Кияса

Кияса - Удмуртиысь черкогурт. Кияса ёрослэн шорсюлмыз. Интыяськемын Ижевсклэсь 65 иськеме.

Кияса черкогурт кылдӥз 1710-тӥ арын. Гуртлы ним сётӥллям солэн кылдытӥсезлэсь — Кияса нимо воргоронлэсь. 1859-тӥ арын ортчытэм ревизияя Кияса гуртын улӥз 581 адями, татын ужаз 6 вуко. 1926-тӥ арын Кияса луиз ёрослэн центрез.

Черкогуртын интыськемын Пётр Кривоноговлы сӥзем музей. Со кылдӥз 1997-тӥ арын. Музей усьтэмын Пётр Александрович Кривоноговлы сӥзьыса. Со РСФСР-ысь искусство удысьысь дано ужась, ожгар суредасьёслэн студизылэн ёзчиез луэ. Быдӟым оже пыриськыса, со ортчиз Волоколамскысен Берлинозь ож сюресъёсты. Бӧрысь аслэсьтыз малпанъёссэ кисьтиз суредъёс пыр. 1948-тӥ арын кылдытэм «Победа» ужез пусъемын ССCР-лэн кун премиеныз. Совето Союзысь суредасьёс пӧлысь нырысетӥзэ Пётр Кривоноговез пусйизы М. Б. Грековлэн зарни медаленыз. Киясаысь музейын утисько Пётр Кривоноговлэн Быдӟым ожлы сӥзем ужъёсыз но мукет суредъёсыз.

Озьы ик черкогуртлы матэ пуксемын дун чылкыт ву сётӥсь Аксарино гуртысь ошмес. Татчы инмарлы оскись трос калык вуылэ.

Киясаын ужало гурт техникаез тупатъянъя «Удмуртская» МТС но «Киясовоагроснаб» огазеяськон. Пусйыны луэ сиён-юон поттонъя огазеяськонъёсты: кетчуп дася «Адмирал» огазеяськон, сӥль сиёнъёс поттэ «Мясной двор» ООО.

Черкогуртын матысь аръёсы усьтӥськоз выль шор ёзо школалэн юртэз. Сое ӝуто «Удмуртиез азинтон» республикаысьтымы программая.

Кияса черкогуртын мыло-кыдо ужа Калык киужъёсъя юрт. Соин кивалтэ Удмуртиысь культура удысысь дано ужась Надежда Викторовна Пахомова. Татын аръёсын утё калык куиськон, кызьпу туйлэсь арбери лэсьтон, удмурт мунё дасян амалъёсты.