Иворъёс:2007-12-13
Американъёс Путинлэн виеменыз кышкато
Россиысь президент Владимир Путин 2008 аре ымустон нуналэ, черк службаысь бертыса, одно виемын луоз шуыса оскыто Америкаысь аналитикъёс. Малы, пе, со козьы луоз? Малы ке шуоно, куд-ог кужымъёслы туж ик уг яра Путинлэн президент властьсэ Сергей Нарышкинлы сётыны малпанэз. Бен-бен: америкаысь аналитикъёслэн малпамзыя, алигес гинэ преемникен ялэм Дмитрий Медведевлы премьер-министрлэн интыез гинэ дасямын, пе. Талы пумит луо «кужымчи» шуонъёс (Игорь Сечин, Николай Патрушев но мукетъёсыз).
Путин бырем бере соос ялозы странаын чрезвычайной югдурез но президентэ поттозы РЖД-ысь али кивалтӥсез Владимир Якунинэз. Россиез возьма хаос, экономикалэн коллапсэз, массаослын протестъёссы, полицилэн туж лек но виро ужрадъёсыз, куд-ог тодмо адямиосты виыны пуктонъёс но (кылсярысь, озьы луоз Валентина Матвиенкоен но Юрий Лужковен бюджетысь миллионъёсын лушкам коньдонэнызы сэрен).
Таӵе кышкыт югдур йылпумъяськоз 2016 аре гинэ: соку тюрмаысь мозмытскем Михаил Ходорковский юрттэмен президент креслое пуксёз Борис Немцов.
Зэмалоз-а американъёслэн прогноззы, ӧжыт гинэ улыса тодомы.