Удмурт кылысь каронкыллэсь сям категоризэ эскерон история

Википедиысь материал
Перейти к навигации Перейти к поиску

Удмурт кылрадъянэз (морфологиез) тодослыко эскерон кык сю арлэсь кема кыстӥське ни. Солэн азинскон сюресаз пӧртэм вакытъёс но ӧръёс висъяны луоно.

Пӧртэм вакытысь тодосчиослэсь ужъёссэс но ужан амалъёссэс эскерыса, удмурт каронкылэз дышетон-эскеронын ньыль вакыт висъяны луоно.

  • I-тӥ вакыт герӟаськемын XVIII дауре потэм кылрадъянъёсын каронкылэз дышетон амалъёсты эскеронэн;
  • II-тӥ вакытлэн азинскемез XIX даурлэн шорысеныз ХХ даурлэн кутсконозяз кыстӥське, куке удмурт кылтодонэз эскерон бордын кунгожсьӧр тодосчиос тыршизы;
  • III-тӥ вакыт кыстӥськиз 1920-тӥ аръёсысен 1950-тӥ аръёсозь;
  • IV-ез вакыт герӟаськемын удмурт кылрадъянлэн ХХ-тӥ даурлэн шорысеныз туннэ нуналозь азинскеменыз.

I-тӥ вакыт. Удмурт морфологи традициослэн кылдэмзы герӟаськемын 1775-тӥ арын печатласа поттэм нырысетӥ удмурт грамматикаен но М. Могилинлэн «Краткой отяцкiя Грамматики опытъ» (1786) кигожтэм кылрадъянэныз.

Кыказ ик кылрадъянъёсын каронкылэз эскеронлы нимысьтыз саклык висъяське, соос пӧлын сям категориез дышетонлы но. Та ужъёслэсь матын луэмзэс но пӧртэмлыкъёссэс адӟыны луэ таблицаысь:

  • ГСУЯ (1962): изъявительной, повелительной, условной.
  • «Сочиненiя принадлежащiя къ грамматикѣ вотскаго языка» (1775):изъявительной, повелительной, сослагательной (-вал), желательной (-сал), неопределенной (-ны,-са,-сь + сямен)
  • М. Могилин «Краткой отяцкiя грамматики опыт» (1786): изъявительной, повелительной, сослагательной (-сал,-вал,-лляй).

II-тӥ вакытлы кутскон сётӥз Ф. Й. Видеманнлэн немец кылын гожтэм но 1851-тӥ арын печатласа поттэм удмурт кылъя грамматикаез. XVIII дауре поттэм грамматикаосын ӵошатыса, эстон тодосчи удмурт каронкыл понна куинь сям форма висъя. Котькудӥзлэсь каблэсь положительной но отрицательной формаоссэс нимаз-нимаз сётэ. Нырысетӥ грамматикаосын ӵошатоно ке, Ф. Й. Видеманн сям кабъёслэн кутӥськон амалъёссылы но мугъёссылы радызъя валэктон сётэ ни, ӵем дыръя соосты мукет финн-угор кылъёсын яке немец кылысь сямкылъёслэн кутӥськеменызы ӵошатэ.

Каронкыллэн вошъяськон кабъёсыз озьы ик эскеремын Т. Аминоффлэн «Удмурт фонетикая но грамматикая очеркъёс» (1896) ужаз но. Ф. Видеманнлэсь пӧртэм луыса, финн тодосчи каронкылъёслэн вошъяськоназы ньыль сям кабъёсты висъя: ивортон, луонлык но косон сямъёс, со сяна та ужын нимысьтыз висъямын на оптатив нимо каб. Татчы автор пыртэ мед но медаз кылъёсын пӧрмем формаосты, кудъёссэ Ф. Видеманн пыртӥз вал повелительной наклонение пӧлы:

1 med bas'to med bas'tom(õ)
2 med bas'tod med bas'todõ
3 med bas'toz med bas'tozõ

Тунсыко пусйыны созэ но: Ф. Видеманн медаз кыллэсь быдэс парадигмазэ сётэ ке вал, Т. Аминофф солэсь вань формаоссэ висъя луыны глаголэн кутӥськыкуз гинэ:

1 medam lu(y) medam luё
2 medad lu(y) medad luё
3 medaz lu(y) medaz luё

Кунгож сьӧрысь тодосчиос, удмурт каронкылэз эскерыкузы, оглом шонер висъязы ни солэсь сям категоризэ но пӧртэм ласянь сое сэрттӥзы-пертчизы:

