Ванюшев, Василий Михайлович
| Василий Михайлович Ванюшев | |
 | |
| Ужан удысэз: |
гожъяськись[d] но кылбурчи[d] |
|---|---|
| Вордӥськем нуналыз: |
10-тӥ тулыспалэ 1936 (88 ар) |
| Вордӥськем интыез: |
Улӥ Кусо-Какся гурт, Киров шаер, РСФСР, СССР |
| Кун: | |
| Данъянъёсыз: |
Эшъяськон орден, Удмурт Республикалэн кун премиез, И. Я. Яковлев нимо чуваш йӧскалык премия, К. Герд нимо йӧскалык премия, Удмурт Республикаысь Правительстволэн литературной премиез |
| Василий Михайлович Ванюшев Викискладын | |
Василий Михайлович Ванюшев — удмурт кылбурчи, литератураез эскерись, публицист. Филология наукаосъя доктор, профессор. Удмуртиысь калык писатель, культура удысысь дано ужась, Россиысь Писательёслэн союззылэн членэз, Педагогикая калыккуспо академилэн членэз. Вордӥськиз 10-тӥ феврале 1936-тӥ арын Удмурт АССР-ысь Кизнер ёросысь Улӥ Кусо-Какся гуртын.
Йылпумъяз Можга педучилищеез, Мускоысь кун университетысь журналистикая факультетэз, Общественной наукаосъя академилэсь аспирантуразэ. 1973-тӥ арысен ужа Удмурт историяя, кылъя но литературая институтын: нырысь директорлэн наукая воштӥсез вал, нош туннэ — наукая валтӥсь сотрудник. 1975-тӥ арын утиз кандидат диссертацизэ, 1997-тӥ арын — доктор диссертацизэ. 1998-тӥ-2003-тӥ аръёсы Ванюшев кивалтӥз Удмурт кун университетысь удмурт филология факультетысь удмурт литературая кафедраен.
Со вие ик Василий Михайлович шаерысьтымы пӧртэм газетъёсын-журналъёсын печатлаз аслэсьтыз кылбуръёссэ, рецензиоссэ. Нош 1973-тӥ арын вордӥськиз нырысетӥ книгаез — «Нити времён». 1976-тӥ арын югыт дуннее потӥз «Выжыосы» книгаез, 1980-тӥ арын — «Шунды но гудыри» книгаез. Со арын ик Ванюшев дася «Расцвет и сближение» монографизэ, 1987-тӥ арын — «Вершины корнями сильны» монографизэ. 1982-тӥ арын лыдӟисьёс кие вуиз «Вить чиньы — одӥг кикур» книгаез.
Ванюшевлэн творчествояз бадӟым инты басьто нылпи, вордӥськем шаердэ яратон, эшъяськон темаос. Со быгатыса уже кутэ пӧртэм инкуазь образъёсты. Та юн шӧдӥське 1985-тӥ арын потэм «Колосок, задевший небо» кылбур бичетаз но.
Василий Михайловичлэн ужъёсыз берыктэмын мари, бигер, чуваш кылъёсы. 1993-тӥ арын со юрттӥз поттыны удмурт литературалы сӥзем антологиез чуваш кылын — «Салам, Шупашкар!», «Содружество» (1995). Ванюшевлэн кылбур чуръёсыз печатласькизы «Литературная газета», «Литературная Россия» газетъёсын, «Дружба народов», «Урал», «Волга», «Театральная жизнь», «Луч» журналъёсын, «Удмуртский юмор», «Встреча друзей», «Между Волгой и Уралом», «Побратимы», «Вдохновение», «Отражение» альманахъёсын.
Василий Ванюшев басьтӥськиз югдытӥсьлэсь Г. Верещагинлэсь творчествозэ эскерон борды. Туннэ нуналлы солы сӥзем 9 книгаез потӥз ини. Озьы ик палэнэ ӧз кельты удмурт писательёсты но — Кузебай Гердэз, Кедра Митреез, Михаил Петровез, Михаил Коноваловез но мукетъёссэ.