Кенеш (журнал)

Википедиысь материал

Кенеш — республикаысьтымы литературалы сӥзем журнал. Солэн бамъёсаз асьсэлэсь ужъёссэс печатлало шаерысьтымы тодмо писательёс но поэтъёс, озьы ик егит авторъёс.

Журналлэн историез кутске 1926-тӥ арын. Соку республикаямы кылдӥз удмурт писательёслэн нырысетӥ огазеяськонзы ВУАРП. Солы кутскон сётӥз тодмо учёной, этнограф но поэт Кузебай Герд. 1931-тӥ-34-тӥ аръёсы журнал нимзэ воштӥз но луиз "Кылбурет удсын", берлогес "Пролетар кылбурет удысын".

Удмуртиын писательёслэн союззы кылдэмен валче, журнал 1935-тӥ арын "Молот" луиз. Таӵе нимын со потӥз кема аръёс ӵоже, нырысетӥ нимзэ берыктӥз 1990-тӥ арын. Быдӟым ож вакытэ журнал ӧз печатласькы, выльысь потыны кутскиз 1954-тӥ арын.

Журналлэн редакторъёсыз пӧртэм аръёсы вал М. А. Коновалов, М. П. Петров , Т. А. Архипов, С. А. Самсонов, А. Г. Шкляев но мукетъёсыз. 1994-тӥ арысен журнал оскемын П. В. Куликовлы. кылдэмгес вакытаз "Кенеш" удмурт гожъясьёслы эскерон инты выллем луиз. 1920-тӥ аръёсын одӥг номерын авторъёс кыӵе ке ужпумъя асьсэлэсь пӧртэм малпанъёссэс вераны быгатылӥзы. Бӧрысь журнал пыр ортчылӥзы удмурт литератураын классика луэм произведениос.

Берло дыре "Кенешын" ӟеч сям луиз арлы быдэ огзэ номерзэс быдэсак сӥзьыны одӥг темалы. Озьы бӧрсьысь аръёс ӵоже потӥзы удмурт кырӟанъёслы, серемес веранъёслы, сценкаослы, сиён-юонлы сӥзем журналъёс. Туннэ журналын ужало туж тодмо но дано адямиос: Удмурт Республикаысь культура удысысь дано ужась, прозаик Олег Четкарёв , Ашальчи Оки нимо премилэн лауреатэз, кылбурчи Галина Романова , прозаик но кылбурчи Лидия Нянькина ,тодмо писатель Генрих Перевощиков, Пётр Сергеев, Ольга Бородина но мукетъёсыз.

Журнал потэ толэзьлы быдэ. Тиражез возиське 1 сюрс 500 экземпляр котыр.