Байтеряков, Николай Семёнович
| Николай Семёнович Байтеряков | |
| Ужан удысэз: | |
|---|---|
| Вордӥськем нуналыз: | |
| Вордӥськем интыез: |
Ӟатча, Варзи-Ятчинская волость[d], Можгинский уезд[d], Удмурт автономной область, РСФСР[d] |
| Кун: | |
| Кулон нуналыз: |
1-тӥ оштолэзе 1997 (73 ар) |
| Кулон интыез: | |
Николай Семёнович Байтеряков (9-тӥ гудырикошконэ 1923-тӥ арын Алнаш ёрос Ӟатча — 1-тӥ оштолэзе 1997-тӥ арын Можга) — тодмо удмурт кылбурчи.
Улон сюресэз
[Тупатыны | бамлэсь кодзэ тупатоно]Вордӥськиз 9-тӥ гудырикошконэ 1923-тӥ арын Алнаш ёросысь Ӟатча черкогуртын. 1938-тӥ арын тодон-валанзэ муромытыны пыриз Можгаысь педтехникуме. Но висеменыз сэрен дышетсконзэ йылозяз-пумозяз вуттыны ӧз быгаты. Нырысь ужаз гуртысьтыз колхозын, бӧрысь Сарапулысь кирпич поттонъя заводын, Ува — Кильмезь чугун сюрес лэсьтонын. 1942—1944-тӥ аръёсы ожмаськиз Быдӟым Атыкай ожын, вал танкист, миномётчик. Данъямын Горд Кизили, II степенё Отечественной война орденъёсын, «За отвагу» медален. Ож бере дышетскиз Ярославльысь военно-политехнической училищеын. Та бӧрсьы вамыштӥз Ижысь областной партийной школае, собере — СССР-ысь Гожъяськисьёслэн Союззылэн вылӥ литературая курсъёсазы. 1974-тӥ арысен рос-прос кырмиське литература удыс борды.
Кылбур дуннее кыстӥськон мылкыдыз ӝутӥськиз, Можгаын дышетскыкуз. Нырысетӥ кылбурзэ — «Тямыс март» — печталаз «Дась лу!» газетын. Нош 1953-тӥ арын потӥз нырысетӥез книгаез — «Кылбуръёс», 1992-тӥ арын кыкетӥез — «Луысал ке ваньзэ вераме». Чуръёссэ ӟуч кылэ берыктыса, вордӥсько «Вдоль серебряной Варзи», «Черёмуха в цвету», «Над родником» книгаосыз. Автор улэп дыръя лыдӟисьёс кие вуиз солэн 11 кылбур бичетэз. 2003-тӥ арын ӟуч но удмурт кылбуръёсыныз потӥз «Жин азвесь крезьгурен — Серебряная мелодия» книгаез. Николай Семёновичлэсь чуръёссэ ӟуч кылэ берыктылӥзы В. Семакин, О. Поскрёбышев, В. Емельянов но мукетъёсыз. Пусъёно: кылбуръёсыз 25 пӧртэм кунсьӧр кылъёсы берыктэмын! Ужъёсыз печатласькизы литературалы сӥзем журналъёсын — «Нева», «Дружба народов», «Волга», «Урал», «Наш современник», «Полымя». «Эштэрек» поэмазэ лыдӟыны быгатӥзы Венгриын улӥсьёс но.
Николай Байтеряковлэн кылбуръёсаз историысь учыръёс выль сямен вордӥсько кадь, мур шӧдӥсько лирической геройлэн пуш малпанъёсыз, сюлмаськонъёсыз. Кылсярысь, «Солдатъёс ке кошко» поэмаяз котькудӥз сямен герой яркыт но син азе пуктымон возьматэмын. Автор ужъёсаз пыртэ вордскем палъёсызлы синмаськем мылкыдзэ но. Та сяна, «Азвесь лодка», «Вуюись», «Мӧзмон сярысь» кылбуръёссэ лыдӟыса, шӧдыны луэ Байтеряковлэсь мӧзмонзэ, лапкам мылкыдзэ.
1970-тӥ арын Байтеряков басьтӥське нылпиослы веросъёс гожъян борды. Куд-ог ужъёсыз печатласькизы «Марӟан», «Куинь кызьпуос улын», «Сьӧд валъёс» бичетъёсын. «Крезь бурд вылын» но «Кылбуръёс. Поэма» книгаосыз понна Николай Байтеряковлы сётэмын Удмурт АССР-ысь кун премия. Нош 1986-тӥ арын луиз Удмуртиысь калык кылбурчи.
Улонысь кошкиз нырысетӥ ожтолэзе 1997-тӥ арын Можга карын.