Смоленск
| Кар
Смоленск
 54°46′58″ с. ш. 32°02′43″ в. д.HGЯO
| ||||||||||||||||||||||||||||||||||||
  Смоленск | ||||||||||||||||||||||||||||||||||||
.png)
_(2001).png)
Смоле́нск — Россиысь кар, Смоленск улослэн административной, промышленной но культурной центрез. Россиысь одӥгез вашкалаез город, 1985-тӥ арын 6-тӥ куартолэзьысен «Город-герой» ним нуллэ, данъямын Ленинлэн но Отечественной войналэн I степенё орденъёсын, «Зарни Кизили» медален.
Смоленскез азьло дырысен «злой город» нималлям. Уноез тушмонъёс, Москваез киултыны малпаса, нырысь ыштонъёссэс адӟизы ни Смоленскын: отын улӥсьёс котькыӵе вакытъёсы дась вылӥллям Родиназэс утьыны. Бадӟым кайгу, сютэм улон, трос ыштонъёс усизы город вылэ Быдӟым Атыкай ож дыръя но.
Быдӟым ож вакытэ нацистъёс Смоленск улосысь 5 сюрслэсь уно гуртъёсыз но черкогуртъёсыз сутӥллям, соос пӧлысь ог 300-зэ – улӥсьёсыныз валче. Кунысьтымы чрезвычайной комиссилэн ивортэмезъя, со аръёсы быризы 546 сюрс пала оже пыриськымтэ огшоры улӥсьёс.
Смоленск котырын кӧшкемыт ожмаськон ортчиз 1941-тӥ арын 10-тӥ июльысен 10-тӥ сентябрёзь. Со шӧдскымон дугдытӥз Москваез киултыны дыртӥсь тушмонъёсыз. Ассэ городэз утёно луиз 15-тӥ июльысен 28-тӥ июлёзь. Но трос ыштонъёсыз адӟыса, 1941-тӥ арын 16-тӥ июле Совето Армилы городэз кельтоно луиз, И.Сталин приказ ке но сётӥз, Смоленскез котькызьы асьме киын возёно шуыса. Выльысь город берыктэмын вал 1943-тӥ арын 25-тӥ сентябре Смоленск-Рославль операцилы луыса.
Туала Смоленск – пичи яркыт город. Отын артэ сыло пӧртэм стильем пӧртэм вакытъёсы пуктэм юртъёс, синпелетъёс. Кылсярысь, ог-огзылы туж матэ пуктылэмын Фёдор Конь зодчийлы, А. Суворов полководецлы, М. Исаковский гожъяськисьлы, В. Ленинлы но мукет синпелетъёс.
Но тужгес бадӟым данъяськонэз, дыр - 16-тӥ-17-тӥ дауръёсы пуктэм кремльлэн борддоръёсыз, соос городлэн вуж люкетаз котькытын пумисько. Азьвыл со одӥг кузь, кульчо сямен пуктэм борддор вылэм, кылдытӥллям сое тушмонъёслэсь утиськон вылысь, но туннэ нуналозь кремль копакыз возиськемын ӧвӧл. Соин ик табере со Днепр ярдуртӥ нимаз пуктылэм борддоръёслы укша, кытын ке кузьдалаез кӧня ке метр, кытын ке – кӧня ке иськем. Кремльлэн одӥгаз борддораз нимысьтыз плитаос бордын карлэн историез вакчияк гожтэмын, валамон, нимысьтыз саклык висъямын ассэ кремлез пуктонлы но.
Борддор кузя ик Геройёсыз бурё ваён сквер вань. Отын – «Благодарная Россия» синпелет, М.Кутузовлэн бюстэз, ож сярысь кылбуръёсын плитаос интыясько. Скверлэсь кыдёкын ӧвӧл – Лопатинлэн садаз – Смоленскез утисьёслы, пехотая Софийской полклы, Родинамес тушмонлэсь мозмытӥсьёслы синпелетъёс сыло, отынгес ик – пушка. Озьы ик городын тодмостэмын уно интыос, кытын кыӵе ке полкъёс, армиос быризы яке юнме шорысь нацистъёсын быдтэм огшоры адямиослэн огъя шайвылъёссы интыясько.
Озьы ик городын вань Город-геройёслэн нимысьтыз аллеязы. Со интыяське кремльлэн борддорез кузя, нырысь ик азе сюре Ялан ӝуась тыл, собере - «Город-герой» нимын пусъем 12 каръёслы но «Крепость-герой» нимын пусъем Брест крепостьлы пичияк синпелетъёс.
Озьы ик Смоленскын паймытэ вӧсяськон интыослэн лыдзы – котькытысен одӥг ке но черк адӟиське, оглом соос 10-лэсь уно, нош вӧсь огазеськонъёссы 60-лэсь трос лыдъясько. Со сяна, вань католик костёл но.
-
Смоленскысь черкъёс -
-
Смоленскысь черк -
Смоленскысь кремль
