ЮНЕСКО

ЮНЕСКО (UNESCO — The United Nations Educational, Scientific and Cultural Organization) — дышетон, тодос но лулчеберет удысысь юанъёсъя Огазеям Нациослэн Огазеяськонзы.

Валтӥсь ужпумъёсыз — кунъёслэн ог-огенызы дышетон, тодос но лулчеберет удысъёсын ӵош ужаменызы валче быдэс дуннеын тупаса улонэз юнматон но кышкытлыкез палэнтон; выжы, кышномурт яке пиосмурт луэм, кыл но оскон шоры учкытэк, вань калыкъёслэсь катрадлыксэс гажан но утён - со сярысь гожтэмын Огазеям Нациослэн Огазеяськонзылэн Уставаз.

Огазеяськон кылдытэмын 1945-тӥ арын 16-тӥ шуркынмонэ, солэн штаб-квартираез интыяське Парижын, Франциын. Али огазеяськонын 195 кунъёс-ёзчиос но 8 ёзчи-ужасьёсыз — внешней политика понна кыл кутӥсьтэм территориос. 182 кунъёслэн-ёзчиослэн Огазеяськон бордын ас представительствооссы вань, отын но 4 ялан учкисьёсыз но правительствоос вискысь огазеяськонъёслэн эскерись 9 миссиоссы ужало. Огазеяськонэ пыро дуннелэн пӧртэм сэрегъёсаз интыяськем 60-лэсь уно бюроос но подразделениос.

Огазеяськон ужа таӵе юанъёс бордын: дышетон удысын дискриминациен герӟаськем шуг-секытъёс; национальной лулчеберетъёсыз дышетон но национальной кадръёсты дасян; социальной тодосъёслэн, геологилэн, океанографилэн, биосфералэн шуг-секытъёссы. ЮНЕСКО тужгес эскерыса возе Африкаез но гендер ласянь огкадь луэмез.

Огазеяськонлэн валтӥсь ужан ӧръёсыз пусъемын 5 программной секторъёсын: дышетон, естественной тодосъёс, социальной но гуманитарной тодосъёс, лулчеберет, коммуникация но ивор.