Иворъёс:2007-11-06

Википедиысь материал
06.11.2007

Ижысь чугун сюреслэн — выль кивалтӥсез

Информационной агентствоослэн ивортэмзыя, 6 ноябре асьме шаерын тодматскозы Горькийысь чугун сюреслэн (ГЖД-лэн) Ижысь люкетэзлэн выль кивалтӥсеныз Александр Лапшинэн. Со воштӥз азьвыл кивалтӥсез Александр Рябковез — Александр Николаевич али выль должносте выжтэмын, сое ГЖД-лэн валтӥсь инженераз юнматӥзы. Нош выль кивалтӥсез возьматыны Удмуртие лыктӥз ачиз ГЖД-лэн кивалтӥсез Сергей Козырев. Возьматонлэн церемонияз люкаськозы Удмурт Республикалэн правительствоысьтыз но Иж карлэн администрациысьтыз муртъёс, чугун сюрестӥ уката уно грузъёсты келяллясь предприятиослэн ыстэм муртъёссы. Собере Правительстволэн юртаз Сергей Козыревен уж форматын пумиськоз Удмурт Республикаысь президент Александр Волков.

Александр Аркадьевич Лапшин вордскемын 1956 аре 2 толшоре. Вань улонзэ со герӟаз чугун сюрес вылын ужанын. 1973 арысен со ужаны кутскиз Огырчиысь локомотив депоын — нырысь слесарь-ремонтник луыса, собере ини луиз машинистлэн юрттӥсез, машинист, машинист-инструктор. 1990 арысен 1998 арозь — Огырчи депоысь кивалтӥсезлэн воштӥсез, валтӥсь инженер. 1998 арысен 2005 арозь — Огырчиысь локомотив деполэн кивалтӥсез. 2005 аре со луиз ГЖД-лэн Иж люкетысьтыз кивалтӥсьлэн воштӥсеныз – поездъёс ветлон удысын кышкыттэмлыкъя валтӥсь ревизорен; со аре ик толсур толэзе Лапшин — ГЖД-лэн Иж люкетысьтыз кивалтӥсьлэн нырысетӥ воштӥсез.

Александр Лапшин — Горькийысь чугун сюреслэн сӥё-дано ужасез.