Иворъёс:2008-11-12

Википедиысь материал
Перейти к навигации Перейти к поиску


12.11.2008

Мар кулэ но мар люкетэ интернетмылы?

«Удмурт дунне» нош ик ӝутэ удмурт национальной интернет азьын сылӥсь ужпумъёсты. Алигес потэм номераз лыдӟыны луоз «Удмуртъёсты утчало но ... уг шедьто?» шуыса нимам статьяез. Корреспондент Елена Васильева вера национальной политикая министерстволэн эгида улаз ортчем «Россия. Улосъёс. Калыкъёс. Ог-огеныд эшъяськон» нимо конференцилэн кызьы ужамез но кыӵе йылпумъянъёс доры вуэмез сярысь.

Туж жаль, шонер малпанъёс сяна, та материаллэн вань на лыдӟисез воксё йыромытӥсь люкетъёсыз. Кылсярысь, конференцие пырись муртъёс пӧлысь огезлэсь верамъёссэ цитировать карыса, автор тазьы гожтэ: «Анай кылын сайтъёслэн тырмымтэзы юн герӟаськемын удмурт шрифтъёсын. Али сайтъёс шрифтъёсты куинь пӧртэм куто. Огъёсыз ӟуч алфавитысь букваосын ик гожъяло. Мукетъёсыз удмурт букваослы тупась пусъёсты куто. Та бамъёсысь удмурт букваоссэ вань компьютеръёс усьтыны уг быгато. Куинетӥ амал — асьсэ сайтсылы гинэ нимысьтыз шрифт кылдытон. Та дырлы таиз тужгес но ӟечез луэ. Со вылэ пыкиськыса, лэсьтэмын «Удмурт дунне» газетлэн сайтэз... Ярам, шуом, мыло-кыдо адями шедиз, удмурт кылын сайт лэсьтӥз. Но кин гинэ сое адӟоз, лыдӟоз? Туала «поисковикъёс» пыр анай кылын лэсьтэм бамъёсты шедьтыны секыт. Утчаськыны кутскиськод но, син азяд капчиенгес пото ӟуч кылын сайтъёс».

Таин соглаш луыны шуг. Шрифтъёс сярысь ке верано, али удмурт шрифтъёсын нокыӵе проблема ӧвӧл: аспӧртэмлыко удмурт букваос вань на Майкрософт корпорацилэн стандартной шрифтъёсаз (Times New Roman, Courier New, Arial — ӵапак та шрифтъёс ӵемгес уже кутӥсько), вань на Линукс системаослы удмурт букваосын умоесь шрифтъёс. Ужпум тани ма бордын: тросаз организациосын уже куто «пыдес вылын» лэсьтэм, быдэс дуннеысь стандартлы — Юникод шуонлы — чик тупасьтэм шрифтъёсты. Кылсярысь, таӵе югдур «Удмурт дунне» газетын но. Мар кароно? Юникодлы тупасьтэм шрифтъёсты палэнтоно, стандартъя лэсьтэм гинэ шрифтъёсты уже кутоно. Таоссэ шедьтыны луоз Удмуртология порталысь: http://udmurt.info/files

Туж но туж паймытэ утчан машинаос (поисковикъёс) сярысь верамез но. Россиысь информаци технологиосъя специалистъёслэн тужгес гажано поисковикъёссы, Яндекс но (тужгес ик) Гугл кемалась ини шуг-секытъёстэк ужало кунысьтымы ичи лыдъем калыкъёслэн кылъёсыныз, аспӧртэмлыко букваоссэс валало. Нош адямиос сайтъёс утчан дыръязы шергес уже куто удмурт кылэз, утчан машинаослы юан сётъяло ӟуч кылынгес. Соин ик соос ӟуч сямен гожтэм сайтъёс доры ик вуо. Нош кинлэсь ке удмурт кылын лэсьтэм сайтсэ утчан машина пыр шуг ке шедьтыны, со возьматэ: сайт лэсьтӥсь мурт урод тодэ интернетысь утчанэз оптимизацияя наукаез (SEO шуонэз). Бен, сайтлэн бамъёсаз удмурт кылэн артэ ӟуч кылэз уже кутон зэмзэ но пайда вайыны быгатэ, но нырысь сётаки SEO-ез тодоно луоз — книгаосысь–статьяосысь, оло нош, нимысьтыз курсъёсы ветлыса.

Елена Васильевалэсь быдэс материалзэ лыдӟе http://udmdunne.ru/articles/art2394.html адресъя.