Рябинина, Зинаида Кирилловна

Википедиысь материал
Файл:Ryabinina.jpg
Зинаида Кирилловна Вахрушева (Рябинина)

Зинаи́да Кири́лловна Вахрушева (ныл дыр нимтулыз Рябинина) — «Удмурт дунне» газетлэн валтӥсь редакторез, кылбурчи, журналист.

Вордӥськиз 1971-тӥ арын 26-тӥ тулыспалэ Сьӧлта ёросысь Кейлуд-Зунья гуртын. Нырысетӥ кылбурзэ гожтӥз 1985-тӥ арын, ӟазег возьмакуз("Гужем" кылбур). Печатлаз сое «Дась лу!» газетын. . Югдон шор ёзо школаез йылпумъяса, егит кылбурчи УдГУ-ысь кылосбуръя факультетлэн удмурт отделенияз пыре. Дышетскон вакытаз ик, 1992-тӥ арын, «Ӟечбур!» газетлэн редакцияз ужаны кутске. Университетэз йылпумъякуз, «Лулсэр» нимо творчской диплом гожтӥз. Отчы студенткалэн 48 кылбурез но А. Ахматовалэсь но М. Лермонтовлэсь берыктэм ужъёсыз пыризы.

1998-тӥ арысен «Удмурт дунне» газетын ужаны кутскиз. 2010-тӥ арысен туннэ нуналозь со валтӥсь редактор луыса тырше. З. Рябинина али кылбуръёс гожъя ке но, гожъяськон удысаз журналистика тросгес инты бсьтэ.

1990-тӥ аръёслэн шоразы автор кепыратэк пыриз егит кылбуретэ «сэрегъёсты» гажась лирической героиняеныз. Постомодернизм дуннее выль шӧм пыӵатэменыз висъяськиз.

2006-тӥ арын «Удмуртия» издательствоын «Синмаськем тӧлъёс» кылбур бичетэз лыдзисьёс кие вуиз.

2008-тӥ арын Hõimurahvaste Programm юрттэмен «12 суред» кылбур бичетэз поттэмын. Книгаын удмурт, ӟуч, эстон но англи кылъёсын кылбуръёсыз поттэмын.

Мукет нылкышно кылбурчиос пӧлысь Зинаида Рябинина висъяське ӧч карыса, чепылляны турттыса гожъяськон манереныз. Лирической героинязэ со чеберъятэк возьматэ. Финно-угор поэтэссаос пӧлын пиосмуртъёс азьын йыбыртъятэк улыны быгатэменыз висъяське, аслэсьтыз дунзэ ӟеч тодэ. Куд-ог учыръёс-кусыпъёс сое курадӟыто — нырысь учкыса, кужмо, юн сямо героиня мылкыдъёсызлы сётиське, но пиосмурт нылкышноез дунъяны уг вала. Озьы ке но пиосмуртэз со укыр уг пыкылы, валаны тырше.

Кылбуръёсысьтыз образъёс вакчиесь но валамонэсь луо. Соос аспӧртэм картинкаослы укшало. Чуръёсыз пуштроссыя но, формазыя но эрикоесь, озьы ке но кылбурчи нокытын но мултэссэ уг куасалты. Туала нылкышно лирикаын висъяське психологической ӧре кыстӥськеменыз.

Чӧлсконъёс[Тупатыны | бамлэсь кодзэ тупатоно]

  • Вахрушева (Рябинина) Зинаида Кирилловна
  • Рябинина З. К. 12 суред: Кылбуръёс. – Таллин: Эстония, 2008
  • Рябинина З. К. Синмаськем тӧлъёс: Кылбуръёс. – Ижевск: Удмуртия, 2006. – 80 с.
  • Фёдорова Л. П. Удмурт нылкышно кылбуретлэн тулкымъёсыз. – Ижевск: Удмуртия, 2007. – 352 с.