Яшин, Даниил Александрович

Даниил Александрович Яшин
	Даниил Александрович Яшин
Ужан удысэз:	кылбурчи[d]
Вордӥськем нуналыз:	24-тӥ толсуре 1929
Кун:	СССР
Кулон нуналыз:	29-тӥ шуркынмонэ 1988 (58 ар)
Кулон интыез:	Иж, Удмурт Автономной Советской Социалистической Республика, РСФСР, СССР

Даниил Александрович Яшин (1929—1988) Можга ёросысь Вуж Какся гуртын вордӥськиз. Пинал дырыз Данииллэн туж секыт вал. Сизьым арес дыръяз атайтэк кылиз. Быдӟым Атыкай ож кутскыку ик ваньмыз ньылез агайёсыз ивортэк ож бусые ышизы. Номыр соос сярысь тодмо ӧй вал, нош кыкезлэн быремзы сярысь похоронка вуиз. Анаез, весь дугдылытэк бӧрдыса улонтияз, дыр, синтэм кылиз. Табере анаезлэн кылиз одӥг пиез, со ик луиз вань осконэз. Даниил котьку юрттӥз анаезлы котькыӵе ужын: бусыын но, юртъер котырын но. Анаез малпа вал, пиез нянь будэтӥсь луоз шуыса. Озьы оз кылды. Пинал дыръяз ик Даниил ас улонзэ калыкезлэн адӟонэныз герӟаны малпаз.

Вуж Какся гуртысь школазэ быдтыса, Даниил Яшин Можга педтехникуме пыре. Сое йылпумъян аре печатламын вал «Вало возь» нырысетӥ кылбурез. Егит кылбурчи шӧдэ вал, кылыз но стилез бордын трос ужано на шуыса. Угось соку гинэ пӧрмоз зэмос, калыклэн сюлэмаз пыӵамон кылбур. А. С. Измайлова-Зуевалэн пусъемезъя, та ужез кылбурет удысэ бадӟым вамыш вал, но зэмос поэзия со ӧй вал на, пе. Озьы сюресъёс вуттӥзы Яшинэз Удмурт пединститутысь кылъя но литературая факультетэ. Татысь дышетсконзэ йылпумъям бере, тодосчи Глазкар пединститутэ ыстэмын вал.

Куамын арлэсь трос Удмурт пединститутысь литературно-творческой кружокен кивалтӥз. Кылбурчи ваньмон дырзэ егит гожъяськисьёсызлы сӥзьылӥз. Котькуд выль вормонъёссылы шумпотэ вал, данъяське «будэтэм» пиналъёсыныз. Кружоклэн занятиосаз студентъёс кылбур гожъян амалъёсын, прозаез гожъянэн тодматскылӥзы. Пӧртэм аръёсы Даниил Яшинлэн «бурд улаз» гожъяськизы В. Романов, В. Ившин, Ан. Леонтьев, Ан. Перевозчиков, Р. Валишин, П. Куликов, О. Четкарев но мукетыз

Д. Яшин — дышетӥсь

Глазкар пединститутысен (1951) Д. Яшин аслэсьтыз улонзэ егит дышетисьёслы тодон-валан сётонэн герӟа. 1959-тӥ арысен со Удмурт пединститутын (1972 — Удмурт кун университет) дышетӥсь-доцент луыса тырше. Куамын арлэсь трос Даниил Александрович кунмылэн вузъёсаз калык кылосбурез но удмурт литератураез дышетӥз, соослэн методикаенызы тодматӥз. Солэсь дышетэм студентъёссэ кунмылэн пӧртэм сэрегъёсаз пумитаны быгатӥськомы. Проф. И. В. Тараканов туж шуныт кылъёсын тодаз вае Даниил Яшинлэсь ужамзэ: «…Лекцизэ со котьку дыртытэк лыдӟе вал, валтӥсь малпанъёсты дышетскись мед гожтыны вуттоз шуыса. Ноку но кагаз вылысь ӧз лыдӟылы, котьку выль сямен, студентлы валамон вералляз. Лекцизэ веракуз, пукисьёслы юанъёс сётъялляз, валазы-а меда ӧз-а шуыса валаны тыршыса…».

Д. Яшин — тодосчи

Удмурт музъемлэн пиез улытозяз весь дышетскиз, выль книгаос бордын ужаз. 1962-1965-тӥ аръёсы аспирантураын дышетскиз, 196-тӥ арын удмурт калык выжыкылъя кандидат диссертацизэ утиз, ар улыса солы доцент ним сётизы. Трос вакыт ӵоже пӧртэм дышетсконниосын ужатозяз, фольклоръя но удмурт литературая лекциос кылдытӥз, студентъёсты финн-угор калыкъёслэн лулчеберетэнызы тодматӥз, педпрактикае но фольклор экспедициосы поталляз. Вакчи улонэз куспын Даниил Яшин кызьлэсь трос тодослыко ужъёс но учебникъёс, 400-лэсь ятыр тодослыко статьяос гожтыны вуттӥз.

Кылбурчи

Д. Яшин-кылбурчи удмурт кылбуретэ 1950-тӥ аръёслэн пумазы вамыштӥз. Нырысетӥ кылбуръёсын бичетэз «Ортчисьтэм егит дыр» («Непроходящая молодость») 1959-тӥ арын потӥз. Даниил Яшинлэн 12 кылбур бичетъёсыз потӥзы (кыкез соос пӧлысь пиналъёслы), тросэз соос Россиысь литератураын бадӟым инты басьто, кылсярысь «Эшъёс ке вань» («Если есть друзья»), «Ыркыт тӧл» («Свежий ветер») но мукетыз. Яшинлэсь лириказэ аспӧртэмлыко каре лиризм, озьы ик кылбуръёсызлэн калык сямъёслы (традициослы) матын луэмзы («Зэрпал лёгет»). Солэн лирикаез югытэзлы, шунытэзлы, ненегезлы, адямилэн сюлмо луэмезлы сӥземын.

Кылбурчи егитлыкез, эшъяськонэз туж вылэ ӝутӥз, трос солэн озьы ик кылбуръёсыз, кудъёсаз юмор но ирония валтӥсь инты басьто. Но со лек серекъян ӧвӧл — капчиен, эшлыко серекъян, нокинлы вӧсьсэ но уродзэ ваисьтэм.

Калык кылосбур тросэзлэн кылбуръёсызлэн инъетэз луэ. Одӥг пол лыдӟыса, сое валаны но уг луы кадь. Кыӵе ке вакчи чуръёсын ӵемысь ватэмын луэ кылдытӥсьлэн (авторлэн) ас калыкез, солэн сям-йылолъёсыз понна сюлмаськемез. Та но, дыр, Даниил Яшинлэсь поэзизэ мукет кылдытӥсьёслэсь (авторъёслэсь) аспӧртэмлыкогес, солы гинэ тупась каре. Озьы ик Даниил Яшинлэн кылбуръёсыз пуштросэнызы туж узыресь, кудъёссыз ас сяменызы эпослы матын луо. Автор котькуд адямилы матын луыны турттэ, ӟуч эстрадной лирикалэн тулкымез пала кыстӥське. Кылбуръёсысьтыз чуръёс али дыре но калык пӧлын вӧлмемын.

Даниил Яшин кытчы ке дыртыса кадь улӥз. Кыӵе уж борды гинэ ӧз кутскылы со, ваньмыз пӧрмылӥз. «Мед кылёз пытьы» кылбурез луэ вань улонэзлы девиз выллем:

Вамыштоно ке — мед кылёз пытьы,
Вазиськоно ке — мед кылёз куара.

Анна Райкова, Галина Глухова