Иворъёс:2007-11-04

Википедиысь материал
Перейти к навигации Перейти к поиску
04.11.2007

Валантэм праздник

Россиын нош ик пусъё Калыклэсь огазе луон нуналзэ. Та праздник юнматэмын вал 2005 аре федераци законэн, нош нырысьсэ пусъемын вал 2005 аре. Со сӥземын Мининлэн но князь Пожарскийлэн кивалтэм калык ополченизылэн Мускоысь поляк войскоосты уллямезлы. Озьы ке но, Россин улӥсьёс пӧлысь туж уноез али ке но рос-прос уг тодо, мар бен пусъе страна со нуналэ. Оглюкетсы нош со праздникез юри палэнто, со интые 7 ноябрез сӥлы каро; мукетъёсызлэн нош син азязы, 4 ноябрез тодэ вайкузы, амалтэк пуксё со нуналэ ик кык ар ӵоже ини ортчылӥсь «Ӟуч маршъёс» гинэ.

Соин ик урод уз луы, асьмеос но со праздниклэн кытысь потэмезлы ӧжыт ке но саклык висъялом ке. Кызьы тодмо историысь, 1612 аре 22 октябре Минин но Пожарскийлэн отрядъёссы полякъёслэсь Китай-городэз мозмытӥзы. Князь Пожарский Китай-городэ пыриз, киын Инмарлэн Анаезлэсь Кузон Оброссэ кутыса, кыл но сётӥз та вормонэзлы сӥзьыса черк ӝутыны. Полякъёс нош Кремле чигнаса ворсаськизы. Кӧня ке нунал улыса соос, потонтэм югдуре сюремзэс валам беразы, сётсконо кариськизы. 5 ноябре полякъёслэн капитуляциез басьтэмын вал. Кремльысь потӥзы отын полякъёсын ӵош пукем ӟуч бояръёс но мукет знатной адямиос, нош 6 ноябре поляк гарнизон но ожмаськон тӥрлыксэ му вылэ понӥз. 1613 аре февраль толэзе Музъем собор Русьлы выль эксэез юнматӥз, Бугыръяськон вакыт но кунсьӧр оккупация йылазы-пумазы вуиллям.

Туж уно дыр ӵоже та нуналэз нимаз праздникез уг лыдъяло вал. Эксэй дыръя 22 октябре Инмарлэн Анаезлэн Кузон Обросэзлэсь нуналзэ гинэ пусъё вал. Полякъёслэсь мозмытскон нуналэз кун праздник карыны малпан кылдӥз 2004 аре гинэ. Соку Россиысь кивалтӥсьёс туж адӟонтэм каро вал Кенешо вакытысь историез, символикаез но праздникъёсты, уката ик Сизьыметӥ Ноябрез — Октябрь революцилэсь нуналзэ. Ельцин дыръя со праздниклы выль ним понӥллям — Тупаса улыны кутсконлэн но Соглаш луонлэн нуналэз; Путин дыръя сое воксё палэнтоно но луиллям. Со понна ик малпамын вал ноябрь толэзе ик, азьвыл праздниклы матынгес ортчоно выль дата.

Выль датаез бырйыкузы, 22 октябрез басьтӥзы; со дата вуж стилья луэ бере, сое выль стиле берыктӥллям — XX дауре вуж но выль стилья датаос 13 нуналлы ог-огзылэсь висъясько бере, 22 октябрьлы 13 нунал вастсазы но 4 ноябре ик сюризы; шонергес вал, оло, 13 нунал ӧвӧл, нош 10 нунал гинэ ватсаны, малы ке шуоно, XVII дауре стильёс ог-огзылэсь ӵапак 10 нуналлы пӧртэм луо вал на. Но.... лэсьтэмын бере, лэсьтэмын. Тӥни озьы кылдӥз Россиын выль праздник.