Ува

Посёлок Ува 56°58′47″ с. ш. 52°10′38″ в. д. Шаер Россия Улос Удмуртия Ёрос Ува ёрос Кылдытон дыр 1923 Улӥсьёс (2012) 19 934 адями Йӧскалык состав ӟучъёс, удмуртъёс, бигеръёс Часовой пояс UTC+4 Телефон код +7 34130 Почта индексъёс 427260-427261, 427263-427265 Автомобиль код 18 Официальной сайт uva.udmurt.ru

Ува Ува

Ува — Удмуртиысь посёлок, Ува ёрослэн центрез. 1938-тӥ арысен 2012-тӥ арозь город типъем посёлок вал. Интыяськемын Ва шур дурын, Ижлэсь 93 иськемлы палэнын. Улӥсез 19 сюрс 800 адями (1998-тӥ арлы). Соос пӧлын ӟучъёс — 62,7 %, удмуртъёс — 32,2%, бигеръёс — 3,2 %, мукет калыкъёс — 1,9 %. Кылдэмын 10-тӥ июле 1924-тӥ арын. Нырысь-валысь лыдъяськиз нюлэс корасьёслэн каргуртсы шуыса. 1930-тӥ арын Ува черкогуртын мытэмын гыбед (торф) поттонъя ужъёс. 1934-тӥ арын усьтӥськиз Уваез Ижен герӟась чугун сюрес. 1935-тӥ арын 23-тӥ январе Ува черкогурт Ува ёрослэн центрез луиз. Нош 1938-тӥ арын Ува село юнматэмын рабочийёслэн каргуртсы нимын.

Экономика

Ува каргуртын 14 промышленностья 14 предприятие. Соос пӧлысь уноез нюлэс коранэн, пулэсь арбериос лэсьтонэн выро. Тужгес но бадӟым предприятие туннэ нуналлы — «Увадрев-холдинг». Отын потто корка пуктон арбериос, мебель но мукет. Ужа гыбед поттонъя «Увинское» огазеяськон. Ӟеч радъямын сиён-юон поттон удыс. Ужзэ радъя Уваысь тылобурдо вордонъя фабрика, парсь будэтонъя но сӥль поттонъя предприятие. Ува каргуртын дасяло йӧллэсь сиёнъёс-юонъёс, озьы ик нянь но ческыт пыжосъёс потто.

Культура но дышетон

Ува каргуртын ужа вить школа. Быдӟым Отечественной война аръёсы Ува каргуртысь 1 номеро школаын директор луыса ужаз быдэс дуннелы тодмо луэм педагог В. А. Сухомлинский. Та вакытэ отын ужа 3 удыслы дышетӥсь педучилище, озьы ик лэсьтӥськисьёсты дасянъя 27 номеро ПТУ. Усьтэмын пиналъёслы чаклам спортъя школа, озьы ик Нылпиослэн творчествозыя центр. Ува каргуртын интыяськемын «Юность» культурая юрт но «Восток» кинотеатр. Со сяна, Ува черкогуртын ужзэс радъяло Удмурт Республикаысь Национальной, озьы ик Суредаськон искусствоосъя музейёслэн ёзъёссы. Усьтэмын 270 интылы чаклам эмъяськон юрт. Ува каргуртлэсь кыдёкын ик ӧвӧл интыяськемын «Ува» санаторий. Каргуртын сыло 6 синпелетъёс но искусстволы сӥзем монументъёс.

Ува каргуртын потэ «Увинская газета». Со вӧлме Ува ёросысь вань гуртъёсы. Редакторез — Пётр Люкин.

Транспорт

Каргурт пыр ортче Ижевск — Кильмезь чугун сюрес, кудӥз вылын Ува-1 станция ужа. Озьы ик посёлок доры валтэ Иж — Нылга — Ува автомобиль сюрес. Ува селое вуыса, сюрес куинь пала вайяське: Вавоже, Сьӧлтае, Сюмсие.

Посёлокын вань мерлыко транспорт — автобус. Со калыкез 9 маршрутъя нуэ-вае.