Удмуртская правда (газет)

Википедиысь материал
(Ыстэмын «Ижевская правда» бамысь)
Перейти к навигации Перейти к поиску

Удмуртская правда — республикаысьтымы огъя югдурез возьматӥсь газет. Потэ ӟуч кылын. Газетлэн учредительёсыз Удмурт Республикаысь Кун Кенеш но Правительство.

Газетлэн нырысетӥ номерез потӥз 1917-тӥ арын 7-тӥ сентябре "Известия Ижевского совета рабочих, солдатских и крестьянских депутатов" нимын. Газетлэн кылдытӥсез но нырысетӥ редакторез В. А. Матвеев. Бӧрысь 1918-тӥ арын августэ Ижын но Воткаын ӝутӥськем вожвылъяськон дыръя газет выжиз Сарапулэ. Татын со "Борьба" нимын потыны кутскиз. Озьы ке но революцилэн комитетэз изданиез берыктӥз Иже, татын 1918-тӥ арын 4-тӥ декабре со "Ижевская правда" нимын потыны ӧдъяз. Соку редактор луиз Азинлэн дивизиысьтыз комиссар, Петроградысь журналист Д. Ф. Зорин.

Озьы ке но Колчаклэн дивизиез Ижын кузёяськон вакытэ 1919-тӥ арын тулыс газет потэмысь дугдӥз. Выльысь со югыт дуннеез адӟиз 30-тӥ июне 1919-тӥ арын.

Нош 1937-тӥ арын 15-тӥ мартэ газет нимзэ воштӥз но луиз "Удмуртская правда". 1967-тӥ арын газетэз пусйизы "Знак Почёта" орденэн.

Удмурт правдаен кивалтӥзы редакторъёс: Е. В. Русинова, В. К. Тронин, А. Н. Колбина, Я. А. Кривицкий, Б. С. Вихарев, М. И. Гнедин, В. Н. Алексеев, Ю.Ф. Кедров, В. А. Злобин, Б. И. Климантов, Л. И. Каткова, Н. И. Нестеренко. туала редактор - С. Г. Сентякова.

Кылсярысь, Юрий Филиппович Кедров — тодмо удмурт писательлэн Филипп Кедровлэн пиез. Вуоно редактор вордскиз 1937-тӥ арын Ижын. Йылпумъяз Свердловскысь юридической институтэз. Кема аръёс ужаз Удмурт телевидениын но радиоын. 1986-тӥ -1990-тӥ аръёсы валтӥз "Удмуртская правда" газетэз. 1990-тӥ арын кивалтӥз Удмурт Республикалэн суверинетэзлы сӥзем Декларациез кылдытон группаен, чаклаз Удмуртилэсь гербзэ, флагзэ но гимнзэ кылдытонэз.

Газетлэн огазеям тиражез ог 18 сюрс экземпляр. Татын лыдӟисьёс шедьто «Сфера интересов», «Здоровье и жизнь», «Час письма», «Культура», «Национальная палитра», «Сохраним окружающий мир», «Литературный клуб» но мукет тунсыко рубрикаосты.