Виноградова, Елена Марковна

Википедиысь материал
Перейти к навигации Перейти к поиску

Елена Марковна Виноградова вордскемын 1967-тӥ арын 27-тӥ толшоре Алнаш ёросысь Елкибаево (Актэмыр) гуртын. Дышетскиз шор ёзо Байтэрек школаын. Пичи дырыеныз ик гожъяськон удысэн тунсыкъяське. Кызьы шуэ ачиз гожъяськись, нырысь кылбуръёссэ со гожтӥз ини 3-тӥ классын дышетскыкуз но ыстӥз "Дась лу!" газетэ. Кылбурез газет бамын ӧз поты. Покчи авторлэн мылкыдыз куашкам вал но, эшъёсыз кутскем ужезлэсь куштӥськыны ӧз лэзе. 8-тӥ классын дышетскыкуз, школаязы ветло "Алнаш колхозник" газетысь ужасьёс, соос пуромытӥзы ныллэсь мылкыдзэ. Гожъямъёссэ выльысь но выльысь ыстылӥз газетъёсы, соосты табере печатлаллязы ни "Советской Удмуртиын" но. Атаез туж шумпотэ вал, нылыз гожъяське шуыса. Газетлэсь котькуд номерзэ чидатэк возьмалляз.

7-тӥ классозь Еленалэн удмурт кылын но литератураен дышетӥсь луэмез потылӥз. Нош 9-тӥ классын та малпанэз воштӥськиз. Удмурт кыллы но литературалы дышетӥсез Е.Т.Багратионова гожъяськыны мылкыд сётӥз, анай кылэз ярятыны дышетӥз. Школазэ быдтэм бераз нылаш пыриз УдГУ-ысь филологияя факультетэ. Гожъяскон мылкыдыз уката пуромиз. Елена Виноградова шуэ, солы, пе, кылбурет удысэ сюрес "Дась лу!" газет усьтӥз. Отын со вакытэ Герман Ходырев ужаз. Дано кылбурчи гожтэтъёсаз котьку лӧпкытъялляз:"Йырдэ эн ошы - гожъя! Сэзьгес кариськы!". Перозэ волятыны озьы ик юрттӥз университетын ужась удмурт литературно-творческой кружок, кудӥныз кивалтӥз Д.А.Яшин.

Университетэз быдтэм бераз со кӧня ке Кияса ёросысь школаын дышетӥз. Собеое улонзэ герӟаз журналастикаен. Кема дыр ӵоже "Удмурт дунне" газетын ужаз. Али улэ но ужа Ижкарын. Тани ма вера кылбурчи аслаз гожъяськон манерез сярысь:"Мон паймисько, кызьы одӥг кутскемен кылбур гожто. Мыным со паймымон кадь потэ, малы ке шуоно мон быдэс ар но куд-ог кылбуръёсме гожтӥсько. Одӥг малпан пыре сюлмам, кутскисько, нош быдтыны кылъёсы быро. Мар гожтыны уг валаськы ини. Соин со кылбуре кылле ог ӝыны ар. Нош тетрадьёсы борды берен берытскись ке, адӟисько но выльысь со быдэстымтэ кылбуре вылэ дугдӥсько, выльысь мылкыды ӝутске сое пумозяз вуттыны".


Л.П.Фёдорова "Удмурт нылкышно кылбуретлэн тулкымъёсыз"