Семён Александрович Самсонов

Википедиысь материал
Перейти к навигации Перейти к поиску
Этот текст нужно присоединить к статье Самсонов, Семён Александрович, указав источник. А здесь оставить перенаправление.

Семён Александрович Самсонов 1931-тӥ арын 1-тӥ куарусёнэ Пичи Пурга ёросысь Тыло (Сырьезшур) гуртын вордӥськиз. 1952-тӥ арын Можгаысь фельдшеръёсты дасясь школаез, 1956-тӥ арын Ижкарысь пединститутэз, 1967-тӥ арын Москваысь А. М. Горький нимо литинститутысь курсъёсты йылпумъяз.

Пичи дырысеныз Семён Самсонов гожъяськон удысэ кыстӥськиз. Газетъёсын очеркъёсыз, веросъёсыз потылӥзы, нош 1952-тӥ арын сое ассэ «Советской Удмуртия» газетэ отделэн кивалтыны ӧтизы, берлогес редакторлы воштӥсе пуктӥзы. 1963—65-тӥ, 1967—71-тӥ, 1983—84-тӥ аръёсы «Молот» журналын валтӥсь редактор вал, 1985—93-тӥ аръёсы — Удмуртиысь писательёслэн огазеяськонзылэн тӧроез.

Писательёс пӧлысь Семён Самсонов одӥгез тужгес трос гожъяськисез вал. Очеркъёсыз, веросъёсыз, повестьёсыз, романъёсыз Ижын но Москваын кызь куинь книгаын потӥзы. Ӟуч кылэ сяна, куд-ог ужъёсыз украин, финн, литва, эстон, азербайджан, нивх, коми, пор, мордва, авар, осетин, узбек, бурят, якут но мукет кылэ берыктэмын. С. А. Самсоновлы 1981-тӥ арын УАССР-лэсь Кун премизэ сётӥзы, 1986-тӥ арын со Удмуртиысь калык писатель луиз.

Героез уж пыр возьматыса гожъян удмурт литератураын тужгес азинскемын. Котькуд вакытэ солэн куронъёсыз пӧртэмесь вал. Проза ӝужан вакытэ писательёс крестьян калык пӧлысь потэм но гуртэз выльдон понна нюръяськись муртьёсты возьматылӥзы. Собере калыклэсь висъяськытэк ужась, вордӥськем музъемзэ гажась муртлы саклык висъяны одъязы. Огшап ортчыса, югдур воштӥськиз: ӟеч произведениосын герой удысуженыз (профессиеныз) пырак валчеяськемын вал, калык но кун сое ужын басьтэм вормонъёсызъя дунъязы. 1960—90-тӥ аръёсы удмурт гожъяськисьёс пӧлысь Семён Самсонов лыдӟисьёслы тужгес тодмоез луэ. Геннадий Красильников огъёзэз сямен ик, со но литературае «оттепель» шуон вакытэ вуиз ке но, гожъямъёсыныз «застой» дыре но выльдӥськонлэн нырысетӥ аръёсаз тодмогес луиз. 1970-тӥ аръёслэн шоразы Семён Самсонов удмурт литератураын одӥгез валтӥсь писатель вал ини, книгаосаз ас вакытысьтыз лэчыт югдуръёсты возьматыны тыршиз.

Писательлэн творчествоез публицистика удысын тужгес ӟеч адӟиське. Солэн очеркъёсын тямыс книгаез потӥз. Нырысь-валысь гуртын улӥсьёс, музъем вылын тыршисьёс сярысь трос гожъяз, нош берло интеллигентлэсь образзэ кылдытыны сюлмаськиз. Очеркъёсыз пӧлын Сталин кивалтон вакытэ адямиез юнме шорысь янгыше уськытонлы сӥземъёсыз, «Гурезез ӝужыт, ошмесэз кезьыт» (1988) но «Адямилы но бурдъёс кулэ» (1991), висъяськогес, соос нимысьтыз эскеремез кулэ каро.

Вакытэзлы тупась темаос — адями но азинскем техника кусыпъёсты эскерон, литература пыр гурт улонлэн радлыказ пыриськон — Семён Самсонов публицистлэн быдэстоно ужпумъёсыз. Очеркъёсаз адями сямъёсты усьтыны, ас вакытсэ возьматыны, сое шодыны быгатэмез туннэ но лыдӟисьлы тунсыко.

1959-тӥ арын со литературае сюрес лёгиз, «Азьлане сюрес» книгазэ поттыса. Отысь очеркъёсын 1953—59-тӥ аръёсы Пичи Пурга ёросысь «Молния» колхозын югдуръёс сярысь гожтэмын. Писатель со вакытысь гурт калыклэн улэм-вылэмезлы бадӟым саклык висъя, геройёсызлэсь рос-прос, ӝутскем мылкыдын тыршемзэс, юн сямо луэмзэс тужгес но пусъе. Ю-нянь будэтӥсьлы, пудо вордон удысын тыршисьлы со аръёсы капчи ой вал. Колхозын трудодень понна гинэ ужазы, соин ик гурт калык каръёсы, леспромхозъёсы кошконо луылӥз. Но Семён Самсоновлэн гуртоосыз со секыт вакытьёсты чидазы, колхоззэс утьыны сюлмаськизы. Соин ик очеркъёс адямилэн кужымезлы, быгатонлыкезлы, азьланьын ӟеч улонлы осконэн тырмемын. Кыкетӥ книгаез 1961-тӥ арын потӥз — «Льӧмпу сяськая». Отчы ньыль веросъёсыз но укмыс очеркъёсыз пыремын. Таяз ини пӧртэм кивалтӥсьёслы бадӟымгес саклык висъямын. Геройёсыз — азьветлӥсьёс. Соос ужась калыклэсь куронъёссэ ӟеч тодо но соос понна сюлмасько. Писательлэн одӥг героез но коллективлэн кыӵе ке малпанъёсызлы, ужъёсызлы пумит уг кариськы, кунлэсь но куронъёссэ умой тодэ. Со янгышасьтэм, шуг-секытъёслэсь кышкасьтэм геройёсты возьматыны тырше.

