Ленинградлэн блокадаез

Википедиысь материал

Ленинградлэн блокадаез — немец, финн но испан армиослэн (соослы юрттӥзы на Уйпал Африкаысь но Италиысь мылкыд карисьёс) Быдӟым Атыкай ож вакытэ Ленинградэз блокировать каремзы. Кыстӥськиз 1941-тӥ арын 8-тӥ куарусёнысен 1944-тӥ арын 27-тӥ толшорозь (блокадалэн кульчоез тӥямын вылэм 1943-тӥ арын 18-тӥ толшоре) - 872 нунал ӵоже.

Та городэз киултон гитлер армия понна одӥгез валтӥсь ужпумъёс пӧлысь вылэм, соин 1941-тӥ арын 8-тӥ сентябре тушмонъёс Ленинградэз быдэсак котыртӥзы. Сиён, тыл, шуныт, ву лыктэмысь дугдӥзы. Германиын малпазы: сютэм калык кема уз чида, сётскоз. Нош Ленинград сётскем бере быдэс Горд Армилэн, быдэс Совето Союзлэн мылкыдыз куашкалоз, сыӵе армиез вормыны капчи луоз. 1941-тӥ арын 8-тӥ ноябре, Мюнхенэ вуылыкуз, А. Гитлер верам: «Ленинградлы номырлы оскыны. Вазь яке бер со куашкалоз. Блокадаез куштыны нокин уз быгаты. Ленинград сютэм улонлэсь быроз».

Котыртэм Ленинградын улон[Тупатыны | бамлэсь кодзэ тупатоно]

Котыртэм городын адямиос нуналлы быдэ кулылӥзы. Официальной даннойёсъя, 642 сюрс пала мурт улонысь кошкем блокада вакытэ. Мукет даннойёсъя, 850 сюрслэсь уно. Соос пӧлысь 97 процентэз – сютэм улонлэсь. М. Уолцер американ философлэн пусъемезъя, ож аръёсы Ленинградын огшоры калык тросгес быриз, со вакытэ ик Гамбургысь, Дрезденысь, Токиоысь, Хиросимаысь но Нагасакиысь вань быремъёсыз лыдэ басьтыса.

1941-тӥ-1942-тӥ аръёсы Ленинградысь 2 миллион пала адями эвакуировать каремын вылэм, нош 560 сюрсэз нокытчы кошкымтэ. Городэз котыртэм бере отысь потыны луэм на одӥг сюрестӥ гинэ – Ладога ты вылтӥ (азьланяз сое «Дорога Жизни» нимазы). Шуныт дыръя вутӥ ветлӥсь пӧртэм транспорт городэ сиён вуттӥз, нош берен мыныкуз - адямиосыз, толалтэ йӧ вылтӥ поттазы машинаос. Тулыс но сӥзьыл, куке йӧ юн кынмыса ӧз вуттылы яке шунаны кутскылӥз, уно техника, нош соин ӵош улэп муртъёс но сиён-юон вуэ кошкылӥзы. Озьы ке но, мукет сюрес ӧвӧлэн, бадӟым ыштонъёс сярысь тодыса, йӧ вылэ потазы выль машинаос. Ветлӥзы соос уйёсы, пеймыт дыръя. Соку но тушмонъёс тыэз сак эскеризы, уно тырмытэм техникаез ыбылӥзы но пуштытъязы.

Сиёнэз городэ вуттӥзы на самолётъёс но вертолётъёс, нош 1943-тӥ арысен, Ленинград вӧзысь кӧня ке иськем музъемез берыктэм но 3 арня куспын отӥ чугун сюрес пуктэм бере - поездъёсын но.

