Айкай (театр)

Википедиысь материал
(Ыстэмын ««Айкай»» бамысь)
Перейти к навигации Перейти к поиску

Фольклор кырӟанъя «Айкай» кун театр кылдӥз 1990-тӥ арын УАССР-ысь Композиторъёслэн союззы бордысь концертной коллективын воштӥськонъёс ортчем бере. «Айкай» жин-жин возьматэ пӧртэм калыкъёслэсь эктонъёссэс, кырӟанъёссэс, сям-йылолъёссэс. Но тужгес бадӟым саклык висъя удмурт фольклорлы, калыклы. Шаермылэн зарни фондэз, шуыны луоз, «Весенние игрища на горе «Айкай», «Сюан», «Армие келян», «Пӧйшурасьёс», «Йӧ келян», «Выль кен дӥсян» постановкаоссы, Татарстанысь Балтаси ёросысь удмуртъёслэн «Апай сямен эктон», «Зыгытларской», «Слободская кадриль», «Бондари», «Озорные гармонисты», «Сон шамана» тапыртонъёссы. Калык туж яратӥз «Урам гуръёс», «Вамыштомы артэ», «Тон-а со?», «Мон бачям мертто тӧдьы льӧмпу» но мукет кырӟанъёссэс.

Пусъёно: удмурт постановкаос дасям сяна, айкайёс тупен-тупен возьмато пор, бигер, мадьяр, фин, мордва калыкъёслэсь йылолъёссэс но. Артистъёслы визь-кенешен юртто дано постановщикъёс: А. Поздеев, А. Прокопьев, П. Данилов, Е. Серебренников, Н. Чиркова, М. Роготнева, Д. Кургузова.

Вератэк кельтыны уг луы та ансамбльлэсь сцена вылэ потыны дасям костюмъёссэ. Огезлэсь пӧртэм мукетыз кильтроесь, таш-таш удмурт шӧмоесь. Талы луыса учкись син азяз рос-прос пуктыны быгатэ, шуом, кызьы дӥсяськизы вашкала лымшор удмуртъёс но уйпал удмуртъёс. «Айкайысь» постановщикъёс но артистъёс мыло-кыдо ортчытъяло мастер-классъёс. Соос сӥземын луо я удмурт дӥсьлы, я удмурт эктонлы, гурлы.

1994-тӥ арын «Айкай» «Шондибан» коми-пермяк ансамблен ӵош бадӟым концерт сётӥз. Нош 1995-тӥ арын Венгриысь «Альбарегия» коллективен валче кырӟазы-веразы. Ӧз вунэтэ Татарстанысь Балтаси ёросысь удмуртъёс сярысь но.

Та коллектив ӵемысь пыриськылэ Удмурт шаерын ортчылӥсь бадӟым ужрадъёсы. Быгатэмзэс возьмато палэнын но - Мускоын, Казаньын, Пермьын... Трос пол поталлязы ини кунгож сьӧрысь учкись доры.

1991-тӥ арын Швециын, Венгриын, Италиын, Швейцариын, Финляндиын, Хорватиын, Германиын, Нидерландын ортчылэм калыккуспо фольклор фестивальёсысь «Айкай» тужгес устоез фольклор ансамбль нимын берытскиз.

1995-тӥ арын коллектив пусъемын Удмурт Республикаысь кун премиен.

2003-тӥ арын Фольклор кырӟанъя «Айкай» удмурт театр луиз Фольклор кырњанъя «Айкай» кун театр. Отын туннэ нуналлы ваньмыз-ӧвӧлэз 25 адями: кырасьёс, эктӥсьёс, крезьгур инструментъёсын шудӥсьёс но мукет. Пӧлысьтызы куинез - Россия Федерациысь дано артистъёс, ньылез - Удмурт Республикаысь калык кырӟасьёс, витез - Удмурт Республикалэн дано артистъёсыз. Чеберлыкъя кивалтӥсез - Е. Серебренников - Россия Федерациысь дано артист, Удмурт Республикаысь калык кырӟась. «Айкайлэн» кивалтӥсез - П. Данилов - Удмурт шаерысь искусство удысысь дано ужась.

Чӧлсконъёс[Тупатыны | вики-текстэз тупатыны]