Ижмаш

ОАО «Ижмаш» («Ижмаш» акционеръёслэн усьтэм огазеяськонзы) — Россиысь одӥгез тужгес бадӟым пыӵал поттӥсь концерн. Со кылдӥз Иж корт поттон заводлэн (бӧрысь — Ижысь пыӵал но андан поттӥсь завод) инъет вылаз (ОАО Ижсталь выллем ик).

Иж завод бордысь потӥз Удмуртилэн шоркарез. Иж городлэн кылдэмез меӵак герӟаськемын граф Шуваловлэн нимыныз. 1760-тӥ арын Иж посёлоке вуиз граф Пётр Шувалов. Тулыс 10-тӥ апреле татын кутскизы ӵыпет лэсьтыны. Со вӧзын кылдӥз корт ӵыжатон завод. 1763-тӥ арын заводын нырысетӥ корт кисьтӥзы. Сое пароходъёсын вуттӥзы Тулаысь пыӵал поттонъя заводэ, Петербурге.

Ар ӵоже татын 200 сюрс пуд корт ӵыжатӥзы. Но 1774-тӥ арын заводэз басьтӥз Пугачёвлэн войскоез. Бӧрысь завод кема выриз пыд йылаз султыны. 1859-тӥ арын заводын ӵыжатэм кортэз Россиын тужгес устоеныз лыдъязы. Татын поттэм корт мынӥз Россиысь вань пыӵал-тӥрлык лэсьтонъя заводъёсы. 19-тӥ даурлэн пумаз завод шӧдскымон паськытаз но выль технологиосты пыӵатыны кутскиз. Нырысетӥ мировой война дыръя татын чараклы йылӥз корт ӵыжатон. Война дыръя продукция поттон кык поллы тросгес луиз. 1961-тӥ-1985-тӥ аръёсы заводын шаплы азинскизы выль ужан амалъёс. Туннэ та завод быдэс дунеелы тодмо «Ижсталь» завод шуыса. Татын ужа производствоя ньыль цех. Ижын поттэм корт мынэ пӧртэм машина, гурт техника, самолёт ёзъёс, подшипникъёс, пружинаос лэсьтыны.

Иж заводлэн кыкетӥ вордсконэз герӟаськемын 1807-тӥ арен. Соку татчы вуиз инженер Андрей Дерябин. Со ӵектэмъя татын ӝутӥськиз пыӵал поттонъя завод. Вакчи дыр куспын татын кутскизы пыӵал-тӥрлык поттыны. 1891-тӥ арын татын дасязы Мосин конструкторлэсь винтовкаоссэ. 1897-тӥ арын та пыӵалэз 500 сюрс лыдын поттӥзы ни.

Нырысетӥ мировой ож дыръя нуналаз 2 сюрс 200 винтовка лэсьтӥзы. Озьы ик дасязы гранатаос, патронъёс, снарядъёс.

Быдӟым ож дыръя 1941-тӥ арлэн пумаз татын нуналлы быдэ бичазы 10 сюрс винтовка. «Ижмаш» заводлэн нимыз люконтэм герӟаськемын дано конструкторлэн Михаил Калашниковлэн нимыныз. Татын со ужаны ӧдъяз 1948-тӥ арысен. Кема дыр ӵоже заводыны потӥз АК-47 автомат. Азьланяз со вӧзы ватсаськизы АК-74, АК-74М, киын ыбылон пулёмет но мукет пыӵал-тӥрлык. Та аръёс ӵоже поттэмын 50 миллион АК автомат.

Озьы ик та заводлэн историяз бадӟым пытьы кельтӥз мукетыз конструктор Евгений Драгунов. Солэн СВД снайпер винтовкаезлэсь усто пыӵал та дырозь лэсьтымтэ.

XIX-XX-тӥ дауръёсы та заводын Россиысь пыӵалъёслэсь вань видъёссэ лэсьто вал. Аспӧртэмлыко луэмзэ таӵе лыдпус возьматэ: Быдӟым Отечественной ож дырья та заводын 11,3 миллион винтовка но карабин лэсьтэмын вал, тросгес, Германиысь вань заводъёсты лыдэ басьтыса. Со вакытэ конвейер амалэн производство юнматэмын вал авиационной пулемтъёсты, авиационной пушкаосты, противотанковой орудиосты, пистолетъёсты но револьверъёсты поттонъя.

Война бере завод АК-47 автоматэз поттыны кутске, кудӥз туннэ нуналлы дуннеын тужгес тодмо луэ но паськыт вӧлмыны быгатиз (ог 106 кунъёсын официальной ожгар тӥрлык луэ). Туала куронъёсты чакласа, автоматической, снайперской пыӵалъёслэсь, пистолетъёслэсь выль модификациосты поттонъя ужзэ радъя.

Туннэ ОАО «Ижмаш» — трос профильем машиностроительной предприятие. Производствоез таӵе ӧръёсъя радъяськемын: ожгар пыӵалъёс, спортивной но пӧйшуран пыӵалъёс, авиационной пушкаос, мотоциклъёс, автомобиль, станокъёс, кортлэсь ужан тирлыкъёс но мукет арбериос.

Историез

1757-тӥ арын граф П. И. Шувалов Приуральеын заводъёсты пуктыны кутскиз. Гурезь ужъёсъя инженер А.С. Москвинлэн ӵектемезъя П. И. Шувалов Иж вылын завод ӝутон чакла.

1760-тӥ арын Иж тымет лэсьтэмын.

1764-тӥ арын кык производственной юртъёс ужаны кутско.

1770-тӥ арын Ижысь корт поттон заводлэн кутске выль азинскон сюресэз — кортэз поттон сяна, сое дурыны кутско (якорьёсты поттын радъямын).

1771-тӥ арын Иже вуэм академик Паллас кар посёлокысь мастеръёслэсь быгатонлыкъёссэ вылӥ дунъя.

1800-тӥ арысен крестьянъёсты заводын ужъёслэсь мӧзмыто но куто заводын нуналмысь тыршись наёмной ужчиосты.

Со дыре ик Павел I императорлэн куремезъя Кам шур вылын пыӵал поттон завод лэсьтыны чакламын. Иже вуэ А. Ф. Дерябин. 1807-ти арын пыӵал поттон завод ужаны кутскиз.

1823-тӥ арын ӝутэмын Арсенал юрт

Чӧлсконъёс