Ленин, Владимир Ильич

Владимир Ильич Ленин
Вордӥськыкуз сётэм нымыз:	Владимир Ильич Ульянов
Ужан удысэз:	политик но революционер
Вордӥськем нуналыз:	22-тӥ оштолэзе 1870({{padleft:1870|4|0}}-{{padleft:4|2|0}}-{{padleft:22|2|0}})[…]
Вордӥськем интыез:	Ульяновск, Симбирская губерния, Российской империя
Кун:	СССР
Кулон нуналыз:	21-тӥ толшоре 1924({{padleft:1924|4|0}}-{{padleft:1|2|0}}-{{padleft:21|2|0}})[…] (53 ар)
Кулон интыез:	Большие Горки, РСФСР, Советской Социалистической Республикаослэн Союззы
Автографез:
Владимир Ильич Ленин Викискладын

Владимир Ильич Ленин (зэмос нимтулыз Ульянов) — ӟуч, советской политической но кун ужчи, бадӟым йырвизё мурт, философ, марксизм-ленинизмлэн но большевистской партилэн инъясез, публицист, быдӟым пролетарской революционер, Быдӟым Октябрьской социалистической революцилэн организаторез, РСФСР-ысь но СССР-ысь Калык Комиссаръёслэн Кенешсылэн Председателез, Кенешо Россилы но Куинетӥ (Коммунистической) Интернационаллы инъет сётэм адями.

В. И. Ленин вордскиз 10-тӥ (22) апреле 1870-тӥ арын Симбирск городын (туала нимыз Ульяновск). Атаез — Илья Николаевич — дышетӥсь, егит дыръяз удыссэ мытӥз пичи классъёсты дышетӥсь бордысен, бӧрысь кивалтӥз Самара губерниысь калык училищеосын, дворян ним басьтӥз (улонысь кошкиз 1886-тӥ арын). Анаез — Мария Александровна Бланк — эмъясьлэн нылыз, дышетскиз дораз, кӧня ке кунгожсьӧр кылын вераськыны быгатӥз, роялен шудӥз, трос лыдӟиськиз. Владимир семьяысь куать нылпи пӧлысь куинетӥез вал. Ульяновъёс ог-огзэс валаса, туж тупаса улӥзы.

Школаын дышетскыкуз ик, Володя шӧдыны кутскиз со вакытысь обществолэсь шекъёссэ. Сочинениосаз но таӵе мылкыдъёссэ шараяз. Александр агаез, калык бугыръяськонъёсы пыриськемез бере, 1887-тӥ арын казнить каремын вал. Сое янгыше уськытӥзы эксэез виёнэ пыриськемез понна. Агайзэ быдтон Володялэсь сюлэмзэ бугыртӥз, улон шоры учконъёссэ воштӥз. Со дырысен Владимир пумит султӥз со вакытысь кунлэн радлыкезлы. 1887-тӥ арын со пыриз Кузонысь университетлэн юридической люкетаз. Соку ик со пыриськыны кутскиз студентъёслэн огазеяськонзылэн ужаз — режимлы пумит мынӥсьёслэн радазы. Но таӵе студентъёсты, пӧлазы Владимир Ульянов но, ӝоген кырме полиция. Декабре 1887-тӥ арын сое университетысь улляло, келяло анаезлэн вордскем юртаз. Отын сое полиция чакла, Владимир азьланьтэ ас понназ дышетсконзэ. 1888-тӥ арын Владимирлы луонлык усьтӥськиз нош ик Кузонэ берытскыны. Отын со тодматскиз Карл Маркслэн ужъёсыныз, озьы пыриськыны кутскиз марксистъёслэн кружоказы. Та дырысен В. Ульянов калык бугыръяськонъёслы дур басьтэмысь дугдэ, сюлэмаз-йыраз пыӵало Маркслэн ужъёсыз.

Бӧрысь со улыны выжиз Самарае, отын но сое чаклаз полиция. Уксё поттӥз нимаз урокъёс сётъяса. 1891-тӥ арын со экстерн амалэн Санкт-Петербургысь университетэ кун экзаменъёссэ сётӥз. 1892-тӥ — 1893-тӥ аръёсы В. Ульянов тыршиз Самараысь присяжной судьялэн юрттӥсез луыса. Отын кылдытэ марксист кружок, ӟуч кылэ берыктэ Карл Маркслэсь Коммунист партилэсь Манифестсэ.