Очеркъёсыз пӧлын писательлэн тус суредъёсын (портрет жанр) ужьёсыз тужгес тодмо луизы. Геройёсыз — гуртысь ӧнерчиос: колхоз кузёос, механикъёс, агрономъёс. Ваньзы ик ужын пӧзьыса уло, коллектив понна быдэс лулынызы сюлмасько. Но берлогес ини Семён Самсонов герой¬ёсызлэн ӧнер быгатонлыксы ужез яратэмзы бордысь гинэ потэ шуыса возьматыны ӧз ни тыршы, соослэсь дышетскыса басьтэм тодон-валанзэс но пусйылӥз.

Семён Самсоновлэсь быдэс творчествозэ учкыса ортчоно ке, со, ужась муртлэсь тужгес ӟеч сямъёссэ возьматыса, положительной геройлэсь образзэ кылдытыны сюлмаськиз. Но мултэсгес озьы тыршемез кытӥяз геройлэсь пуш малпанъёсызлэсь мур сӥоссэ бугыртыны люкетӥз. Соин ик образъёсыз огшоры калыкысь потэм геройёс кадесь адӟисько. Удмурт публицистикаын Семён Самсоновлэн 1978-тӥ арын потэм «Мынам гуртэ — Тыло» очеркез классика луыса кылиз. Татын вордӥськиз бере, писатель сое туж яратэ. Тылоысь ик потӥзы удмурт литератураысь куать тодмо гожъяськисьёс, пӧлысьтызы ньылез - Самсоновъёслэн выжыысьтызы.

1970-тӥ аръёсы Тыло «азинскисьтэм» («неперспективной») шуон гуртъёс пӧлы сюриз. Семён Александрович пичи дырысеныз дуно интыоссэ утьыны быгатӥз. Озьы со писательлэсь лэчыт пероезлэсь данзэ жутӥз. Шаерысьтымы пӧртэм газет-журналъёсын сяна, «Мынам гуртэ — Тыло» очерк Москваын но потӥз, Совето Союз вакытэ радио пыр но чузъяськиз. Улон азинскиз, лыдӟись выль геройёсыз кулэ кариз. Семён Самсонов удмурт шаерын вордӥськем но будэм, быдэс кунлы тодмо луэм Антонина Пальшина, радиолокация удысысь бадӟым ӧнерчи Павел Ощепков, озьы ик Василий Николаевич, Борис Васильевич но Василий Васильевич Парин профессоръёс сярысь художественно-документальной повестьёс гожтӥз. «Выжыкыл ӧвӧл та» повестяз паймымон нылкышноез возьматӥз. Антон Пальшин нимын со Нырысетӥ мировой войнае пыриськиз но Георгиевской крестэн, медальёсын пусъемын вал. Азьвыл гожъямъёсаз писатель геройёсыз шоры кунлэсь курем-косэм ужзэ быдэсъясьёс шоры кадьгес учкыса возьматылӥз. Табере огшоры адями но солы тунсыко потылӥз ни. Валтӥсь интыын — солэн быгатонлыкез, ӝутскем мылкыдын тыршемез. Геройёсыз курадзонъёс пыр пото, трос секытеэ чидано луо ке но, соос ас мылкыдзыя, сюлэм косэмзыя калык, кун понна тыршо, котькуд адямилэсь быгатонлыксэ улӟытон сярысь сюлмасько. Сыӵеен адӟиськомы Паринъёсты, Павел Ощепковез. Соос туж огшорыесь, вормонъёсынызы уг данъясько. Лыдӟись азе адямилыкоен пуксё. Семён Самсоновлэн берпуметӥ очеркез 1992-тӥ арын потӥз — «Парижын улэ удмурт нылкышно». Героинязэ автор сямъёсыз, мылкыдыз, вераськонэз, малпамтэ шорысь лэсьтэм ужез пыр усьтэ. Калык, кун понна тыршемзэ возьматэм интые, таяз ини со кышномуртлэсь улэм-вылэмзэ, ортчем сюрессэ суреданэз кулэенгес лыдъя. Социалистической кунлэсь висъяськись, чылкак мукет дуннеын улӥсь тодосчилэсь ӟеч, быгатыса, узыр улон интызэ писатель усьтэ, Парижын ассэ шедьтэм кышномуртэн данъяське.

Самсонов дуннеысь ӟечсэ, чеберзэ адӟыны но возьматыны тыршиз. Очеркъёсыз пыр со дыр, дунне, улон сярысь малпаськиз, сюлмаськиз, висиз. Вань мылкыдыныз, сюлмыныз вордӥськем шаерез, отысь калык борды бурмемын вал. Соин ик солэн гожъямъёсаз кужмо сюлэмлэн юн жугиськемез шодӥське.