистика амалъя чакланъя программа (Archer), вашкала каръёслэсь кышкытлыклэсь макем зол утиськемзэс тодонъя программа (Hillfort). Алексей Владимирович история тодосэ пыртӥз выль валатон: вашкала каръёслэн кышкытлыклэсь утиськон амалъёссы, соосты дунъянъя-чакланъя методика кылдытӥз. Со вылэ пыкъяськыса, эскерыны луэ котькыӵе объектлэсь кышкытлыклы дась луэмзэ.

Тодосчилэсь методиказэ уже куто эскеронъя (исследованиосъя) куд-ог центръёсын. Соя А. В. Коробейниковлы сётэмын методиказэ улонэ пыӵатэм сярысь акт. А. В. Коробейниковлэн 6 кунъёсын (странаосын) 180 пала тодосъя ужъёсыз потэмын. Со сяна, та тодосчи ву пушкын уянъя вылӥ квалификациен пусъемын. Финн-угор обществолэн (Хельсинки кар) ёзчиез луэ. Вуылэмын пӧртэм кунъёсы. Улэ Ижкарын.

Интернетэз уже кутӥсь тодосчиос пӧлысь А. В. Коробейников тужгес но яркытэз, кужмоез луэ. Солэн ужъёсыз паськыт вӧлмемын Интернетын, угось тросэз сайтъёс мылкыд каро та тодосчилэсь ужъёссэ вӧлмытыны. А. В. Коробейников ӟеч кусып возе иворъёсъя «Удмуртология» порталэн, трос ужъёссэ шедьтыны луэ та портал пыр.

Литература

Чӧлсконъёс

Валэктонъёс

[1] Алексей Коробейников: "Я написал заявление о добровольной мобилизации

[2] Планёрка с Алексеем Коробейниковым

[3] Ижевский историк Алексей Коробейников: Стратегия избегания — не мужское качество

[1]

[2]

[3]