Куара (огазеяськон)
Куара — удмурт егитъёслэн луонлыкъёс сётонъя улосвыл мер огазеяськонзы. Кылдӥз шуркынмонэ 2018-тӥ арын. Огин удмурт кылын ӟечлыко но тунсыко материалъёсты вотэсын кылдытон но вӧлмытон бордын ужа: соос удмурт кылын видеоконтент — лекциос, интервьюос, маскаръяськон видеоос лэсьто, форумъёс, лекторийёс но мукет ужрадъёс. Вӧлмытон каналъёссы — со «ВКонтакте», «Facebook» но «Instagram» вотэсъёсысь огинъёс. Озьы ик мерлыко вотэслэн инъетэз сьӧрын (оффлайн) но уж нуиське. Али дырлы та нырысетӥез удмурт огазеяськон, кудӥз лэсьтэ медиаконтент.
Ми будӥмы гуртъёсын но улӥськом Ижкарын. Ми ветлӥськом удмурт концертъёсы, кылзӥськом удмурт крезьгурез, лыдӟиськом удмурт книгаосты — озьы ик милемлы тунсыко дунне лулчеберет. Милям потэ котькытысь адӟеммы но кылэммы удмурт кылэз. Милям потэ кылэммы удмурт КУАРАЕЗ. Соин ик ми шара вераськом
— гожтэмын огазеяськонлэн «Вконтакте» вотэсысь огиназы.
Кивалтӥсьсы луэ Влад Степанов. Артём Малинин, огазеяськонлэн кивалтӥсезлэн воштӥсез.Огазеяськонэ пыриськыны быгатэ котькуд мылкыд карись.
- Кинлэн мылкыдыз вань, кин дась ужаны но удмурт кылэз вӧлмытыны, сое адӟымон но кылымон карыны, ӟечлыко, шонер, визьмо возьматыны - соослы ӧсъёс усьтэмын. Шумпотыса ужалом мукет огазеяськонъёсын, ӵектонъёсты но кенешез лыдэ басьтом - вера Артём Малинин, «Куара» огазеяськонлэн кивалтӥсезлэн воштӥсез.
- Огазеяськонлэн трос пӧртэм проектъёсыз ужало: Тубат,Аныкай ,Удмурт блогеръёслэн школазы ,Тамга, Куара вера,Горон Быдтон.
"Тубат" ӵектос - удмурт кылын потӥсь научно-популярной видеолекциосын сузьет. Со "Куара" огазеяськонлэн нырысетӥ видео-проектэз шуыса лыдъяське. Ӵектос улсын пӧрмо удмуртъёслэн кылзы, лулчеберетсы но сям-йылолъёссы сярысь видеолекцияос.Нош лекци лыдзисьёс - тодӥсь-валась огин, ас удыссыя валтӥсь ӧнерчиос - этнографъёс, историкъёс, филологъёс но мукет тодосчиос. Удмурт кылын сяна, видеолекциосы ватсамын ӟуч но англи кылъёсын субтитръёс. Сузьетысь ужъёс кутӥсько дышетӥсьёсын но студенътёсын Удмурт элькунысь дышетсконниосын. Ужанъяз та проект социальнойлы пӧрмиз но Удмурт Элькунысь йӧскалык политикая министерствоен субсидия висъямын вал.
Удмурт анай-атайёс понна «Аныкай» удмурт медиашкола. Ужаны кутскиз гудырикошконэ 2019 арын, сое малпась - Ольга Степанова. Проектлэн валтӥсь малпанэз – удмурт кылэз азинтон, удмурт кылын видео кылдытон. Удмурт медиашколае пыриськыны быгато вань удмурт анай-атайёс, кудъёсызлы тунсыко туспуктэм но видео лэсьтыны, фильмъёс кылдытыны, монтаж ужен вырыны. Дышетскон нуиське очно но заочно. Дышетӥсь ӧнерчиос – фотографъёс, видеографъёс, SMM-специалистъёс. Кылдытэмын удмурт кылын видеоблогъёс пӧртэм темаосъя: "Бичаськом лего", "Азбар TV" но мукет. Та медиашколалэн ик мукет ужез - #аныкаймарафон. Сётэм темаосъя ёзчиосын лэсьтэмын туспуктэмъёс, видео - но аудио - ужъёс, узырмытэмын удмурт контент.
«Удмурт блогеръёслэн школазы» удмурт кылэз тодӥсь пиналъёслы ӵектос. Сӥземын блогинг удысын тодон-валанъёссэс будэтонлы, быгатонлыкъёссэс вӧлятонлы. Ужрадэ пырисько удмурт кылын вераськись нылъёс но пиос, школаын дышетскисьёс, кинлэн вань мылкыдыз мерлыко вотэсбамъёсын видеоблог кылдытыны-нуыны. Ӧнерлыко журналистъёс, блогчиос, видеографъёс видеоблог кылдытон ужлэн инъетъёсыныз тодмато.Ӧнерчиослэсь басьтэм тодон-валанъёссэс нылпиос уж вылын эскеро-юнмато, кылдыто аспӧртэм контент – удмурт кылын видеоблогъёс – вӧлмыто соосты мерлыко вотэсын. Удмурт школьникъёсын кылдытэм огинлык азьланяз ачиз ужалоз, «Удмурт блогеръёслэн школаязы» басьтэм тодон-валанъёс но быгатонлыкъёс удмурт кылын ӟечлыко видеоблогъёс лэсьтыны паськыт луонлыкъёс усьтозы.
"Тамга" - егитъёс понна кылдытэм нырысетӥез удмурт видеошкола. Ортчытэмын 2019 арын гужем ӵоже. Ужез куинь ӧръя радъямын: сценарий гожтӥсьёс, операторъёс но монтаж бордын тыршисьёс. «Тамга» видеошкола удмурт видеоконтент бордын ужасьёсты дасян понна кылдытэмын. Со улсын тодмо удмурт кырӟасьёслы Иван Белослудцевлы но Алексей Пикулевлы «Тӧл» кырӟанзыя видеоклип лэсьтэмын.
«Куара вера» — со удмуртлык сярысь вакчи лекциосын ӝыт. Отчы ваньмыз, мар герӟаськемын пыртэмын удмурт лулчеберетэн, туала удмурт обществоен. Лекторъёс - пӧртэм удысъёсысь тодӥсь-валась адямиос:Наталья Дмитриева — Ижысь Столичной лицейысь историяя но обществозания дышетӥсь, удмуртлыкез азинтӥсь, пӧртэм удмурт но фин-угор проектъёслэн авторзы;Дарали Лели — егит прозаик но драматург, дизайнер, Арт-резиденциысь удмурт проектъёслэн кураторзы; Богдан Анфиногенов — егит кылбурчи, кырӟась, удмуртлыкез азинтӥсь, Эшъяськон юртысь ӧнерчи;Елена Ильина — Кузебай Герд нимо гимназиысь дышетӥсь, блогер,Александр Митряков — археолог, история наукаосъя кандидат. Та огазеяськонлэн нырысетӥ ужрадэз, кудӥз мерлыко вотэслэн инъетысьтыз потӥз(оффлайн) но зэмос улонэ пыӵаз.
"Горон Быдтон" - серемес баттл, малпамын "Куара" огазеяськонэн. Ортче "Лига Плохих Шуток" проектлэн амалэзъя. Котькудӥз маскаръяськись аслаз серемпырыосыныз тырше серекъятыны пумит пукись эшсэ. Пӧрме ке - одӥг балл басьтэ. Выпускъёсты луэ адӟыны "Куара" огинлэн "Вконтакте" вотэс басмысьтыз.