Васильев, Флор Иванович

Флор Иванович Васильев - кылбурчи-лирик. Вордӥськиз 15-тӥ феврале 1934-тӥ арын Яр ёросысь Бердыш гуртын. Укан черкогуртысь школаез йылпумъяса, Ф. Васильев дышетскыны пыриз Глазкарысь педучилищее, нош 1953-тӥ арын - отысь ик пединститутэ. Тодон-валанзэ муромытэм сяна, дыр шедьтылӥз «Красное знамя» ёрос газетын ужаны. 1959-тӥ арын валтӥсь редакторлэн воштӥсез луиз. 1962-тӥ арысен кутскыса, куать ар ӵоже кивалтӥз «Комсомолец Удмуртии» газетэн, нош 1967-тӥ-1968-тӥ аръёсы «Советской Удмуртия» газетлэн редакторезлэн воштӥсез кариськиз. Бӧрысь ини басьтӥськиз«Молот» журнал борды - редакторе пуктӥзы. Озьы ик Удмуртиысь Писательёслэн союззылэн председателез луиз. 6-тӥ июле 1978-тӥ арын, сюрес вылын кышкыт учыре шедьыса, быриз.

Флор Васильев кылбуръёс гожъяны кутскиз, педучилищеын дышетскыкуз. Таосыз ужъёсыз ылесьгес вал, шуыны луоз. Пединститутын ини чуръёсыз пур пуштросъемесь, вольытэсь пӧрмыны шӧтазы. 1957-тӥ арын куд-ог кылбуръёсыз шедизы «Стихи удмуртских поэтов», «Ворекъяло кизилиос» бичетъёсы. 1967-тӥ арын потэм «Лирика» книгаяз удмурт кылбуръёссэ ӟуч кылэ берыктыса сётэ. 1971-тӥ арын Москваын югыт дуннеез адӟе солэн «Черёмуха» книгаез. Васильев поттыса вуттӥз удмурт кылбуръёсын 7 книгазэ, ӟуч кылбуръёсын - 5-сэ.

1967-тӥ арын «Лирика» но «Тон сярысь» книгаосыз понна Флор Васильевлы сёто Удмуртиысь комсомоллэсь премизэ, нош 1978-тӥ арын «Времена жизни», «Куар усён толэзе» книгаосыз понна шумпотто Удмуртилэн кун премиеныз. Гожъяськон удысын гижысь-пиньысь тыршемез понна кылбурчи пусъемын «Знак почёта» орденэн. Флор Васильевлэн кылбуръёсыз печатласькизы Венгриын но. Кылсярысь, 1975-тӥ арын потэм «Медвежья песня» бичетын мукет фин-угор гожъяськисьёсын ӵош вань солэн но чуръёсыз.

Кылбуръёсаз автор возьматэ вордӥськем палдэ, анайдэ, ӵыжы-выжыдэ яратон мылкыдэз. Лирической героез котьку дурбасьтэ улонын умоез понна. Валаське: кылбурлэсь шокамзэ - ритмзэ, рифмазэ - гожъяськись туж ӟеч шӧдылӥз. Оло, соин но тросэз ужъёсыз пӧрмемын ини кырӟанъёслы. Инкуазь суредъёс Флор Васильевлэн кылбуръёсаз выжыкылын выллем улӟо кадь. Яратонлы, синмаськонлы сӥзем ужъёсыз но сюлэмез бугырто.