Павлов, Артемий Ефимович
| Артемий Ефимович Павлов | |
|---|---|
| Ужъёсыз: | политик |
| Вордӥськон нуналэз: | 21-тӥ инвожое (3-тӥ пӧсьтолэзе) 1891 |
| Вордӥськон интыез: | |
| Кулон нуналэз: | 19-тӥ тулыспалэ 1972 (80 ар) |
| Кулон интыез: | |
Артемий Ефимович Павлов — совето кун но партия понна ужам удмурт политик, УАССР-ысь Верховной Советлэн Президиумезлэн тӧроез (1939—1949), СССР-ысь Верховной Советлэн 1-тӥ но 2-тӥ созывъёсызлэн депутатсы.
Улон сюресэз[Тупатыны | вики-текстэз тупатыны]
Артемий Павлов Глаз утемын Кычагуртын (али та гурт Яр ёросын) шоро-куспо улӥсь крестьян семьяын 1891-тӥ арын вордскиз.
Дас сизьым аресозь егит пи, Артемий Ефимович атаезлэн хозяйствоез начар сэрен калык вылэ ужаны кошконо луиз. Азьло со крестьянъёсын плотник луыса ужалляз, нош кызь арес тырмем бераз Западно-Уральской чугун сюрес вылэ ужаны кошке, отын со ремонтной рабочий луыса ужа.
1914-тӥ арын Артемий Ефимовичез эксэй армие басьто но австри фронтэ келяло. Со октябрь социалистической революциез австри фронтлэн окопъёсаз пумитаз.
1918-тӥ арын Артемий Ефимовичез Горд армилэн радаз басьто. Со колчакъёсын но тӧдьы полякъёсын нюръяськонэ пыриське. 1919-тӥ арын Горд армиын дыръяз Павлов РКП(б) партие пыриз.
Армиысь бертэм бераз, 1921-тӥ арысен кутскыса, ньыль ар ӵоже Павлов Укана волисполкомын председатель луыса ужаз.
1927—1928 аръёсын Артемий Ефимович Понино волкомын ВКП(б)-лэн секретарез луыса ужаз. Нош 1928—1930 аръёсын Вотселькредитсоюзлэн отделениеныз, областной льноводсоюзлэн льнобазаеныз но сельхозснаблэн отделениеныз тодӥсьяськыса Глаз карын ужаз. А 1930—1936 аръёсын Павлов нырысь Балезиноысь но берлогес Кезысь МТС-ёсын директор луыса ужаз.
1936—1937 арын Павлов Ленинградын МТС директоръёслэн курсазы дышетскиз. Собере отысь бертэм бераз, Глаз райисполкоме тӧрое быръемын вал, отын со 1938-тӥ арлэн тулыспал толэзёзяз ужаз[1]. 1938-тӥ арын ик южтолэзьысен пӧсьтолэзёзь Артемий Павлов УАССР-ысь Совнаркомлэн тӧроезлэн кыкетӥ воштӥсез вал. 1938—1939 аръёсын со УАССР-ысь нюлэс промышленностья калык комиссариатэн кивалтӥз.
1935-тӥ аре Павлов Удмурт АССР-лэн Центральной Исполнительной Комитетаз членэ бырйиське, нош 1939-тӥ арысен 1949-тӥ арозь Удмурт АССР-ысь Верховной Советлэн Президиумезлэн тӧроез луыса ужа.
Кулӥз Ижкарын 1972-тӥ арын 19-тӥ тулыспалэ.
Наградаосыз[Тупатыны | вики-текстэз тупатыны]
Горд Кизилилэн но Отечественной Войналэн I-тӥ степенё орденъёсынызы пусъемын[2].
Валэктонъёс[Тупатыны | вики-текстэз тупатыны]
- ↑ Кин луэ Артемий Ефимович Павлов // Азьлань : газет. — 1941. — 8 январь (№ 3). — 1-тӥ бам.
- ↑ Павлов Артемий Ефимович(ӟуч) Справочник по истории Коммунистической партии и Советского Союза 1898—1991. Эскеремын 2019-01-14 аре