Иворъёс:2007-11-23

Википедиысь материал
23.11.2007

Россиысь армия символэзлэсь куштӥськоз

Асьме арми сярысь кыл поттыку ялан син азе пуксё вал кирза сапегъёслэн суредзы, шӧдӥське бинялтонъёслэн зынзы. Табере югдур, оло, воштӥськоз: информационной агентствоослэн ивортэмзыя, сапег но бинялтон Россиысь ожгарчиослэн ялан нуллоно дӥсьёссылэсь али палэнтэмын. Соос кылёзы дано карауллэн формаяз гинэ; озьы ке но, соосты али кадь ик нуллоно луозы солдатъёс, хозяйствоя пӧртэм уж ужаку оло нош аспӧртэмлыко климатэн интыосын (кылсярысь, Крайней Уйшорын) службазэс ортчытыку.

Паймымон: ог ар но ӝыны талэсь азьвыл Россиысь утёнъя министрество оскытэ вал, кирза сапег но соин люконтэм герӟаськем бинялтон асьме ожгарчиослы ваньмызлэсь ярамонгес пыдкутчан луэ шуыса, соин ик солэсь палэнскемлэн толыкез ӧвӧл, пе. Ботинкаосын ӵошатоно ке, бинялтонэн сапег трослы умойгес потэ, пе: ботинкаосын нуллоно пыдвыл туж ӝог наштаське, соосты яке ӵемысь воштоно, яке ялан миськоно луэ, пыдвыл ӝоггес пась луэ но. Нош бинялтон та ласянь аслэсьтыз кузёзэ ӧжытгес «курадӟытэ»: нуллонын но со юнгес, гигиена ласянь но оптимальнойгес луэ.

Нош али та министерствоысь ӧнерчиослэн малпанъёссы мукет ӧртӥзыгес кошкизы, лэся: армиосты ӵапак пыдвыл но шнуро ботинкаез (берцы́ шуонэз) нуллыны косо ни. Кин тодэ, оло, отысь тыл службалэн кивалтӥсьёсыз Украиналэн но Белоруссилэн армиоссылэсь адӟем кароно кариськиллям: таяз арлэн кутсконаз со кунъёсын но сапеглэсь-бинялтонлэсь куштӥськем сярысь ялэмын вал.