Сальвадор Дали

Сальвадор Дали
кат. Salvador Dalí i Domènech
Вордӥськем дырыз	11-тӥ куартолэзе 1904({{padleft:1904|4|0}}-{{padleft:5|2|0}}-{{padleft:11|2|0}})[…]
Кулэм дырыз	23-тӥ толшоре 1989({{padleft:1989|4|0}}-{{padleft:1|2|0}}-{{padleft:23|2|0}})[…] (84 ар)
Гражданство	Испания
Супруг(а)	Гала Дали
Жанр	художник, живописец, график, скульптор, режиссёр
Стиль	сюрреализм, дадаизм, кубизм
Salvador DalíМедиафайлы на Викискладе

Сальвадо́р Дали́ (быдэс нимтулыз — Сальвадор Доме́нек Фелип Жасинт Дали-и-Доме́нек, маркиз де Дали де Пу́боль, кат. Salvador Domènec Felip Jacint Dalí i Domènech, Marqués de Dalí de Púbol, исп. Salvador Domingo Felipe Jacinto Dalí i Domènech, Marqués de Dalí y de Púbol; 11 куартолэзе 1904, Фигерас — 23 толшоре 1989, отын ик) — испан суредась, график, скульптор, режиссёр но гожъяськись. Сюрреализм вакытысь тужгес яркытэз огмуртэз.

Ужаз таӵе фильмъёс бордын: «Андалузский пёс», «Золотой век» (режиссёр — Луис Бунюэль), «Заворожённый» (режиссёр — Альфред Хичкок). «Тайная жизнь Сальвадора Дали, рассказанная им самим» (1942), «Дневник одного гения» (1952—1963), Oui: The Paranoid-Critical Revolution (1927—1933) книгаослэн но «Трагический миф Анжелюса Милле» эсселэн авторзы шуыса тодмо луэ.

Биографиез

Пинал дырыз

Сальвадор Дали вордӥсьекмын Испаниысь Фигерас карын 11 куарусёнэ 1904 узыр семьяын. Атаез тодмо нотариус вал. Сальвадор сяна семьяязы пичи сузэрез Анна Мария Дали[es] (6 толшоре 1908 — 16 куартолэзе 1989) но агаез вал на. Агаез кык арескысен менингитэн висьыса кулӥз (12 коньывуонэ 1901 — 1 гудырикошконэ 1903).

Пичи дыръяз ик Дали туж шумприч но етӥз будӥз. Вогъяськон сямыныз ваньзэ вормылӥз. Котьку калыклэсь пӧртэм луыны тыршылӥз.

Огпол шоркарлудын кампет пумысен бадӟым куашетон ӝутэм. Котыраз трос калык люкаськем, соку полиция вузкарисез сиеста вакыт лавказэ усьтыса, бӧрдӥсь пияшлы кампет кузьманы косэм.

Пияшлэн мултэс кышканъёсыз (кылсярысь, ӟозлэсь), ас ёзъёсыныз эшъяськыны люкетылӥзы. Эшъёсыз, ӵемысь серем карыса, эшшо юнгес кышкатъязы. Со сярысь берло Дали «Тайная жизнь Сальвадора Дали, рассказанная им самим» книгаяз гожтоз.

Егит дырыз

1922 арын Дали Сан-Фернандоысь Академие дышетскыны пыре. Анаез кулэм бере, «Резиденцие» (исп. Residencia de Estudiantes) студентъёслэн огъяулонниязы улыны выже.

Со дыре ик тодматске Луис Бунюэлен, Федерико Гарсиа Лоркаен, Педро Гарфиасэн. Фрейдлэн ужъёсыныз тунсыкъяськыны кутске.

Суредаськонын выль ӧръёсын тодматскыса, ас ужъёсаз кубизм но дадаизм амалъёсты кутыны эскере. 1926 арын, дышетӥсьёсын огкыл шедьтымтэез понна, Академиысь кошконо луэ.

Со арын ик нырысьсэ Париже вуэ. Отын тодматске Пабло Пикассоен. Ас ужан стильзэ шедьтыны тыршыса, 20-тӥ аръёслэн пумаз Пикассо но Жоан Миро юрттэм улсын кӧня ке ужъёссэ кылдытэ. 1929 арын Бунюэлен ӵош «Андалузский пёс» фильм кылдытонэ пыриське. Соку ик пумиське Гала нимо вуоно кузпалыныз (Елена Дмитриевна Дьяконоваен).