  • ГСУЯ (1962): изъявительной, повелительной, условной.
  • F. Wiedemann «Grammatik der wotjakischen Sprache» (1851): Indicativ, :Imperativ (1 л. тр. л. = гл. али дыр формаез; 2 л. од. л. = гл. кылвыжыез; 3 л.: мед + гл. ортчем дыр полож.формаез. Отр.: ön; medam, medad, medaz, medamy, medady, medazy + lesʹty), :Conditionalis (-sal: öj +sal: öz s'otysal).
  • T. Aminoff «Votjakin äänne ja muoto-opin luonnos» (1896): :Indikatiivi, :Imperatiivi (2 л.: vera, veralё), :Konditsionaali (-sal :öj, öd, öz +sal), Optatiivi (а) med + каронкыллэн вошъяськись формаез; б) medaz + каронкыл(3 л. гинэ)

III-тӥ вакытлэн кутскемез герӟаськемын Быдӟым Октябрь революция ортчем бере Удмурт шаерысь но кунгож сьӧрысь финно-угроведенилэн нимаз-нимаз азинскыны кутскеменызы. XVIII-тӥ даурлэн пумаз кунгож сьӧрысь тодосчиос удмурт кылэз эскеронлы ӟеч инъет сётӥзы ни ке но вал, 1920 – 1930-тӥ аръёсы удмурт кылэз эскерон борды басьтӥськем тодосчиос каронкылэз эскеронэ выль сямен басьтӥськизы. Но ӵем дыръя янгышъёс лэсьтылӥзы: яке эскероно кыл явленизылы солы тупасьтэм ним сётылӥзы, яке кыӵе ке кылрадъян категориосты солы тупасьтэм ним сётылӥзы, яке кыӵе ке категориосты солы тупасьтэм примеръёсын юнматылӥзы, яке висъям парадигмаязы мултэс луись ёзъёс висъяллязы.

  • ГСУЯ (1962): изъявительной, повелительной, условной.
  • Глезденев П. И. (1921 г.): изъявительной, повелительной, желательной, неопределенной, принудительной первого вида, принудительной второго вида, сослагательно-условной.
  • Верещагин Г. Е. (1924 г.): изъявительной, повелительной, желательной, неопределенной.
  • Горохов П. Д. (1929 г.): изъявительной, косон сям, луонъя сям, неопределенной, малпам сям (желательной).
  • Главатских А. И. (1933 г.): возьматӥсь карон, косон карон, луонъя карон, тодымтэ карон.
  • Жуйков С. П. (1937): изъявительной, повелительной, условной, понудительной, желательной.
  • Емельянов А. П. (1927 г.): изъявительной, повелительной, сослагательной, желательной.

IV-тӥ вакытлэн кутскемез герӟаськемын 1962-тӥ арын «Грамматика современного удмуртского языка (ГСУЯ)» книга потэмен, кудӥз каронкыллэсь сям категоризэ эскерон ласянь мынӥсь ченгешонъёслы пум пуктӥз. Озьы удмурт кыл понна висъямын вал куинь сям кабъёс: ивортон, луонлык но косон сямъёс.

Каронкыллэсь сям категоризэ эскерыку, та вакытэ гожъясь тодосчиос нош ик саклык висъяны кутскизы сям кабез возьматон пӧртэмлыкъёссылы (аналитической но синтетической формаосты), сям каблэсь веранъёсын кутӥськон мугъёссылы, соослэн семантика ласянь пӧртэм пуштросэз усьтыны быгатэмзылы. Та удысын бадӟым уж нуо И. В. Тараканов, В. К. Кельмаков, Райя Бартенс но мукетъёсыз.

Мукет ласянь, ньылетӥ вакытэ ужась тодосиос нимысьтыз саклык висъяны кутскизы каронкыллэн сям кабезлэн история ласянь азинскемзэ эскеронлы но. Кылсярысь, та ласянь тунсыко луо зуч академик Б. А. Серебренниковлэн, финн тодосчи Р. Бартенслэн но венгер тодосчи Ш. Чучлэн диахрония амалэз уже кутыса гожтэм ужъёссы.

Удмурт морфологилэн XVIII даурысен кутскыса туннэ нуналозь азинскытозяз каронкыллэсь сям категоризэ эскерон нимысьтыз инты басьтӥз. Оглом басьтыса, тужгес но ожыт тэкшеронъёс мынӥзы ивортон но косон сямъёслэн пӧрмемзы но кутӥськемзы ласянь. Тужгес но трос вераськонъёс мынӥзы но мыно условной но желательной сям кабъёсты висъян пумысен.