Загребин, Егор Егорович

Википедиысь материал
(Ыстэмын «Егор Егорович Загребин» бамысь)
Перейти к навигации Перейти к поиску
Егор Егорович Загребин
Вордскон дырыз:

4-тӥ пӧсьтолэзе 1937(1937-07-04)

Вордскон интыез:

СССР, Удмурт АССР, Якшур-Бодья ёрос, Кутоншур гурт

Кулон дырыз:

9-тӥ пӧсьтолэзе 2015(2015-07-09) (78 ар)

Кулон интыез:

Иж, Удмурт Элькун, Россия

Кунмуртлыкез (подданство):

СССРFlag of the Soviet Union.svg СССРРоссияFlag of Russia.svg Россия

Ужъёсыз:

гожъяськись

Егор Егорович Загребин — удмурт гожъяськись, драматург.

Вордскиз 1937-тӥ арын 4-тӥ пӧсьтолэзе Якшур-Бӧдья ёросысь Кутоншур гуртын. Йылпумъяз Лениградысь Ан. Островский нимо театр институтэз. Ужаз Удмурт театрын актёр луыса. Бӧрысь бырйиз режиссёрлэсь ужзэ — выжиз Ижысь телевиденилэн студияз. Со сяна, Удмурт театрлэн литературая ёзэныз кивалтӥз, 1992-тӥ-1999-тӥ аръёсы «Инвожо» журналлэн редакторез вал. Гожъяськисьёслэн союзазы кутэмын 1978-тӥ арын. 1999-тӥ арысен 2014-тӥ арозь луэ Удмуртись гожъясьёслэн огазеяськонлэн тӧроез.

Вуоно драматурлэн шӧдонэз но быгатонлыкез усьтӥськиз, театр институтын дышетскон вакытаз. 60-тӥ аръёслэн шоразы быдэстӥз «Шуныт зор» драмазэ. Сое пуктӥзы Удмурт театрлэн сцена вылаз. Со сяна, Егор Егорович 20 -лэсь трос пьеса гожтӥз на. Соос пӧлысь тужгес яркытъёсыз — «Тӧдьы юсь», «Портрет», «Мынам яратонэ татын», «Ошмес», «Насьток но Исьток». Драмаосаз ӵемгес ӝутэ гуртлы, вордскем музъемлы сӥзем темаосты.

Со сяна, Егор Загребин тодмо луэ яркыт веросъёсыныз. Усто пӧрмытэ нылпиослы но бадӟымъёслы сӥзем веросъёссэ. Озьы ик тунсыко пӧрмо психологической но серемес веросъёсыз. Ужъёсыз ӵем печатласько Удмуртиысь газет-журналъёсын. Со сяна, потэмын веросъёсын бичетъёсыз — «Нюлэс куараос», «Палэзь ӟускиос» «Секыт адӟон», «Тулыс зор», «Яратонэ тон, вожанэ…», «Гомась шунды». Со сяна, «Секыт адӟон» повестез 1988-тӥ арын пусъемын «Молот» журналлэн премиеныз.

«Эш-Тэрэк» и «Кикы нош весь силе но силе» трагедиосыз понна 2001-тӥ арын сётэмын Удмурт Элькунлэн кун премиез. Калыкылы туж ярало Загребинлэн комедиосыз. Кылсярысь «Эн кушты монэ, туганэ» пьесаез пуктэмын Чувашиысь К. Иванов нимо театрын. Егор Загребинлэн произведениосыз берыктэмын ӟуч, чуваш, пор, мордва но мукет финн-угор кылъёсы.

1991-тӥ арын Егор Егорович пусъемын Удмурт Республикаысь искусство удысысь дано ужась нимын. 1980-тӥ арын сётэмын Россиысь культура удысысь дано ужась ним. 2004-тӥ арын — Удмуртиысь калык гожъяськись ним. Кулӥз 9-тӥ пӧсьтолэзе 2015-тӥ арын.