Киров карлэн историез

Википедиысь материал
(Ыстэмын «Киров (история)» бамысь)
Перейти к навигации Перейти к поиску

Н. М. Карамзинлэн «Российской Государстволэн Историез» книгаын пусъёмын: туала Киров котырысь музъемъёс вылын 1174-тӥ арын ӟуч адямиос интыяськизы.

1374-тӥ арын Новгородысь ушкуйникъёс Вятка гурт кылдыто, котырыто сое йылсам юбоослэсь лэсьтэм кенерен.

1391-тӥ арын Бектут бигер ханлэн кивалтэмез улсын гурт быдэсак сутэмын вал. Со дырысен Мускоысь но Зарни Ордаысь ожгарчиос ӵемысь вуылыны кутско.

1401-тӥ арын галицкой князъёс та музъемъёсын кивалтыны кутско. Мусколэн политикаезлы пумитъяськыса, кремль ӝутэмын но выль карлы Хлынов ним сётэмын (матын бызись Хлыновица шурлэсь нимзэ санэ басьтыса, карлы сыӵе ним, пе, сётӥзы).

1489-тӥ арын Хлынов Муско кун борды весяклы итӥськиз.

1580-тӥ арын Иван Грозныйлэн сётэм грамотаезъя Трифон нимо монастырез ӝутыны кутско. Пумозяз вутто 1689-тӥ арын. Та дырозь со архитектурной ансамбльлэн Успенской соборез гинэ кылемын. Со – Ватка музъем вылын излэсь нырысетӥ лэсьтэм вашкала синпелет луэ.

1624-тӥ арысен Хлыновын Новодевичий Преображенской монастырьлэн юртэз ӝутыны кутскемын. Ог люкетэз – Преображенской черкез – та дырозь утемын.Поморье, Поволжье, Урал но Сибирь улосъёсы ортчись вузкарон сюресъёс карлы азинскыны юрттӥзы. XVII-тӥ дауре Хлыновын 726 улон юрт, 17 черк, 2 монастырь, 118 вузкаронни, 22 кебит, 13 вуко, 6 кармунчо лыдъяське ни вал.

1708-тӥ арозь Хлынов Сибирской губерние пыре вал. 1727-тӥ арысен Кузон губернилэн люкетэз луиз.

1722-тӥ арын Хлыновын нырысетӥ школа усьтэмын. 1758-тӥ арын сое выжыто духовной семинарие. 1811-тӥ арын пиосъёслы гимназия усьтэмын.

1780-тӥ арын Екатерина II-лэн указезъя Вятка наместничество кылдытэмын но Хлыновлы Вятка выль ним сётэмын. 1797-тӥ арын наместничество интые губерния кылдыто. Со арысен Вятка – губернской город лыдъяськыны кутскиз. Карысь юртъёсты лэстонъя выль план юнматэмын (шуом, ульчаосты шонертон, излэсь юртъёсты ӝутон). 1897-тӥ арын Вятка карын 25 сюрс адями улэ вал.

1895-тӥ арын Вятка кар доры чугун сюресэз вутто. 1906-тӥ арын чугун сюрес Вяткаез Петербурген герӟаны кутске.

1916-тӥ арын карын 44 промышленной предприятие лыдъяське, кытын 2 сюрслэсь ятыр адямиос ужало.

1929-тӥ арын Ватка Нижегородской улосвылосэ пырыны кутске. 1934-тӥ арын Вяткалы выль ним сёто – Киров, но кылдыто Кировской улосвылос.