Италмас (ансамбль)

Википедиысь материал

ИталмасУдмуртиысь академической ансамбль.

Историез[Тупатыны | бамлэсь кодзэ тупатоно]

1936-тӥ арын сентябре УАССР-ысь Калык Комиссаръёслэн Советсы кутӥз решение: удмурт калыклэсь, Совето Союзлэсь культуразэ вӧлмытон но паськытатон понна кылдытоно эктонъя но хор кырӟанъя ансамбль. Ним но туж чебер бырйизы — «Италмас» (удмуртъёслэн яратоно сяськазы, ӵуж пиштӥсь буёлэныз шулдыртэ Кам, Ватка, Чупчи шур дуръёсты. Та сяна, яратонлэн но мӧзмонлэн, осконлэн но шумпотонлэн пусэз — символэз — луэ).

Али гинэ кылдэм коллективлы паськыт сюрес усьтӥськиз. Соос возьматыны быгатӥзы пӧртэм калыкъёслэсь сям-йылолъёссэс, тапыртонъёссэс, гуръёссэс. Озьы ик гастрольёсын потаны быгатӥзы СССР-ысь пӧртэм улосъёсы, кунгож сьӧры.

«Италмаслы» кивалтӥсе пуктӥзы Мускоысь консерваториез алигес гинэ йылпумъям Аполлон Каторгинэз. Егит пияш мыло-кыд басьтӥськиз ансамбльлэсь репертуарзэ кылдытон борды. Озьы ик нылъёсты-пиосты нотаосты мургес валаны дышетӥз.

Быдӟым ож вакытэ «Италмасэ» нылмуртъёс гинэ кылизы, воргоронъёс ваньзы фронтэ кошкизы. Кышномуртъёс концертъёсын поталлязы Офицеръёслэн юртъёсазы, госпитальёсы, воинской частьёсы.

1962-тӥ арысен туннэ нуналозь ансамблен кивалтэ Удмуртиысь но Россиысь калык артист Анатолий Мамонтов. Та ансамбльын трос тодмо адямиос вал. Кылсярысь, балетмейстер Анатолий Бондарев. Со пуктӥз «Зимонька», «Чипак», «Танец с колокольчиками» эктонъёсты. Пусъёно: та берпуметӥез тапыртон пыртэмын «Италмаслэн» зарни фондаз. Та коллектив пыриськылӥз пӧртэм конкурсъёсы, фестивальёсы: «Московские звезды», «Русская зима», «Белорусская осень», «Киевская весна» но мукет.

А. Мамонтов тодаз вае:

Ансамбль кема аръёс ӵоже ужа ини. Та дыр куспын Россиын но, Удмуртиын но улон вошъяськылӥз. Со шӧдӥськытэк ӧз кыльылы ансамбль вылын. Тани Совето вакытэ калык азе потылӥмы партия сярысь гуръёсын, Н. Хрущёв кивалтон вакытэ одно ик дасялляно вал гурт удыслы сӥзем эктонъёсты, кырӟанъёсты.

1992-тӥ арын «Италмас» бордын нырысьсэ республикаямы кылдӥз нылпи эктонъя школа-студия. Соин кивалтэ Росииысь дано артистка, Удмуртиысь калык артистка, балетмейстер Леонора Мамонтова.

Туннэ ансамбльын 30 кырӟасез, 20 эктӥсез, 10 музыкантэз.