Арня ӵукна
«Арня ӵукна» – Удмурт радиоын уно аръёс ӵоже арня нуналъёсы потӥсь литературно-музыкальной радиожурнал.
Нырысьсэ «Арня ӵукна» эфире потӥз 3 мартэ 1955 аре. Радиожурнал кылдытэмын вал со вакытэ Удмурт радиоын ужась кылбурчилэн Гай Сабитовлэн кичӧлтэмезъя. Со ачиз ик луиз та радиожурналлэн нырысетӥ нуисез но сое кызь ар ӵоже нуиз, соин ик «Арня ӵукна» радиожурналлэн нимыз люконтэм герӟаськемын Гай Сабитовлэн нимыныз. Озьы ик, «Арня ӵукнаез» пӧртэм вакытъёсы нуэм мукет журналистъёс но туж нимо-дано луо: Милитина Гаврилова (Решитько), Ольга Ведрова, Анастасия Гребина. «Арня ӵукналэн» нырысетӥ режиссёрез вал Борис Саушкин, собере – Анатолий Митрофанов но Леонид Гусев.
«Арня ӵукналэн» тематикаез – Удмуртиысь культура но устолык, удмурт композиторъёслэн, суредасьёслэн, писательёслэн но театр удысын ужасьёслэн выль ужъёссы, озьы ик, музейёслэн, библиотекаослэн ужамзы.
«Арня ӵукналэсь» адӟем карыса ик Удмурт радиоын кылдытэмын вал мукет передачаос но: «Ладилэн азбараз», «Кылбурет удысын», «Ялыке», «Марӟанъёс».