Кун

Википедиысь материал

Кун — мер улонэн кивалтӥсь политической форма, кудӥз публичной властьлэн кылдэменыз но уженыз сэрен кылдытӥське. Публичной власть ик — нимаз сӧзнэт, кудӥз мер улонлэн валтӥсь удысъёсыныз кивалтэ но кужмысь карон вылэ пыкъяське кулэ дыръя.

Кун лэсьтӥське территориальной принципъя бере, та кыл куддыръя умойтэм кутӥське «шаер» кыллэн синонимез выллем.

Кунъёслэн пӧртэм типъёссы вань — рабовладельческой, феодальной, капиталистической, социалистической; кивалтон амалъя — монархия (абсолютной но конституционной), республика (парламент но президент), совето республика; территориослы люкиськонъя — унитарной кун но федеративной кун. Али (южтолэзе 2015 аре) дуннеын 194 кун. Ватикан сяна ваньзы пыро Огазеяськем Нациослэн Организацизылэн кун-ёзчиосыз пӧлы.

Тодметъёсыз[Тупатыны | вики-текстэз тупатыны]

Кунлэн валтӥсь тодметъёсыз:

  • Кун механизмез ӵош кылдытӥсь нимысьтыз ёзэсъёс (та механизмын нимаз интыез басьтэ эриктэманъя аппарат: армия, полиция но мукет сыӵеос). Мер улонлэн будэмез ысъя кун механизм ялан сложнойгес но ваёгес луэ.
  • Право вань — поведенилэн кунэн юнматэм одно ик правилоосыз. Кун, политической власть выллем, правоез уже кутыса юнматэ мер кусыпъёслэсь сётэм радзэс, тазьы ик кун механизмлэсь структуразэ но ужанрадзэ.
  • Кыӵе ке территория вань, кудӥзлэн гожъёсыныз та кун власть возиськылэ. Олокыӵе музъемез возьыса кун нациосты лэсьтылыны сэзь юрттӥз.

Пуштросэз[Тупатыны | вики-текстэз тупатыны]

Кун — классовой мерлыклэн валтӥсь политической ёзэсэз, нош мукетъёсыз вань на. Бадӟым мерлыкын кунэн ӵош пӧртэм партиос, союзъёс, религиозной огазеяськонъёс ужало. Соос кунэн ӵош мерлыклэсь политической организацизэ кылдыто. Классовой мерлыклэн мукет политической институтъёсызлэсь пӧртэмъяськыса кун мерлыкын вылӥ властез возе. Та аслыкез суверенность яке асэрик шуыса нимаське.

Кун властьлэн мукет пӧртэмлыкъёсыз:

  • универсальность — солэн кузёяськись кужымез вӧлме сётэм шаерлэн быдэс калыкез но вань мер огазеяськонъёсыз вылэ.
  • прерогативаос — кун власть котькыӵе мукет мер властьлэсь ужзэ воштыны быгатэ.
  • кужмысь каронэз монополия — котькыӵе мукет мер властьлэн эриктэманлы сётэм амалъёсыз ӧвӧл, кудъёсыныз кун власть кузёяське.