Ву

Википедиысь материал
Кизер ву

Ву (водородлэн оксидэз, химической формулаез — H2O) — водородлэн но кислородлэн огшоры условиосын куашкантэм химической герӟетсы (11,19 % массаез луэ водород но 88,81 % — кислород), молекулярной массаез — 18,0160; зынтэк но шӧмтэк тусбуйтэм кизер маке. Ву туж бадӟым роль шудылэ Музъемлэн геологической историяз, улонлэн кылдэмез дыръя, асьме планета вылын физической но химической пӧлъёсты, куазез кылдытыкуз. Вутэк асьмелы тодмоесь луло макеос улыны уг быгато.

Инкуазьын ву тужгес ик уно вӧлмем тырмет луэ. Кизер но чурыт тусэн со зарезьёсын, шуръёсын, тыосын тырмыса но лымы но йӧ луыса музъем выллэсь 4/5 интызэ басьтэ. Со музъеме но гурезь изъёсы пыӵамын, омыре пар луыса вӧлскемын, будосъёслэн но котькыӵе луло животъёслэн составазы пыре. Муртлэн мугораз, секталаезъя учкон дыръя, ¾ люкетэз вулы усе.

Инкуазьын ву ноку но чылкак чылкыт уг луы. Со пушкын котьку сылмем сылалъёс, газъёс но органической тырметъёс вань.

Химической нимъёсыз[Тупатыны | бамлэсь кодзэ тупатоно]

Химиын вулэн кӧня ке шонер нимъёсыз вань:

  • Водородлэн оксидэз
  • Водородлэн гидроксидэз: OH- гидроксильной группалэн но (H+) катионлэн герӟетсы
  • Гидроксильной кислота
  • Дигидрогенлэн монооксидэз
  • Дигидромонооксид

Физической аслыкъёсыз[Тупатыны | бамлэсь кодзэ тупатоно]

Нормальной условиосын ву луэ кизерлык. Солэн пӧзён температураез — 100 °C (373,15 K). 0 °C (273,15 K) температура дыръя кизер ву кынме, йӧлы пӧрмыса. Та пӧзён но кынмон температураос шонересь огсямен омыр зӥбет дыръя гинэ (760 мм рт. ст., 101 325 Па). Зӥбетлэн кулэсмемез дыръя, йӧлэн ӵыжан температураез каллен будэ, нош вулэн пӧзён температураез — синэ.

Омыр зӥбет будэ дыръя, вулэн пӧзён температураез озьы ик будэ:

Омыр зӥбет, атм. Пӧзён температура, °C
0,987 (105 Па — нормальной условиос) 99,63
1 100
2 120
6 158
218,5 374,1

Озьы ик учке[Тупатыны | бамлэсь кодзэ тупатоно]