Перевощиков, Генрих Ксенофонтович
| Генрих Ксенофонтович Перевощиков | |
| Ужан удысэз: |
гожъяськись[d] но журналист[d] |
|---|---|
| Вордӥськем нуналыз: | |
| Вордӥськем интыез: | |
| Кун: | |
| Кулон нуналыз: |
23-тӥ коньывуонэ 2016 (79 ар) |
| Кулон интыез: | |
Генрих Ксенофонтович Перевощиков — тодмо удмурт гожъяськись, Россиысь гожъяськисьёслэн огазеяськонзылэн ёзчиез, Удмурт Элькунысь калык писатель.
Улон сюресэз
[Тупатыны | бамлэсь кодзэ тупатоно]Генрих Ксенофонтович Перевощиков вордскиз 1937-тӥ арын 14-тӥ куарусёнэ Эгра ёросысь Верх-Нязь гуртын. Чутырь черкогуртысь сизьым классъем школаез йылпумъяса, Ижкарысь индустриальной техникуме пырыны малпаз. Но пыриз Якшур-Бӧдья педучилищее, собере Дэбес педучилищее выжиз, сое Генрих Перевощиков 1954-тӥ арын йылпумъяз. Нош 1960-тӥ арын быдтӥз Удмурт пединститутысь история но филология факультетэз. Кышнояськиз Мокрушина Роза Васильевна вылын (одиг пиез но кык нылыз). 1958-тӥ арысен Удмурт радиоын ужаз. 1960-тӥ арын поттӥз пиналъёслы книга «Тӧдьы гырлы». Собере потӥзы граждан-публицистической пуштросо очеркъёсын книгаос «Кыдазы егитъёс» но «Куашетӥз сильтӧл».
Творчествоез
[Тупатыны | бамлэсь кодзэ тупатоно]Генрих Перевощиков — туала удмурт литератураысь одӥгез валтӥсь прозаик. Ас мытэм удыссэ со ӝыны даур пала ини «гыре». 1977-тӥ арын Генрих Перевощиков пыре Писательёслэн Союзазы. Та арын ик со поттэ «Йыбыртты музъемлы» книгазэ, кудӥз луиз тетралогилэн нырысетӥ люкетэз. «Йыбыртты музъемлы» тетралогия борды кутсконлэн одӥгез мугез таӵе но вал: 1970-тӥ аръёсы Россиысь калыкъёслэсь литературазэс дунъянын одӥг «гожтымтэ курон» кузёяськиз: вань-а отын (ӟуч литератураын сямен!) бадӟым жанрен гожтэм ужъёс. Вань ке, умой, ӧвӧл ке, литература быдэ вуымтэгес на кадь.
Г. Перевощиков возьматӥз, удмурт литератураын вань сыӵе ужпумъёс но характеръёс, кудъёсыз одӥг яке кык романэ гинэ уг тэро, романъёслэн сузьетазы курисько. 1980-тӥ арын потэ тетралогилэн кыкетӥ книгаез — «Югдонын» ӟардэ», собере — «Тулкымлы пумит» (1981) но «Нуназе азьын» (1986). «Прозаик умой возьматӥз, мар со косъяськон-приказъяськон (командно-административной) система но тоталитаризм, мар мугъёсъя социализмо шаерамы ужась адямиослы шудо улон пуктыны уг луы. Улонмылэсь кыӵе палъёссэ гинэ уг усьты Г. Перевощиков, кыӵе вормон гинэ колхозын ужасьёс уг басьто, — котькытын кылдо но возьматӥсько социализмлэн „вужеро“ палъёсыз, адямилы пумит луись инъетъёсыз» (В. Л. Шибанов).
1989 арын потэ «Йӧвалег» роман-дилогиез. В.Емельянов тазьы гожтэ «Йӧвалег» роман сярысь: «Мынам малпамея, со (Генрих Перевощиков — П. Ш.) удмурт литераторъёс пӧлысь нырысез ӟеч-ӟеч басьтӥськиз ноку быронтэм, весяк улӥсь темаос борды — ог-огдэ жалян, ог-огедлы юрттон, адямилык. Созэ но пусйыны кулэ, писатель романзэ гожтӥз „огинтыын лёгаськон“ шуоно вакытлэн буй-буй пушъён аръёсаз…». «Йӧвалег» дилогиын журналист-писатель Роман Овчинников улон югдурлэсь инъетсэ валаны тыршэ, сюлмаське, кызьы калык пӧлын адямилыкез утёно. Романын аспӧртэмлыко луэ сюреслэн образэз, татын со адӟонэн герӟаське. Генрих Перевощиков астэ ачид быдтон (суицид) ужпумез но ӝутэ.
«Тӧдьы куака» романын возьматӥське выльдӥськон вакыт. Романлэн валтӥсь героез Николай Ушаков. Со бертэ вордскем гуртаз Афган ож бере но котькытысь шонерлык утчаны кутске. Романлэн пумаз сое виё. Ушаков образэз дунне литератураысь «дон-кихотъёслэн» сузьетазы но пыртыны луэ, дыр.
2006-тӥ арын Финляндиысь М. Кастрен нимо общество ортчытӥз ӵошатскон. Россиысь берпуметӥ аръёсы гожтэм финн-угор произведениос ӵошатскизы. Жюри нырысетӥ инты сётӥзы Г. Перевощиковлэн «Узы сяськаян вакытэ» повестьлы но премиен сое пусйызы. Та произведение дуннеысь «улонлы йылпумъян карон» романъёсын (роман подведения итогов) одӥг радэ пуктэмын (Т. И. Зайцева). Повестьлэн валтӥсь героез заводысь цехен кивалтӥсь Назаров. Со котьку зэмлык понна но ноку ас принципъёслэсь уг палэнтӥськы. Но солэн сыӵе луэмез кышнозэ но заводысь куд-ог ужасьёсты туж бадӟым кайгуэ вутто. Секыт висьыны кутскыса, Назаров ортчем улонэз вылэ выль синмын учкыны кутске, улонэз берыктыны луысал ке, со троссэ воштысал.
Али Генрих Перевощиков «Кенеш» журналын ужа.