Блокадалэн лулчеберетэ кельтэм пытьыосыз[Тупатыны | бамлэсь кодзэ тупатоно]

Блокада сярысь вераськыку, вунэтыны уг яра Таня Савичеваез. Ленинградын будӥсь нылашлэн, отысь трос мукет нылпиослэн сямен ик, ож вакытэ син азяз кулӥллям песяез, агайёсыз, анаез но апаез. Таня сое ваньзэ апаезлэн блокнотаз гожъям. Эвакуация кутскем бере, нылашез Ленинградысь нуо. Эмъясьёс тыршизы утьыны солэсь улонзэ, но бер вал ни: со кулӥз кема сютэм улыса но висьыса.

Быдӟым ож вакытэ нылпиослэн котыртэм Ленинградын улэмзы – нимысьтыз бадӟым тема, со сярысь трос гожъямын, верамын. Но та юан туннэ но бордаз кыске. Ленинградэз мозмытон дырысен 70 ар тырмонлы сӥзьыса, «Линия Марты» кино пуктэмын вал. Со возьматэ нылпиослэсь ож вакытэ улэмзэс но али, уно аръёс ортчыса, ог-огенызы пумиськемзэс.

Ож аръёсы Ленинградын озьы ик таркамын но выжытэм быдтэмын вал туж уно синпелетъёс, вашкала юртъёс. Тужгес трос синпелетъёс берыктонтэм быдтэмын Ленинград улосын. Куд-ог возиськемъёсызлэсь но, оло, воксё номыр ӧз кыльысал, дыраз соосыз мешокъёсын но пулъёсын ӧз ватысалзы ке. Озьы, кылсярысь, утиллям Ленинградысь Пётр I-лы но Финляндской вокзал вӧзысь В. Ленинлы синпелетъёсыз.

Куашкатэмын вылэм Павловскысь дворец, бӧрысь со ӝуам, нош паркысьтыз 70 сюрс пала писпуосты кораллям. Озьы ик Царской Селоын Бадӟым Екатерининской дворец ӝуам (немецъёс отын лазарет усьтӥллям), тыл потэм чигнакузы. Петергоф тодмантэм калэ вуттэмын вылэм. Пётр I-лы кузьмам Янтарной комнатаысь узырлыкез тушмонъёс ваньзэ поттӥллям.

Но тросгес синпелетъёс кылдӥзы, дыр, Быдӟым Атыкай ож бере ни – котыртэм Ленинградэ сюремъёсыз, со понна нюръяськисьёсыз, отын быремъёсыз данъяса но буре вайыса. Ож йылпумъяськем бере ик карез выльдыны-тупатъяны кутскизы. Соку ик городын кылдӥзы буре ваён интыос, шайгуос. Али Санкт-Петербургын но улосаз ож вакытлы сӥзем трос пӧртэм монументъёсыз, обелискъёсыз, синпелетъёсыз, стелаосыз синйылтыны луэ. Тужгес тодмоосыз соос пӧлысь: «Ленинград Город-геройлы» обелиск, Пискарёвской шайвыл (солэн музеяз интыяське Таня Савичевалэн дневникезлэн копиез), «Блокадный трамвай» мемориал но мукетыз.

Ленинградлэн ож вакытэ улэмез, нюръяськемез сярысь трос выльзэ но тунсыкозэ тодыны луэ Ленинградэз утёнлы но котыртонлы сӥзем мемориальной музейын.

Ленинградлэн данъянъёсыз[Тупатыны | бамлэсь кодзэ тупатоно]

1941-тӥ арын 8-тӥ сентябрьысен 1944-тӥ арын 27-тӥ январёзь, 2 ар но 5 толэзь, город возиськиз, чидаз, быгатэмезъя фронтлы юрттӥз. Быдӟым Атыкай ожлэн историяз та блокада пыремын тужгес бадӟым город понна тужгес кема дыр ӵоже ожмаськон сямен. 1945-тӥ арын 1-тӥ мае Ленинград Сталинградэн, Севастополен но Одессаен оградын Город-герой вылӥ нимын пусъемын, нош 1965-тӥ арын 8-тӥ мае – Ленинлэн орденэныз но «Зарни Кизили» медален.