Быдэ вуон аръёсыз

Далилэн ужъёсыз ӵемгес но ӵемгес потаны кутско пӧртэм адӟытонъёсын. Сальвадор Дари суредасьлэн данэз будэ, нимыз тодмо луэ. 1929 арын сюрреалистъёсын тодматскыса, соослэн огазеяськоназы пыре. Со арын ик Галаен кузпалъяськон пумысен атаеныз даллашыса, гуртысьтыз кошконо луэ. Галаен 1934 арын официально кузпалъяськыса, США-е кошке.

Сюрреалистъёсын люкиськемез

1936 арын Испаниын граждан ож кутскем бере, Дали паллян позициосын сылӥсь сюрреалистъёсын даллашемез понна, сое огазеяськонысь потто. Соослы ӧчкарыса, Дали «Сюрреализм — со мон», шуыса гожтэ.

Сальвадор Дали политикалэсь палэнынгес улылӥз, соин ик солэсь монархической малпанъёссэ нокин учкалак ӧз карылы.

Творчествоезлэн азинскемез

1937 арын Италие вуылыса, тодмо суредась Ренессанс манерен гожтэм ужъёслы синмаське. Та дыре кылдытэм ужъёсаз шонер пропорциос но академизмлэн мукет люкетъёсыз адскыны кутско. Озьы ке но, сюрреализм амаллэсь палэнскыса но, Далилэн суредъёсаз сюрреализм шӧмыз шӧдӥське на.

Берлогес Дали искусствоез «модернистской деградацилэсь» утёнэз ас нимыныз герӟа. Малы ке шуоно, Salvador испан кылын «Утись» шуэмез возьматэ.

США-ын улэмез

Кыкетӥ Мировой война кутскемен валче, Дали Галаен США-е кошко но 1948 арозь отын уло. 1942 арын автор «Тайная жизнь Сальвадора Дали» беллетризованной автобиографизэ поттэ. Далилэн литературной ужъёсыз, суредъёсыз сямен ик, вылӥ дунъясько.

Та дыре ик кусыпъяське Уолт Диснеен, солэн ӵектэмезъя ассэ киноын эскере. Альфред Хичкоклэн «Заворожённый» фильмысьтыз уйвӧт сценалы декорациос лэсьтэ. Но коньдон ласян шуг-секытъёс кылдэмен валче, та сцена киноын туж вакчиыса возьматӥське.

Мӧйымон вакытэз

Испание берытскыса, Дали Каталоние интыяське. 1958 арын Галаеныз Жирон карын венчасько.

1965 арын, Париже вуыса, француз калыкез ас ужъёсызлы, адӟытонъёсызлы но аспӧртэмлыко луэмезлы синмаськытэ. Та дыре тунсыкъяськыны кутске вакчи метражъем киноосын но сюрреализм амалэн лэсьтэм туспуктэмъёсын. Далилэн туспуктэмъёсаз быгатыса но валаса быръем арбериос, интыос (кистӥськись ву, выж лёгет кузя тэтчаса васькись туп но мукет) но тунсыко комментариос фильмез аспӧртэм арт-хауслы пӧрмытӥзы.

Сальвадор Дали ас быгатонъёссэ шараян но ассэ возьматон учыръёсты огзэ но ӧз кельтылы. ӵемысь пыриськылӥз реклама кылдытонэ. Кылсярысь, учкисьлэн тодаз кемалы кылиз рекламной ролик, кудаз Далилэн мыйкызез бабыльске, шоколадэз веръяса.

В 1981 арын Далилэн тазалыкез лябӟе, Паркинсон нимо висён аляны кутске. 1982 арын Гала кузпалыз кулэ.

Берпуметӥ улон аръёсыз

Кузпалыз кулэм бере, Дали секыт депрессие усе. Та вакытэ кылдытэм ужъёсаз шӧдӥсько мӧзмон но куректон. Кылсярысь, «Пьета» темая вариациос. Секыт висёнэз люкетэ ужаны, суреданы. Далилэн берпум ужъёсаз («Петушиные бои») огшоры гож пусъёсын мырдэмен валасько персонаж мугоръёс.

1989 арлэн кутсконаз Дали «сердечная недостаточность» диагнозэн эмъяськонние шеде. Солэн берпуметӥез валаны быгатымон верамез «Мой друг Лорка» луэм.

Сальвадор Далилэн шайгуэз

Сальвадор Дали кулӥз 85 аресказ 1989 арын 23 толшоре. Кулон азяз быдӟым суредась ассэ ватыны ӧвӧл лэзем, солэн шайгу вылтӥз, пе, адямиос ветлыны мед быгатозы. Сальвадор Далилэн мугорыз Фигерас карысь одӥгаз театр-музейлэн выж улаз ватэмын.

Вань ужъёсыз Испанилы сӥземын.