1893-тӥ арын улыны каръяське Санкт-Петербурге. Отын тырше юрист луыса. Ачиз но валатэк кыле Петербургысь марксистъёслэн азьветлӥсьсы чотын луэмзэ. Ӝоген В. Ульяновез полиция кырме но кунгож сьӧры келя, отын со тодматске Россиысь марксистъёслэн кичӧлтӥсеынызы Георгий Плехановен. 1895-тӥ арын В. Ульянов Россие берытске, Питерысь вань марксист кружокъёсты огинэ герӟа — озьы кылдытэ «Рабочей классэз зӥбонлэсь мозмытонъя нюръяськон» огазеяськонзэ. Сое нош ик полиция кырме но пытсэт сьӧры келя. Ӝоген сое куинь арлы келяло Сибире, Шушенское черкогуртэ. Отын 1898-тӥ арын кузпалъяське Надежда Крупскаяен, соин со тодматскиз вал Петербургысь кружокъёсы пыриськыкуз.

Ссылкаын дыръяз но со азинтэ революционер ужзэ. 1897-тӥ арын поттэ «Капитализмлэн Россиын азинскемез» ужзэ, со пыр со ченгеше народникъёслэн улон шоры учкеменызы. Отын ик вортэ, Россиын буржуазной революция тани-тани бугырскоз шуыса.

Ссылкаын улэмез бере мылкыд каре кунгож сьӧры потыны. Кӧня ке дыр ӵоже улэ Мюнхенын, Лондонын, Женеваын. Отысь эшъёсыныз — Вера Засуличен, Юлий Мартовен, Георгий Плехановен, Павел Аксельродэн — огазе кариськыса, поттыны кутско «Искра» газет. 1901-тӥ арысен аслыз выль ним малпа — Ленин, ужъёссэ та нимтулэн тодмостыны кутске. РСДРП-лэн Брюссельын ортчем кыкетӥ съездэз Ленинэз но эшъёссэ кык «бурдлы» люкиз — большевикъёс (Ленин пала дурбасьтӥсьёс) но меньшевикъёс (соослы пумит султэмъёс).

1905-тӥ — 1907-тӥ аръёсы — Буржуазно-демократической революция мынон вакытэ — Ленинлы Россие берытскыны луонлык кылдэ. Отысь эшъёссэ со пролетариатлы но крестьянъёслы дурвайыны косэ, мылкыдзэс бугыртэ. Но революция Ленин малпамъя уг радъяськы, солы нош ик кунгож сьӧры берытсконо луэ. Озьы ке но Россиен кусыпъёссэ уг ышты, лушкем пыриське Кун Думалэн ужаз. РСДРП-ын нош ик бугыръяськонъёс кутско. Одӥг ласянь Лев Троцкий — пӧртэм партиослэн возиськемзылы дурбасьтӥсь, мукет ласянь — Ленин, большевикъёслэсь партизэс (асьсэ печать ёзэнызы — «Правда» газетэн) кылдытон сярысь сюлмаськись.

Калык пӧлын радикализаия мынон вакытэ большевикъёслэн данзы ӝутскиз. 1917-тӥ арын, Советъёслэн нырысетӥ съездазы вераськыкуз, Ленин пусйытэк ӧз кельты большевикъёслэн власте вуэмзы сярысь. 1917-тӥ арын сентябрь толэзе Ленин малпанэ вуиз: воштӥськонъёслы дыр вуиз. Октябре Петроградэ интыяськем Временной правительство кушкатэмын вал. Советъёслэн кыкетӥ съездазы кылдытэмын калык комиссаръёслэн кенешсы (СНК), соин кивалтонэз оскизы В. Ленинлы.

1918-тӥ арын Ленин тыршиз большевикъёслэсь властьсэс юнматон бордын. Но эсеръёс, паллян кужымъёс но анархистъёс Ленинлы кивалтыны эрик сётыны ӧз дыртэ. 30-тӥ августэ сое виыны турттон учыр вал — Большевикъёслэн Москваысь комитетсылэсь юртсэ пуштытӥзы. Но Ленин сӧсырмыны ӧз сюры. Таӵе учыр бӧрсьы Ленин мытӥз правительственный террор нимаськись ужрадэз — большевикъёслы пумит мынӥсьёсты кырмылыны но быдтыны ӧдъязы.

1922-тӥ арын Ленинлэн тазалыкез инсультэн йырин лябӟиз. Кема дыр ӵоже эмъяськоно луиз, нош ар пумын — декабре — солэн йыраз нош ик вирсэрез пуштӥз. Солы тазалыкез сэрен Кремльысь кошконо луиз. 21-тӥ январе 1924-тӥ арын со улонысь кошкиз. Мугорыз утиське Мускоысь Кремль азьын сылӥсь мавзолейын.